KOMONG'U 34 - BUKUIT NE TILIL

Kogimityin kogeny Jehovah Israelik arorutiennyi

¹ Ak kilenji Jehovah Musa, Bet koik aeng’ che lebelen ko u che bo tai: ak asirji koichato ng’alek che kimi koik che bo tai, che kiitui.

² Ak chopge karon, ak imusu tulwetab Sinai, ak inyo tainnyu eng’ tulwet barak.

³ Amat otogosu ak chi age tugul, amat kegeerji chi age tugul tulwet komugul; amat koagetyi kechirek anan tuga ole negite tulwonato.

⁴ Ak kibet koik aeng’ che lebelen ko u che bo tai; ak king’eet Musa karon, kotogosta kwo tulwetab Sinai, ko u ye kiga kong’at Jehovah inendet, koibei eng’ eunnyi koichato aeng’.

⁵ Ak kichorgei Jehovah eng’ boldet, ak kitonon koboto inendet eng’ yoto, ak kimwaita kainetab Jehovah.

⁶ Ak kibun Jehovah tainnyi, ak komwaita kole, Jehovah, Jehovah, Kamuktaindet ne nyiitat rirenet ak mieindo, ak masib konerechi, ak ne nyiitat talasiet ak imanit;

⁷ ne italachingei elfusiek, ne nyochin kaat bik tengekto ak bistoet ak chalwokto: ne mabagaktoi kiptengekyot age tugul; igeerjin lagok tengektab kwanisiekwak, ak eng’ lagokab lagokwak, agoi ibindab somok ak ne bo ang’wan.

⁸ Ak kichirjiren Musa kong’uruk agoi ng’ony, kolos.

⁹ Ak kile, Ngo kaanyoru nguno chamet eng’ taing’ung’, Ee Kiptaiyat, asain ale, ingocham Kiptaiyat kebe tugul; amu uui kaat bichu; ak inyoiywech kaat tengekwogikyok ak chalwogikyok, ak inamech keegu boroteng’ung’.

¹⁰ Ak kile, Keero, kayai arorutiet. Ayae kwong’utik eng’ taitab biguk tugul, che kitom ketau keyaei eng’ ng’ony komugul, anan eng’ bororiet age tugul; ak keerei bik tugul che imi kwenunywa boisietab Jehovah, amu kit ne kiiywei ne ayae eng’ inye.

¹¹ Rib anyun chuto kang’atin rani. Keero, aone komanda eng’ taing’ung’ Amorik, Kananik, Hitik, Perisik, Hibik, ak Jebusik.

¹² Ripge, si meyai arorutiet ak bik che menyei emonoto iwendi, si maek mestet eng’ kwenung’wong’:

¹³ ago obut kapkorosusiekwak, ak otuatui kanamonikwak kotonogis, ak oluul Aserikwak:

¹⁴ among’urukyi cheptalelit age tugul: amu Jehovah ne kainennyi ko ng’etkong’, inendet Kamuktaindet ne amei ng’etkong’:

¹⁵ si moyachigei arorutiet koboto bik che menyei emonoto, si maipgei ichek ak kanamonikwak, ak koeng’ji tiseiywek cheptalelisiekwak, ak koguurin age iam che bo tiseiywondennyi:

¹⁶ ak itunji weriguk tibikwak, ak koipgei tibikwak kosubi kanamonikwak, ak kochuut werikwok koipgei agichek kosubi kanamonikwak.

¹⁷ Ameyachigei kanamonik che kitanyi.

¹⁸ Kanyol irib igorta ne bo makatinik che ma kinde mermerek. Iame makatinik che ma kinde mermerek eng’ betusiek tisab, ko u ye kiang’atin, eng’ betusiek che kigiaror eng’ arawetab Abib: amu kiomong’u eng’ Misri eng’ arawanato bo Abib.

¹⁹ Chechuk tugul che yatei iyotet; ak tugul che twati tuga ak kechirek, che kirugik ak mengichik.

²⁰ Ak itiachi ne twatei sigiriet itiage aruet: ak ngo metiach, iiri kaatit. Itiachi weriguk tugul che bo tai. Ak manyonei chi oli ami ak eut buch.

²¹ Yai boisiet betusiek lo, ago imuuny eng’ betutab tisab: imuuny eng’ betusiekab kabatisiet ak eng’ betusiekab kesisiet.

²² Ak irib igortab wigisiek, noto ko tongoanikab nganok, ak igortab betusiek che kiyumune tugukab mbar, kogesugei kenyit.

²³ Bwanei mureniguk taitab Kiptaiyat Jehovah, Kamuktaindet ne bo Israel, konyil somok eng’ kenyit.

²⁴ Amu aone bororiosiek eng’ taing’ung’, ak abaroi kiwotosieguk: ama biitu chi age tugul ne machei emeng’ung’, ye itogostoi iwendi taitab Jehovah Kamuktaindeng’ung’ konyil somok eng’ kenyit.

²⁵ Amegoite korotikab tiseiywondennyu koboto makatiat ne kaginde mermerek; ak amat kong’et kot koeech tiseiywotab igortab paska.

²⁶ Ibu kobwa gotab Jehovah Kamuktaindeng’ung’, tuguk che bo tai eng’ tongoaniguk che bo emeng’ung’. Ameyoe aruet chegab kamet.

²⁷ Ak kilenji Jehovah Musa, Sir ng’alechu: amu kagiyomisge ak inye koboto Israel, ko u ole teptoi ng’alechu.

²⁸ Ak kitebi Musa ak Jehovah eng’ oloto betusiek artam ak kemousiek artam; ma am amit, anan koee beek. Ak kisirji koichato lebelen ng’alekab arorutiet, ng’atutik taman.

Kochorugei Musa eng’ Tulwet

²⁹ Ak ye kingochorgei Musa eng’ tulwetab Sinai koibu koik aeng’ che bo baornatet eng’ eunnyi, ye kichorgei eng’ tulwet, ko ma nai Musa kole iluu iririotab togennyi amu king’alali Jehovah ak inendet.

³⁰ Ak ye kingogeer Aron ak lagok tugul che bo Israel, Musa, ogeero, kiiluu togennyi: ak kiiywei korikyi inendet.

³¹ Ak kiguur Musa ichek; ak kiweektagei ole mi Musa, Aron ak bounik tugul che bo tuiyet: ak king’alalji Musa ichek.

³² Ak eng’ let korikyi lagok tugul che bo Israel: ak king’atyi ichek ng’alek tugul che kiga komwachi jehovah inendet eng’ tulwetab Sinai.

³³ Ak ye kingo kagoges Musa ng’alalennyi koboto ichek, kotuge togennyi ngoriet.

³⁴ Ago kiireegu Musa ngorionoto ye mandoi taitab Jehovah kowendi kong’alaldos ak inendet, agoi komong’; ak kimong’, konyo kong’alal ak lagokab Israel, komwachi che kiging’at;

³⁵ ak kigeer lagokab Israel togetab Musa, kole iluu iririotab togetab Musa: ak kituge Musa togennyi ngoriet kogeny, agoi komanda kwo kong’alal ak inendet.