KOMONG'U 37 - BUKUIT NE TILIL

Moinget ak Ng’echeretab Rirenet

¹ Ak kiyai Besalel moinget eng’ ketikab shita: kakwautik che bo eut aeng’ ak kebeber, koindanyi, ak kakwautiet ne bo eut agenge ak kebeber tebeesindanyi, kakwautiet ne bo eut agenge ak kebeber tononennyi:

² ak kiiliige tahabu che tililen orit ak sang’, ak kitegele tegeleiywotab tahabu koyieme baragunnyi tugul.

³ Ak kiitang’ji peteinik ang’wan che bo tahabu luukwekwak ang’wan; kiinde aeng’ komosta age, ak aeng’ eng’ komosta age.

⁴ Ak kiyai ketik che kiibe che bo shita, ak koliige tahabu.

⁵ Ak kiirooch ketichato peteinik che mitei tabanwekab moinget, si keibe.

⁶ Ak kiyai keruetab rirenet eng’ tahabu che tililen: koindanyi ko ki kakwautik che bo eut aeng’ ak kebeber, ak tebeesindanyi ko ki kakwautiet ne bo eut agenge ak kebeber.

⁷ Ak kiyai kerubisiek aeng’ eng’ tahabu; kiyae tahabu che kitanyi, eng’ tabanwek aeng’ che bo keruetab rirenet;

⁸ kotebe kerubit age komosi ak kotebe age komosin: inaamdos keruetab rirenet ak kerubisiek eng’ tabanwekyik tuwai.

⁹ Ak kiito kerubisiek kebebaikwak koba barak, kotuch keruetab rirenet eng’ kebebaikwak, ak kotoorjin togochikwak, ing’ururi togochikab kerubisiechoto keruetab rirenet.

¹⁰ Ak kiyai meset eng’ ketikab shita: koindanyi ko ki kakwautik aeng’ che bo eut, ak tebeesindanyi ko ki kakwautiet agenge ne bo eut, ak tononennyi ko ki kakwautiet ne bo eut agenge ak kebeber.

¹¹ Ak kiiliige tahabu che tililen, ak kiyachi tegeleiywotab tahabu kotegele, koyieme baragunnyi tugul.

¹² Ak kiyachi tegeleiywot ne yamei eut agenge tebeesindanyi koyiem kioto, ak kiyai tegeleiywotab tahabu koyieme tabanwekyik tugul.

¹³ Ak kiitang’ji peteinik ang’wan che bo tahabu, ak kiinde peteinichoto luukwek ang’wan eng’ komoswekab kelyekyik ang’wan.

¹⁴ Kimi peteinichoto ole negite tegeleiywot, ole chutei ketik che keibe meset.

¹⁵ Ak kiyai ketichato eng’ ketikab shita, ak koliige tahabu, si keibe meset.

¹⁶ Ak kiyai eng’ tahabu che tililen tuguk che kimi meset barak, tabokyik, ak kechigosiekyik, ak tageiywekyik, ak kikombokyik che kirong’jine tuguk.

¹⁷ Ak kiitany keldab tait eng’ tahabu che tililen: kiyae keloto bo tait tahabu che kitanyi, kelunnyi ak toloitanyi: kikombokyik, mulonokyik, ak taptokyik, kinamdos choto tugul koek kiy agenge:

¹⁸ ak kisage temenik lo toloato; kisage temenik somogu komostanyi age ne bo keloto, ak kosage temenik somogu ko u noto komostanin age:

¹⁹ kitinyei temet agenge kikombok somok che kigiyai koigei taptok che kiguure almond, ak mulwet ak taptet, kitinyei ko u noto temet age ne bo komosta age kokombok somok che kigiyai koigei taptochoto kiguure almond, ak mulwet ak taptet: ko u noto eng’ temenik tugul lo che sachei eng’ kioto.

²⁰ Ak kimitei ole bo toloita inendet kikombok ang’wanu, che kigiyai kogergeit ak taptokab almond, koboto mulonokyik ak taptokyik.

²¹ Ak ye kisage temenik aeng’u, komi kel yoto mulwet, ne kigituiye koek kiy agenge, ak ye kisage kogeny temenik aeng’u, komi kel yoto mulwet, ne kigituiye koek kiy agenge, ak ye kisage kogeny temenik aeng’u, komi kel yoto mulwet, ne kigituiye koek kiy agenge. Mitoti ko u noto eng’ komoswechoto tugul ole kisage temenik tugul ko lo.

²² Kinamgei mulonokwak ak temenikwak, koek kiy agenge: kigitang’e kioto komugul tahabu che tililen.

²³ Ak kiyai taisiekyik koek tisab, kiyae tahabu che tililen, koboto kanameiywondennyi, ak tabokyik che mengechen.

²⁴ Kiyai kioto eng’ tahabu che yamei talentait agenge, koboto tugukyik tugul.

²⁵ Ak kiyai kapkorosut ole kibeele nyamdutik eng’ ketikab shita: ki kakwautiet agenge ne bo eut koindanyi, ak ki kakwautiet agenge ne bo eut tebeesindanyi; kiaechin tebeesindo ak koindo; ak ki kakwautik aeng’ eng’ che bo eut tononennyi; kinamgei kapkorosut ak kuinoikyik koek kiy agenge.

²⁶ Ak kiiliige tahabu che tililen, baragunnyi, ak komoswekyik tugul kotuiyo, ak kuinoikyik: ak kiitany tegeleiywotab tahabu koyieme.

²⁷ Ak kiitany peteinik aeng’ che bo tahabu, ak kiinde tuguchoto kotaban tegeleiywot kel, eng’ teget ne bo komosi ak komosi, eng’ komoswekyik tuwai, si kobiit kirooch ketik che kiibe,

²⁸ Ak kiyai ketik che kiibe, eng’ ketikab shita, ak koliige tahabu.

²⁹ Ak kichob mwaita ne tilil ne kiilse, ak nyamdutik che tililen che kibeelei che bo tuguchoto anyinyen che ng’uu ne anyiny, ne boisietab ng’omotiot ne buruchi tuguk che ng’uu ne kararan.