KOMONG'U 36 - BUKUIT NE TILIL

Tuguk che mi Got

¹ Ingobois anyun Besalel ak Oholiab, ak age tugul ne tinyei muguleldo ne bo kaguiyet, ne kiinde Jehovah muguleldanyi ng’omnatet ak naet, si kobiit konai koyai boisiet ne bo otisietab ole tilil, ko u tugul che kiga ng’at Jehovah.

² Ak kiguur Musa Besalel ak Oholiab, ak chi age tugul ne tinyei muguleldo ne bo kaguiyet, ne kiga konde Jehovah ng’omnatet muguleldanyi, agot age tugul ne kiichirji muguleldanyi koyai boisionoto:

³ ak kitaach kagochinoik tugul eng’ Musa che kiga koib lagokab Israel kobunji boisietab otisiet ne bo ole tilil, keyae. Ak kiipchi kogeny karonet age tugul kagochinoik alak che bo chamnyet.

⁴ Ak kinyo chi tugul kometo boisiennyi ne koyaei, kibwa bik tugul che ng’omen nyo koyai boisiet tugul ne bo ole tilil.

⁵ Ak king’alalji ichek Musa kolenji, Ibu bik tuguk che siirei che kimachei eng’ boisietab otisiet, ne king’at Jehovah keyai.

⁶ Ak king’at Musa anyun kemwaitaat eng’ nganaset komugul kele, Amat koyai boisiet age tugul mureno anan kobogorio ne bo kagochinetab ole tilil. Kigiete anyun bik si mata koib kogeny.

⁷ Amu kiga koyam keyae boisionoto tuguk che kiga keib, kot kosiirto.

⁸ Ak kiyai chi age tugul ne ng’om eng’ ichek che boisiei, got, koboto ngoroik taman; che bo katanit ne kararan, ne kigila, ak che tuuen ne nyalil, ak che arusen ne birir, ak che biriren, konapchi ngoroik kerubisiek, ne boisietab nabindet ne nabei kondoi lelesta.

⁹ Ki kakwautik che bo eut tiptem ak sisiit koindab ngoriet age tugul, ak ki kakwautik ang’wan tebeesindab ngoriet age tugul: ak kiaechin ngoroichoto tugul.

¹⁰ Ak kiropchindos ngoroik mut: ak kiropchindos chun alak mut agichek, ko u noto.

¹¹ Ak kinapchi inendet belelutik che tuuen ne nyalil eng’ tabandab ngoriet age eng’ ole kurmanat, eng’ ole tuiyechin; kiyachi ko u noto eng’ tabandab ngoriet ne bo aeng’, ne tabanu barak eng’ ole kigituiye ne bo aeng’.

¹² Kinapchi ngoriet age belelutik konom, ak kinapchi belelutik konom eng’ tabandab ngoriet ne bo aeng’, eng’ ole kigituiye ne bo aeng’, tabandab ngoriet ne bo aeng’: kitokyindos belelutik.

¹³ Ak kiyai karik che kiname ngoroik konom che bo tahabu, si kotuiyo ngoroik eng’ kombochoto: kiek agenge anyun got.

¹⁴ Ak kiyai ngoroik che bo kororikab ng’ororek koek emait ne tuge got: kiyai ngoroik taman ak aeng’.

¹⁵ Kiek kakwautik sosom che bo eut koindab ngoriet age tugul, ak tebeesindo ko ki kakwautik ang’wan che bo eut: kiaechin ngoroichoto tugul tamanu ak agenge.

¹⁶ Ak kiituiyo ngoroik mut koek agenge ichegei, ak kiituiyo ngoroik lo kogeny koek agenge ichegei.

¹⁷ Ak kinapchi belelutik konom tabandab ngoriet age ne tabanu barak, eng’ ole kigituiye, ak kinapchi belelutik konom tabandab ngoriet eng’ ole kigituiye ne bo aeng’.

¹⁸ Ak kiitany karik che kiname ngoroik konom che bo sugunonik che ituiye emait, koek agenge.

¹⁹ Ak kinab ngoroikab mengichik che kigisal kobirbiritu, si ketuge emait, ak kinab ngoroik che bo mengichikab beek kotaban barak.

²⁰ Ak kiyai baoinik che bo ketikab shita kobunji got, che tonondos.

²¹ Koindab baoiyot age tugul ko ki kakwautik taman che bo eut, ak kiek tebeesindab baoiyot age tugul kakwautiet agenge ak kebeber.

²² Kitinyei baoiyot age tugul ng’elyebwek aeng’ che kituiyo: kiyai ko u noto baoinik tugul che bo got.

²³ Ak kiyai baoinik che bo got; kiinde choto tiptem kotaban murot ne bo tai:

²⁴ ak kibarbar feda kosikyi kong’ik artam, si kotaban kapkelyenutab baoinichoto tiptem; chutei ng’elyebwek aeng’u che bo baoiyot agenge, kong’ik aeng’ che mi kapkelyen, chutei ko u noto ng’elyebwek aeng’u che bo baoiyot age, kong’ik aeng’ che mi kapkelyen.

²⁵ Ak komosta age ne bo aeng’ ne bo got, ne tokyingei murot ne bo katam, kondoi baoinik tiptem,

²⁶ ak kong’ichoto artam che bo feda, kong’ik aeng’ eng’ kapkelyenutab baoiyot age.

²⁷ Kiyai anyun baoinik lo kobunji got batai, ole tokyingei cherongo.

²⁸ Ak kiyai baoinik aeng’ kobunji luukwek che bo got che mi batai.

²⁹ Ak kigitwakyin aeng’ koboch ng’ony agoi barak, ak kituiye tugul peteit: kiyachi ko u noto baoinichoto tuwai che bo luukwek aeng’.

³⁰ Ak kimi baoinik sisitu, ak kong’ikwak che bo feda, taman ak lo; kong’ik aeng’ eng’ kapkelyenutab baoiyot agenge, ak kong’ik aeng’ eng’ kapkelyenutab baoiyot age.

³¹ Ak kiyai ketikab shita koek rateiywek; kiyai baoinik mut che bo komosta agenge ne bo got,

³² ak rateiywek mut che bo baoinik che bo komosta age ne bo got, ak rateiywek mut che bo baoinik che bo komosta age ne bo got, ne mi batai, ole tokyingei cherongo.

³³ Ak kiyai rateiywotab kwen kwo kong’eete tabani agoi tabani, eng’ kwenutab baoinik chun alak.

³⁴ Ak kiiliige tahabu baoinik, ak kiyai peteinikwak che bo tahabu koek choto ole kiroochi rateiywek, ak kiilige rateiywechoto tahabu.

³⁵ Ak kiyai ngoriet ne kioiye got eng’ ne tuui ne nyalil, ak ne arus ne birir, ak ne birir, ak eng’ katanit ne kararan ne kigila: kiyai anganato koboto kerubisiek che boisietab laindet ne ng’om.

³⁶ Ak kiyachi ngorionoto lumeiywek ang’wan che bo shita, ak koliige tahabu: ak ki bo tahabu ireusiekwak; ak kiitang’ji kong’ik ang’wan che bo feda che kigibarbar.

³⁷ Ak kinab ngoriet ne bo kurgetab Emait, ne bo ne tuui ne nyalil, ak ne arus ne birir, ak ne birir, ak ne bo katanit ne kararan, ne kigila, boisietab chito ne nabei kondoi lelesta;

³⁸ ak lumeiywekwak mut, ak ireusiekwak: ak kiiliige tahabu metowekab lumeiywek, koboto rateiywekwak che kituiye: ak kong’ikwak mut ko ki bo sugunonik.