KOMONG'U 4 - BUKUIT NE TILIL

Ma chamdagei Musa kiyokyo. Kigochin Aron boisiet

¹ Kiwolji anyun Musa kolenji, Ago, keero, maiyana bichoto, anan kogas kutinnyu: amu mwaei kolen, Machunjin Jehovah.

² Ak kilenji Jehovah, Nee ne iting’e eut? Ak kile, Siarit.

³ Ak kilenji, Wirji ng’ony. Ak kiwirji ng’ony, ak kiwalak koek erenet; ak kimwee Musa.

⁴ Ak kilenji Jehovah Musa, Iyogoite eung’ung’, ak inam katutiennyi: (kiiyogoito eunnyi anyun, ak konam, ak kiwalak koek siarit eng’ eunnyi:)

⁵ si kobiit koyan kole, kichunjin Jehovah Kamuktaindet ne bo kwanisiekwok, Kamuktaindet ne bo Abraham, Kamuktaindet ne bo Isak, Kamuktaindet ne bo Jakobo.

⁶ Ak kilenji Jehovah kogeny, Irooch eut tegeng’ung’. Ak kiirooch eunnyi teget: ak ye kingocher eunnyi, ogeero, kitinyei eunnyi mogondosik, kiwalak koleelit ko u teluchi.

⁷ Ak kilenji, Ketite eut irookte tegeng’ung’. (Ak kiweech korookto eut tegennyi; ak ye kingonem, ogeero, ko kagomieit ko u yegai.)

⁸ Ak ngo maiyanin, anan ngo magas kaborunet ne bo tai, komuchi koyan kaborunet ne bo let.

⁹ Ak ngo maiyan kaborunoichuto aeng’, anan kogas kuting’ung’, iram anyun beek eng’ ainet, si irong’ji ng’ony ole yaamat: si kowalak beechoto kerame ainet koek korotik eng’ emet ne yaamat.

¹⁰ Ak kilenji Musa Jehovah, Bwa Kamuktaindet, mangen ang’alal, koboch agoi, anan koboch ngab ong’alal ak otwogindeng’ung’: amu mangen ang’alal ak ua kut.

¹¹ Ak kilenji Jehovah inendet, Ng’o ne kiyaei kutitab chi? Anan ne yaei chi konamak kut, anan kotimak, anan si kogeerto, anan kogor? Tos ma ane Jehovah?

¹² Ui anyun, ami koboto kuting’ung’, ak anetin che kanyol imwa.

¹³ Ak kile, Bwa Kamuktaindet, asain, iyokte eng’ eutab inendet ne imache iyokte.

¹⁴ Ak kigoromitu neregekab Jehovah eng’ Musa, ak kilenji, Tos mami ng’etab komet Aron Lawindet? Angen ale imuchi kong’alal komie. Ak nyonei inendet agine kotorogun: ak baibai eng’ muguleldanyi ye keerin.

¹⁵ Ak ing’alaljini, inde kutinnyi ng’alechato: ami ane koboto kuting’ung’, ak koboto kutinnyi, ak anetak ne kanyol oyai.

¹⁶ Ak egu inendet ng’alalindet ne ng’alaljin bik: ak egu inendet kuting’ung’, ak iige Kamuktaindet eng’ inendet.

¹⁷ Ak iiboti inye siarini eng’ eung’ung’, ne iyae kaborunoik.

¹⁸ Ak kiweek Musa kwo oldab kabyugoinnyi Jetro, ak kilenji, Kaigai ichamwa awo, aweekyige ole mi bikyuk che mi Misri, ageer ngo ta kosoptos. Ak kilenji Jetro Musa, Ui eng’ kalyet.

¹⁹ Ak kilenji Jehovah Musa eng’ olin bo Midian, Ui, ketitege Misri: amu kigobek bik tugul che kicheng’ei kobarin.

²⁰ Ak kiimut Musa osotiondennyi ak werikyik, ak kichob kolany ichek sigiriet, ak koweek kwo emetab Misri: kiib anyun Musa siaritab Kamuktaindet eng’ eunnyi.

²¹ Ak kilenji Jehovah Musa, Ye igetitege Misri, irib iyai kwong’utik tugul eng’ taitab Parao, cho kaande eung’ung’: ago auuiiti muguleldanyi, si maigochi bik koba.

²² Ak ilenji Parao, Kamwa ko u ni Jehovah, Werinnyu Israel, taitanyu:

²³ ak kaamwaun alenjin, Igochi werinnyu kwo; si kobiit koboisiewa: ak kaiete kwo; keero, abare taitang’ung’.

²⁴ Ak ye kimi gotab toek kowendi, kotuiyo ak Jehovah, ak kimachei kobar inendet.

²⁵ Kinam anyun Sipora sengwetiet ne ng’atib, koyatitae werinnyi, ak kiwirji iririot kelyekyik; ak kile, Iman i manong’otiondennyu ne bo korotik.

²⁶ Ak kibagakta Jehovah inendet. Ak kile osotiondonoto, I manong’otiot ne bo korotik, amu kamuratanet.

²⁷ Ak kilenji Jehovah Aron, Ui, torokte Musa eng’ ong’atet. Kiwa anyun, ak kituiyechi tulwetab Kamuktaindet, ak king’utut inendet.

²⁸ Ak komwachi Musa Aron ng’alek tugul che bo Jehovah che kiga koyoktoe, ak kaborunoik tugul che kiga koyomisyi.

²⁹ Ak kiba Musa ak Aron koyum boisiek tugul che bo lagokab Israel:

³⁰ ak kimwa Aron ng’alek tugul che kiga komwachi Jehovah Musa, ak kiyai kaborunoik eng’ taitab bik.

³¹ Ak kiiyan bik: ye kingogas kole kagonyonji Jehovah lagokab Israel, ak kogogeer nyalilwogikwak, kong’urukso anyun.