KOMONG'U 8 - BUKUIT NE TILIL

Koraito ne bo aeng’ agoi ne bo ang’wan

¹ Ak kilenji Jehovah Musa, Ui oldab Parao, ak ilenji, Kamwa Jehovah ko u ni kole, Unde bikyuk koba, si kobiit koboisiewa.

² Ak ngiete koba, keero, abire emeng’ung’ komugul mororochik:

³ ak nyiie ainet mororochik, ak kotogosta koba gong’ung’, ak koba got ne irue, agoi itogung’ung’, ak gorikab otwogiguk, ak oldab biguk, ak kapkoimaung’ung’, ak tereniguk che kikwang’e makatinik:

⁴ ak kotogostaenen, ak biguk, ak otwogiguk tugul.

⁵ Ak kilenji Jehovah Musa, Ilenji Aron, Chuul eung’ung’ ne iting’e siarit itokyi ainosiek, ak kererusiek, ak tamboinik, si komong’une mororochik komong’ji emetab Misri.

⁶ Ak kichuul Aron eunnyi kotokyi beekab Misri; ak kitogos anyun mororochik, ak kinyi emetab Misri.

⁷ Ak kiyai bik che ng’omen che ng’orsei ko u noto eng’ ng’orsenywa, ak kiimoong’ji mororochik emetab Misri.

⁸ Kiguur Parao anyun Musa ak Aron, kolenji, Orirji Jehovah, si koistaena mororochik, ak eng’ bikyuk; ak aunde bik koba, koba koeng’ji Jehovah tiseiywot.

⁹ Ak kilenji Musa Parao, Ilosunenage: asaun au, ak otwogiguk, ak biguk, si kobiit kebar mororochik koistoenengei ak goriguk, ak kotebe ainet kityo?

¹⁰ Ak kile, Mutai. Ak kilenji, Ingoyaak ko u ng’olyondeng’ung’: si kobiit inai ile mami age ne u Jehovah Kamuktaindennyo.

¹¹ Ak istoenengei mororochik, ak eng’ goriguk ak eng’ otwogiguk ak eng’ biguk; ak kong’etune ainet inegei.

¹² Kimanda anyun Musa ak Aron eng’ gab Parao: ak kirirji Musa Jehovah agobo mororochichoto che kiga ipchi Parao.

¹³ Ak kiyai Jehovah ko u ng’olyotab Musa; ak kibek mororochik eng’ gorik, ak eng’ seremusiek, ak emet.

¹⁴ Ak kiiyumat koek keburusiek: ak kibul emet.

¹⁵ Ak kingogeer Parao kole kagomung’do, kouuiit muguleldanyi inendet, ak kima kas ichek; ko u ye kiga komwa Jehovah.

¹⁶ Ak kilenji Jehovah Musa, Ilenji Aron, Sut siaring’ung’ ak ikwere temburiekab emet, si kobiit kowalogis temburiechoto koek isirek eng’ emet komugul ne bo Misri.

¹⁷ Ak kiyai ko u noto; ak kichuul eunnyi Aron koboto siarinnyi, ak kokwer temburiek che bo ng’ony, ak kibiit isirek che kilany bik ak tiong’ik; kiek temburiek tugul che bo emet komugul ne bo Misri isirek.

¹⁸ Ak kiyai ko u noto bik che ng’omen che ng’orsei eng’ ng’orsenywa si kobiit komoong’ isirek, ago kima imuch: ak kinam isirechoto bik ak tiong’ik.

¹⁹ Kimwachi anyun bik che ng’omen che ng’orsei, Parao, kolenji, Mornetab Kamuktaindet nito: ak kiuuiit muguleldab Parao, ak ma kas ichek; ko u ye kiga komwa Jehovah.

²⁰ Ak kilenji Jehovah Musa, Ng’eet karon, muste ak itonon eng’ taitab Parao; keero, wendi ainet; ak ilenji inendet, Kamwa Jehovah ko u ni kole, Unde biguk koba, koba koboisiewa.

²¹ Ago ngot ko mechamji bikyuk koba, keero, ayogu kalyang’ik eng’ chang’indo kobwanjin ak otwogiguk ak biguk, ak goriguk orit: ak nyiie kalyang’ik gorikab Misri, ak ng’ony ole tonone.

²² Ak abesie emetab Gosen eng’ betunoto, ole menyei bikyuk, si mait kalyang’ik oloto; si kobiit inai inye ile a Jehovah ne mi barautietab emet.

²³ Ak ande kiwotet kwenutab bikyuk ak biguk: biitu kaborunonoto mutai.

²⁴ Ak kiyai Jehovah ko u noto; ak kichang’a kalyang’ik ne ya eng’ gotab Parao, ak eng’ gorikab otwogikyik: ak king’emak emet komugul ne bo Misri amu kalyang’ik.

²⁵ Ak kiiyokto Parao keguur Musa ak Aron, kolenji, Oba, oeng’ji Kamuktaindeng’wong’ tiseiywot eng’ emoni.

²⁶ Ak kile Musa, Ma nyolu keyai ko u noto; amu kieng’jini Jehovah Kamuktaindennyo tiseiywot ne wechei Misrik: tos kienye che wechei Misrik eng’ tainywa, tos malachech eng’ koik?

²⁷ Kibendi banda ne bo betusiek somok eng’ ong’atet, si keeng’ji tiseiywot Jehovah Kamuktaindennyo, ko u ye ta kong’atech.

²⁸ Ak kile Parao, Agonok obe si kobiit oeng’ji tiseiywot Jehovah Kamuktaindeng’wong’ eng’ ong’atet; ago mobendi ole loo mising’: osaiywa.

²⁹ Ak kile Musa, Keero, kawe eng’ ole imi si asa Jehovah si kobiit koistoe Parao kalyang’ik mutai, ak otwogikyik, ak bikyik; ago amat koboisie kogeny Parao kenisiet ye ete bik koba koeng’ji tiseiywot Jehovah.

³⁰ Ak kiwa Musa eng’ ole mi Parao, kwo kosa Jehovah.

³¹ Ak kiyai Jehovah ko u ng’olyotab Musa; kiistoe Parao kalyang’ik, ak otwogikyik, ak bikyik; ma ng’et agot agenge.

³² Ak kiiuuiit Parao muguleldanyi eng’ yoto agine, ak ma unda bik koba.