KOMONG'U 40 - BUKUIT NE TILIL

Keteechei Got

¹ King’alalji anyun Jehovah Musa kolenji,

² Lumde goyoto bo emait ne kituiyechin eng’ betut ne bo tai ne bo arawet ne bo tai.

³ Ak inde moingetab baornatet got orit, ak ituch moinget eng’ ngorionoto kioiye got.

⁴ Ak ibu meset inde go, ak itet komie tuguk che tebe baragunnyi; ak ibu keldab tait, inde go, ak inaam taisiek.

⁵ Ak inde kapkorosut ne bo tahabu ne kibeele nyamdutik eng’ taitab moingetab baornatet, ak isonginin ngoriet eng’ kurgetab got.

⁶ Ak inde kaptisisiet ne kibeele tiseiywek taitab kurgetab goyoto bo emait ne kituiyechin.

⁷ Ak inde tabet ne kiunse kwenutab emait ne kituiyechin ak kaptisisiet, ak irong’ji beek kioto.

⁸ Ak lumde ng’otwetab seremut kot kotuiyo, ak isonginin ngorietab kurgetab seremut.

⁹ Ak iib mwanik che kiilse, ak iil got, ak tuguk tugul che mi orit, ak itaban, ak tugukyik tugul: si kotililit.

¹⁰ Ak iil kaptisisiet ne kibeele tiseiywek, ak tugukyik tugul, ak itilil kaptisisiet: ak kotililit mising’ kaptisisiet.

¹¹ Ak iil tabet ne kiunse, ak ng’echerennyi ak itaban.

¹² Ak imutu Aron ak werikyik kobwa kurgetab emait ne kituiyechin, ak iune beek.

¹³ Ak ilaakyi Aron ngoroik che kigitaban; ak iil inendet, ak itaban, si kobiit koboisiewa eng’ boisietab tiseinatet.

¹⁴ Ak imutu werikyik, ak ilaakyi ngoroik che koen:

¹⁵ ak iil ichek, ko u ye kiil inye kwandanywa, si kobiit koboisiewa eng’ boisietab tiseinatet: ak koek kaiilsenywa ne kiili ichek tiseinatet ne bo agoi eng’ ibinwekwak tugul.

¹⁶ Kiyai anyun Musa ko u noto: ko u tugul che king’at Jehovah inendet, kiyai anyun ko u noto.

¹⁷ Ak kigilumda goyoto eng’ arawet ne bo tai eng’ kenyit ne bo aeng’ eng’ betut ne bo tai ne bo arawet.

¹⁸ Ak kilumda Musa anyun got, ak kiiteepto kong’ikwak che tononie, ak kilumda baoinikyik, ak korooch rateiywekyik, ak kolumda lumeiywekyik.

¹⁹ Kiito anyun emait eng’ got barak, ak kotuge ngoroik alak koliich; ko u ye king’at Jehovah Musa.

²⁰ Yeityo koib baornatet konde moinget orit, ak kiirooch moinget ketik che kiibe, ak koteepto keruetab rirenet eng’ baragutab moinget:

²¹ ak kiib inendet moinget kwo go orit, ak kosonginin ngoriet ne kioiye got, si kotekta moingetab baornatet; ko u ye king’at Jehovah Musa.

²² Ak kiinde meset got ne kituiyechin, kotaban murot ne bo katam, eng’ got ne sib kemong’jin.

²³ Ak kitet makatinik eng’ meset eng’ taitab Jehovah: kou ye king’at Jehovah Musa.

²⁴ Ak kiinde keldab tait emait ne kituiyechin, kotoorjin ak meset, kotaban murot ne bo tai eng’ got.

²⁵ Ak kiinaam taisiek eng’ taitab Jehovah; ko u ye king’at Jehovah Musa.

²⁶ Ak kiinde kapkorosut ne bo tahabu got ne kituiyechin eng’ goyoto sib kemong’jin:

²⁷ ak kibeele kapkorosunoto nyamdutik che bo tuguk che ng’uu ne anyin; ko u ye king’at Jehovah Musa.

²⁸ Yeityo kosonginin ngoriet eng’ kurgetab got.

²⁹ Ak kiinde kaptisisiet ne kibeele tiseiywek eng’ kurgetab got ne bo emait ne kituiyechin, ak kiigoito kagochinet ne kibeelei, ak ne bo busiek, eng’ kaptisisionoto; ko u ye king’at Jehovah Musa.

³⁰ Ak kiinde tabet ne kiunse kwenutab emait ne kituiyechin ak kaptisisiet, ak korong’ji beek orit, si kiunse.

³¹ Ak kiiun Musa ak Aron ak werikyik eunekwak ak kelyekwak eng’ kioto;

³² kiiuni ko u noto ye kimandoi emait ne kituiyechin, ak ye kimachei korikyi kaptisisiet: ko u ye king’at Jehovah Musa.

³³ Ak kilumda ng’otwetab seremut koyiem got ak kaptisisiet, ak kiisonginin ngorietab kurgetab seremut. Kiiges anyun Musa boisionoto.

³⁴ Kinyo kotuch anyun boldet emait ne kituiyechin, ak kinyi got lilindab Jehovah.

³⁵ Ak kima imuch Musa komanda emait ne kituiyechin, amu kitebe boldet baragutab goyoto, ak kinyi got lilindab Jehovah.

³⁶ Ak ye kingetogostae boldet eng’ goyoto, koba anyun lagokab Israel ko u noto eng’ banwekwak tugul:

³⁷ ago ye kima kitogostae boldet, ko kima kobendi ui agoi betut ne kagitogostae boldonato.

³⁸ Amu kitebe boldetab Jehovah got barak bet, ak kimi mat boldonato kemoi kogeerei got komugul ne bo Israel, eng’ banwekwak tugul.