KOMONG'U 39 - BUKUIT NE TILIL

Ngoroikab tiseinatet

¹ Ak kiyai bichoto ngoroik che kigisal kogororonitu eng’ tuguk che tuuen ne nyalil, ak che arusen ne birir, ak che biriren, si keboisie eng’ ole tilil, ak kinapchi Aron ngoroik che itabanotin; ko u ye kiga ng’at Jehovah Musa.

² Ak kiyai epod eng’ tahabu, ak eng’ che tuuen ne nyalil, ak eng’ che arusen ne birir, ak eng’ che biriren, ak eng’ katanit ne kararan ne kigila.

³ Ak kiitany tahabu koterteritu, yeityo korar koigei tapsinok, si kobiit kochuljulot eng’ che tuuen ne nyalil, ak eng’ che arusen ne birir, ak eng’ che biriren, ak eng’ katanit ne kararan, boisietab laindet ne ng’om.

⁴ Kinapchi kioto kebeberwekab tigigoik, che kigiropchin koek agenge; kigituiyo eng’ luukwekyik aeng’.

⁵ Ak birenet ne kila ng’omotik, ne kigirategei, kiginomnyo kogergeit ak epod; ki kergei ak boisiennyi; ki bo tahabu, ak che tuuen ne nyalil, ak che arusen ne birir, ak che biriren, ak che bo katanit ne kararan ne kigila; ko u ye kiga ng’at Jehovah Musa.

⁶ Ak kiwai koikab soam, che kigindeat tahabu che kigitogul, si konam; ak kigisirji koichato kainaikab lagokab Israel kogergeit ak waet ne bo ng’okset.

⁷ Ak kiinde koichato epod ole bo tigigoik, koek koikab kabwatet agobo lagokab Israel; ko u ye kiga ng’at Jehova Musa.

⁸ Ak kiyai ngorietab teget, boisietab musogindet ne ng’om, ko u boisietab epod; eng’ tahabu, ak eng’ che tuuen ne nyalil, ak eng’ che arusen ne birir, ak eng’ che biriren ak katanit ne kararan ne kigila.

⁹ Kiaechin tebeesindo ak koindo; ak kigiliich ngorionoto bo teget koek aeng’; kiek koindanyi olobo inchisiek sogol eng’ koindo ak eng’ tebeesindo, ko kagiliich.

¹⁰ Ak kitetyi kioto ortinwek ang’wan che bo koik: kiinde oret ne bo tai sardio, topasio ak bareqet.

¹¹ Ak kiinde oret ne bo aeng’, sumaragdo, sapire ak yaholom.

¹² Ak kiinde oret ne bo somok, huakinto, sebu ak ametusto.

¹³ Ak kiinde oret ne bo ang’wan, berulo, soam ak jasipi: kigiroogot koichato kelongonikab tahabu che kigitogul.

¹⁴ Ak ki te koichato kainaikab lagokab Israel, ki taman ak aeng’, ko u kainaikwak; ko u waetab ng’okset, tinyei koita age tugul kainennyi, bee ortinwek taman ak aeng’.

¹⁵ Ak kinapchi ngorionoto bo teget sirimwek che u rogoonik che bo tahabu che tililen, che kigilet.

¹⁶ Ak kitogul tahabu koek morik aeng’, ak kiyai peteinik aeng’ che bo tahabu, ak kiinde peteinichoto tabanwekab luukwek aeng’ che bo ngorionoto bo teget.

¹⁷ Ak kiirookto sirimwechoto aeng’ bo tahabu, che kigilet, peteinichoto aeng’ che mi tabanwekab luukwek aeng’, che bo ngorionoto bo teget.

¹⁸ Ak kinam komoswechun alak aeng’ che bo sirimwechoto aeng’ kigilet, korooch kelongonik aeng’ che kigitogul, yeityo kituiyo ak epod eng’ komostab tigigoik ole tabanu tai.

¹⁹ Ak kiyai peteinik aeng’ che bo tahabu, ak konapchi ngorionoto bo teget ole bo luukwek aeng’, eng’ tabanwekyik, che tabanu komostab orit eng’ epod kel.

²⁰ Ak kiyai peteinik aeng’ che bo tahabu, ak konapchi tuguchoto tigigoikab epod eng’ ole bo kel, ole tabanu tai, eng’ ole negite ye kigituiye, eng’ baragutab birenonoto bo epod, ne kiginab eng’ ng’omnatet.

