KOMONG'U 7 - BUKUIT NE TILIL

Kowendi Musa gap Parao. Koroito ne bo tai

¹ Ak kilenji Jehovah Musa, Keero, kayain iige Kamuktaindet eng’ Parao: ak koek ng’etab komet Aron maotiondeng’ung’.

² Imwae tugul che ang’atin: ak komwachi ng’etab komet Aron Parao, kounda lagokab Israel komanda eng’ emennyi.

³ Ak auuiiti muguleldab Parao, ak ates kaborunoikyuk ak kwong’utikyuk eng’ emetab Misri.

⁴ Ago maimuchi kogasak Parao, ak ande eunnyu Misri, ak amoong’u lugosiekyuk, bikyuk lagokab Israel, komong’une emetab Misri eng’ kiruogutik che eechen.

⁵ Ak tun naei Misrik kole a Jehovah, ye achuul eunnyu atokyi Misri, ak amoong’u lagokab Israel eng’ kwenunywa.

⁶ Ak kiyai Musa ak Aron ko u noto; kiyai anyun ko u ye king’at Jehovah.

⁷ Ak kiga koit kenyisiekab Musa tamanwogik sisiit, ak che bo Aron ko ki tamanwogik sisit ak somok, yoto king’alaljindos ak Parao.

⁸ Ak king’alalji Jehovah Musa ak Aron, kolenji,

⁹ Ye teebenak Parao kole, Oboru kwong’utiet: ilenji Aron anyun, Nam siaring’ung’, wirji ng’ony eng’ taitab Parao, si kobiit koek erenet.

¹⁰ Kiba Musa ak Aron anyun gab Parao, ak kiyai ko u ye kiga ng’at Jehovah: ak kiwirji ng’ony Aron siarinnyi eng’ taitab Parao, ak eng’ taitab otwogikyik, ak kiwalak koek erenet.

¹¹ Kiguur agine anyun Parao bik che ng’omen ak orgoik: ak kiyai ko u noto agichek bik che ng’omen che ng’orsei che bo Misri, eng’ ng’orsenywa.

¹² Kiwirji ng’ony chi age tugul siarinnyi, ak kiwalogis koek erenok: ago kilugui siaritab Aron sairisiekwak.

¹³ Ak kiuuiit muguleldab Parao, ak ma kas ichek; ko u ye kiga komwa Jehovah.

¹⁴ Ak kilenji Jehovah Musa, Uui muguleldab Parao, kaesio kounda bik koba.

¹⁵ Ui karon gab Parao; keero, wendi ainet; ak itonone tabandab ainet si otuiyechi yoto; ibe eung’ung’ siarit ne kowalak koek erenet.

¹⁶ Ak ilenji, Kagoyokwa Jehovah Kamuktaindet ne bo Hebranik, anyonjin, kole, Unde bikyuk koba, si kobiit koboisiewa eng’ ong’atet: keero, tom igas kora.

¹⁷ Kamwa ko u ni Jehovah, Inae eng’ ni ile a Jehovah; keero, akwere siarini ating’e eunnyu beechu mi ainoni, ak kowalogis koek korotik.

¹⁸ Ak begu njirenik che mi ainet, ak kobul ainet; ak kowech Misrik koee beek che bunu ainet.

¹⁹ Ak kilenji Jehovah Musa, Ilenji Aron, Nam siaring’ung’, ak ichuul eung’ung’ itokyi beekab Misri, ak ainosiekwak, ak kererusiekwak, ak tamboinikwak, ak togomwekwak tugul che bo beek, si kobiit koek korotik; ak kobiit korotik eng’ emet komugul ne bo Misri, eng’ terenikab beek che bo ketik, ak terenikab beek che bo koik.

²⁰ Ak kiyai Musa ak Aron ko u noto, ko u ye king’at Jehovah; ak kisut siarinato, kokwere beek che mi ainet, eng’ taitab Parao, ak eng’ taitab otwogikyik; ak kiwalogis beek tugul che mi ainet koek korotik.

²¹ Ak kibek njirenik che kimi ainet; ak kibul ainet kot ko mata komuch Misrik koee beekab ainet; ak kobiit korotik eng’ emet komugul ne bo Misri.

²² Ak kiyai ko u noto bik che ng’omen che ng’orsei che bo Misri eng’ ng’orsenywa: ak kiuuit muguleldab Parao, ak kima kas ichek; ko u ye kiga mwa Jehovah.

²³ Kiweektagei anyun Parao kwo gonnyi, ak kima iit agot ng’olyondonito agine koek kiy.

²⁴ Ak kibalat Misrik tugul ole negite ainet kolen tamangab konyor beek che eei; amu kima imuch koee beekab ainet.

²⁵ Ak kiiwong’gei betusiek tisabu koboch ngab kokwer Jehovah ainet.