KOMONG'U 6 - BUKUIT NE TILIL

Kogimityin Jehovah kogeny Israel arorutiennyi

¹ Ak kilenji Jehovah Musa, Machei si igeer nguno kit ne amache ayachi Parao: amu igochin ichek koba eng’ eut ne kim, ak koon koba eng’ emennyi eng’ eut ne kim.

² Ak king’alalji Kamuktaindet Musa kolenji, A JEHOVAH:

³ ak kiamong’ji Abraham, Isak ak Jakobo, ko a Kamuktaindet ne bo Kamuktaet, ago kima naa ichek eng’ kainennyu JEHOVAH.

⁴ Ak kiagimit kayomisennyu koboto ichek, ale agochi emetab Kanan, emetab rutoitonywa, ole kirutoote.

⁵ Ak koboto noto, ko kiagas tigenoikab lagokab Israel che mi eunekab Misrik ko ratotin; ak kiabwat kayomisennyu.

⁶ Ilenji anyun lagokab Israel amu noto, A JEHOVAH, ak amoong’wok omong’une laisetab Misrik, ak asoruok eng’ otwognatenywa ak atiachak eng’ eut ne chuulat, ak eng’ kiruogutik che eechen:

⁷ ak anamak oegu bikyuk, ak aegu Kamuktaindet eng’ okwek: si onai ole A JEHOVAH Kamuktaindeng’wong’ ne imoong’wok omong’une laisetab Misrik.

⁸ Ak amutwak obwa emet ne kiaitochi eunnyu agochi Abraham, Isak, ak Jakobo; ak agonok kobunjok: A JEHOVAH.

⁹ Ak king’alalji Musa ko u noto lagokab Israel: ago kima kas ichek ng’alekab Musa amu ng’wanindo ne kitinyei eng’ tamirmirikwak, ak otwognatet ne korom.

¹⁰ Ak king’alalji Jehovah Musa, kolenji,

¹¹ Mande, ing’alalji Parao laitoriatab Misri ilenji kochamji lagokab Israel komanda eng’ emennyi.

¹² Ak king’alal Musa eng’ taitab Jehovah, kole, Ma kasa lagokab Israel; ko tos imuchi kogasta ano Parao, ak ane atinyei kutit ne tomo kitiach?

¹³ Ak king’alalji Jehovah Musa ak Aron, ak kong’at ichek kobechi lagokab Israel, ak Parao laitoriatab Misri, si komanda lagokab Israel eng’ emetab Misri.

Oret ne kisau Musa ak Aron

¹⁴ Chu ko bounikab gorikab kwanisiekwak: werikab Reuben taitab Israel; Hanok, Palu, Hesron, ak Karmi: chuto ko lagokab gab Reuben.

¹⁵ Ak werikab Simeon ko ki: Jemuel, Jamin, Ohad, Jakin, Sohar, ak Shaul weritab cheptab Kanan: chuto ko lagokab gab Simeon.

¹⁶ Ak chu ko kainaikab werikab Lawi ko u ortinwekwak: Gerson, Kohat, ak Merari; ak kenyisiekab Lawi kote kosobei ko ki kenyuisiek bogol ak sosom ak tisab.

¹⁷ Werikab Gerson ko ki: Libni ak Simei, ko u gorikwak.

¹⁸ Ak werikab Kohat ko ki: Amram, Isar, Hebron, ak Usiel; ak kenyisiekab Kohat kote kosobei ko ki kenyisiek bogol ak sosom ak somok.

¹⁹ Ak werikab Merari ko ki: Mali ak Musi. Chuto ko gorikab Lawik ko u ortinwekwak.

²⁰ Ak kiitun Amram sengennyi Jokebed; ak kisikyi Aron ak Musa: ak kenyisiekab Amram kote kosobei ko ki kenyisiek bogol ak sosom ak tisab.

²¹ Ak werikab Isar ko ki: Kora, Nepeg, ak Sikri.

²² Ak werikab Usiel ko ki: Misael, Elsapan, ak Sitri.

²³ Ak kiitun Aron Eliseba, cheptab Aminadab, chepkametab Nason; ak kisikyi inendet Nadab, Abiu, Eleasar ak Itamar.

²⁴ Ak werikab Kora ko ki: Asir, Elkana, ak Abiasap; chuto ko gorikab Koraik.

²⁵ Ak kiitun Eleasar weritab Aron age eng’ tibikab Putiel; ak kisikyi Pineas. Chuto ko bounikab gorik che bo kwanisiekab Lawik ko u gorikwak.

²⁶ Chuto ko Aron ak Musa che kimwachi Jehovah kolenji, Omoong’u lagokab Israel eng’ emetab Misri ko u lugosiekwak.

²⁷ Chuto ko icheget che kimwachi Parao laitoriatab Misri, komaanda lagokab Israel eng’ Misri: icheget ko Musa ak Aron.

²⁸ Ak eng’ betunoto ne king’alaljin Jehovah Musa eng’ emetab Misri,

²⁹ kong’alalji Jehovah Musa kolenji, A Jehovah: mwachi Parao laitoriatab Misri tuguk tugul che amwaun.

³⁰ Ak kimwa Musa eng’ taitab Jehovah, kole, Atinye kutit ne tomo kitiach; imuchi kogasta ano Parao?