KOMONG'U 5 - BUKUIT NE TILIL

Ng’ alekab Jehoval che kigimwa-chi Parao, ak kotesoksei kanyalilet

¹ Ak kingobata choto koba Musa ak Aron kolenji Parao, Kamwa ko u ni Jehovah, Kamuktaindet ne bo Israel, kole, Unde bikyuk koba, si kobiit koyaiywa igorta eng’ ong’atet.

² Ak kile Parao, Ng’o Jehovah, ne tos agas it ng’alekyik kot achamji Israel koba? Mangen Jehovah, ak kogeny, machamjini Israel koba.

³ Ak kile, Kinyonjech Kamuktaindet ne bo Hebranik: kisain anyun kele, Undech kebe bandab betusiek somok eng’ ong’atet, kebe keeng’ji Jehovah Kamuktaindennyo, tiseiywot; si mabirenech koroito, anan ko rotwetab chok.

⁴ Ak kilenji laitoriatab Misri ichek, Amu nee si omache otiach bik eng’ boisionikwak, inye Musa ak Aron? Oba ole mi milosiekwok.

⁵ Ak kile Parao, Ogeero, kagochang’a bik che mi emet nguno, ak kaogochi kometo laisenywa.

⁶ Ak king’at Parao eng’ betunoto kayagikab bik, ak bounik, kolenji,

⁷ Amata ogochi bik kogeny mobek che cham koyae matabaruk: ingoba ichegei kocheng’jigei mobek.

⁸ Ak obirji koyai matabaruk che yamegei ak che kocham koyaei kotugul; amochuchuch kiy eng’ choto; amu choriren ichek; rirtos anyun amu noto, kolen, Konech kebe keeng’ji Kamuktaindennyo tiseiywot.

⁹ Otesyi bichoto boisiet ne nyigis, si kobiit koyai choto, amat koepchi it ichek ng’alek che ma bo iman.

¹⁰ Kimanda anyun kayagikab bik, koboto bounikwak, kong’alalji bik kolenji, Kamwa ko u ni Parao, Magonok mobek.

¹¹ Oba okwege, ocheng’ eng’ ole omuchi onyorji: ak magichuchuchi kiy eng’ boisieng’wong’.

¹² Kiyestaat anyun bik eng’ emet komugul ne bo Misri koyumat kesigenik kogeere mobek.

¹³ Ak kiichirjir kayagik bik, kolenji, Owong’u boisionikwok, che kocham oyae betut age tugul, ko u ye kocham oyae otinye mobek.

¹⁴ Kigibir anyun bounikab lagokab Israel, che kiindoi kayagikab Parao, ak kiteebe kolenji, Amu nee si mowong’u motwetab boisiet ne bo amut ak ne bo ra, oyai matabaruk ko u ye kocham oyae oin kora?

¹⁵ Ak kiba bounikab lagokab Israel korirji Parao, kolenji, Amu nee si iyaiywech achek otwogiguk ko u ni?

¹⁶ Ma kigochi otwogiguk mobek, ak kolenjinech, Oyai matabaruk: ak kibirech achek otwogiguk: ago mi lelutiet biguk.

¹⁷ Ago kilenji, O choriren, o choriren: noto anyun komwa ole, Konech kebe keeng’ji tiseiywot Jehovah.

¹⁸ Ara anyun, oba oyai boisiet; magigonok mobek, ak kanyol oibu matabaruk che yamegei ak che kogimachei.

¹⁹ Ak kigeer bounikab lagokab Israel kole tinyei nyalilda, ye kingemwa kele, Mochuchuchi kiy eng’ matabarukwok che cham oyae betut age tugul.

²⁰ Ak kituiyo ak Musa ak Aron, kotonondos eng’ oret, kobunu gab Parao:

²¹ ak kilenji ichek, Ingogeerok Jehovah koruokwok; amu kaoyaech kesamisitu eng’ taitab Parao, ak eng’ taitab otwogikyik, kot onde rotwetab chok eunekwak kobarenech.

²² Ak kiweekyigei Musa oldab Jehovah, kolenji, Ee, Kamuktaindet, amu nee si iyachi ne ya bichu? Amu nee si iyokwa?

²³ Amu koboch ngab anyo gab Parao ang’alalji eng’ kaineng’ung’, koyachi bichu ne ya; ak ma isoru biguk agot kitigin.