²¹ Ak kiigiich ichek ngorietab teget eng’ peteinikyik, koratyin ak peteinikab epod, korate rogoet ne tuui ne nyalil, si kotebe baragutab birenet ne kigila eng’ ng’omnatet, si mabesio ngorietab teget ak epod; ko u ye kiga ng’at Jehovah Musa.

²² Ak kinab ngoriet ne kiroochegei, ne bo epod, ne kigisal konyalilit ne ais tugul, ne boisietab laindet;

²³ ak kinab ngorionoto kwen ole chutei metit, ko u ye kichobei ngoriet ne bo luget, ak kigigurman kong’ata si magerer.

²⁴ Ak kinapchi ngorionoto tabandab kel logoek che tuuen ne nyalil, ak che arusen ne birir, ak che biriren, ak che bo katanit ne kigila.

²⁵ Ak kiitany chepchingilok che bo tahabu che tililen, ak kiing’olate chepchingilochoto logoek, koyiem kelutab ngoriet;

²⁶ ye kiinde chepchingiliet, ko kiinde logoiyat korupgei, ak kirubatgei ko u noto agoi, eng’ tabandab ngoriet komugul, si keboisie; ko u ye kiga ng’at Jehovah Musa.

²⁷ Ak kinab ngoroik che koen che bo katanit ne kararan che kigila, kobunji Aron, ak werikyik,

²⁸ ak chepkulet ne bo katanit ne kararan, ak chepkuloik che miachen che mengechen che bo katanit ne kararan, ak sirualisiek che bo katanit ne kararan ne kigila,

²⁹ ak birenet ne bo katanit ne kararan ne kigila, ak ne bo che tuuen ne nyalil, ak che arusen ne birir, ak che biriren, boisietab nabindet ng’omotiot; ko u ye kiga ng’at Jehovah Musa.

³⁰ Ak kiitany kit ne kergei ak eurto eng’ nariet ne tilil, eng’ tahabu che kororon, ak kisirji sirutik, kogergeit ak waet ne bo ng’okset, kole, TILIL ENG’ JEHOVAH.

³¹ Ak kiratyi rogoet ne tuui ne nyalil, kotebe chepkulet ole bo togoch; ko u ye kiga ng’at Jehovah Musa.

³² Kiigesgei anyun boisionik tugul che bo gotab emait ne kituiyechin: ak kiyai lagokab Israel ko u tugul che king’at Jehovah Musa; kiyai ko u noto.

³³ Ak kiipchi ichek got Musa, ne Emait, ak tugukyik tugul, ak karikyik che kiname ngoroik, ak baoinikyik, ak rateiywekyik, ak lumeiywekyik, ak kong’ikwak che tononie;

³⁴ ak emaitab magatokab mengichik, che kigisal kobiriritu, ak emait ne bo magatokab mengichikab beek, ak anget ne kioiye got orit;

³⁵ ak moingetab baornatet, ak ketikyik che kiibe, ak keruetab rirenet:

³⁶ ak meset, ak tugukyik tugul, ak makatinik che bo kabartaet;

³⁷ ak keldo ne tilil ne bo tait, koboto taisiekyik, agot taisiek che kitetei komie, ak tugukyik tugul, ak mwanikab kit ne ikweng’sei;

³⁸ ak kapkorosutab tahabu, ak mwaita ne kiilse, ak nyamdutik che kibeelei che ng’uu ne anyiny, ak ngoriet ne kisonginine kurgetab Emait;

³⁹ ak kaptisisietab sugunwet, ak karnennyi ne kigireger eng’ sugunonik, ketikyik che kiibe, ak tugukyik tugul, ak tabet ne kiunse, ak ng’echerennyi:

⁴⁰ ak ngoroik che songinindos che bo serumut, ak lumeiywekyik, ak kong’ikwak che tononie, ak ngoriet ne bo kurgetab seremut, ak rogoonikyik, ak tigongenikyik, ak tuguk tugul che bo boisietab got, che bo emait ne kituiyechin;

⁴¹ ak ngoroik che kigisal kogororonitu si keboisie eng’ ole tilil, ak ngoroik che itabanotin che bo tisiindet Aron, ak ngoroikab werikyik, si kobiit kobois eng’ boisietab tiseinatet.

⁴² Kiyai anyun lagokab Israel boisiet tugul ne king’at Jehovah Musa.

⁴³ Ak kigeer Musa boisionichoto tugul, ogeero, kiga koges; kiyai anyun bichoto ko u ye kiga kong’at Jehovah: ak kiiberur Musa ichek.