KOMONG'U 33 - BUKUIT NE TILIL

Kotesei Musa saet ne sachin Israel

¹ Ak kilenji Jehovah Musa, Oba, otogoste eng’ oli, inye ak bik che kiimutu komong’une emetab Misri, agoi oit emet ne kiayosiechi Abraham, Isak ak Jakobo, alenji, Agochini iyoteng’ung’.

² Ak ayokte malaikaiyat kondoun; ak aon komanda Kananik, Amorik, Hitik, Perisik, Hibik, ak Jebusik,

³ agoi emonoto ne nyiitat chego ak kumik: amu matogostoi koboten; amu o bik che uuen kaat: si mabarak owong’uge eng’ oret.

⁴ Ak ye kingogas bik ng’alechato yaachen, koririo: ak kima ilaach chi tugukab lele.

⁵ Ak kilenji Jehovah Musa, Mwachi lagokab Israel, ilenji, O bik che uuen kaat: ngot awe atogoste kobotok ne matia, abarok ageswok: ara anyun oreegu tugukwok che bo lele, si kobiit ageer kit ne aitoin.

⁶ Ak kiireek lagokab Israel tugukwak tugul che bo lele kong’eete tulwetab Horeb ak kwo tai.

⁷ Ak kicham koibei Musa emait kwo koteech sang’utab nganaset, eng’ ye loo; ak kiguure emainato Emait ne kituiyechin. Ak chi age tugul ne kichamei kocheng’ Jehovah ko kiwendi emainato kituiyechin, ne kimi sang’utab nganaset.

⁸ Ak ye kingomanda Musa kwo ole mi Emait, kong’eetyo bik tugul kotononso, chi age tugul eng’ kurgetab emainnyi, kogeeroti Musa, kowendi agoi komanda Emainato.

⁹ Ak ye kingomanda Musa Emainato, kochorgei boldet, konyo kotonone kurgetab Emait: ak kong’alal Jehovah ak Musa.

¹⁰ Ak kigeer bik tugul toloata bo boldet kotonone kurgetab Emait: ak king’eetyo bik tugul kong’urukso, chi age tugul eng’ kurgetab emainnyi.

¹¹ Ak king’alaljin Jehovah ak Musa kimni, ko u ye ng’alaljindos chi ak choruennyi. Ak kiweek kogeny kwo nganaset: ago mawo eng’ Emainato Josua kiboitiondennyi, weritab Nun, ne neran.

¹² Ak kilenji Musa Jehovah, Keero, kemwawa, ilenja, Imut bichu kotogosta: ak tum imwawa chito ne iyoktoi kebe tuwai. Ago kaimwa ile, Angen kaineng’ung’, ak kaimwa kogeny, ile, Kainyoru chamet eng’ tainnyi.

¹³ Ara anyun, asomin ale, ngo kaanyoru chamet eng’ taing’ung’ iman, iborua nguno ortinweguk, si kobiit anain, si kobiit anyor chamet eng’ taing’ung’: ak ibwat inye ile bororioni ko biguk.

¹⁴ Ak kile, Kibendi tuwai, ak agonin kamuung’et.

¹⁵ Ak kilenji, Ngo magibendi tuwai, ko memutech kebe eng’ oli.

¹⁶ Amu kinae nee nguno kele, kaanyoru chamet eng’ taing’ung’, ak biguk? Tos ma amu kibendi tugul ak inye, si kobiit kitabangei, ane ak biguk, eng’ bik tugul che mi ng’ony?

¹⁷ Ak kilenji Jehovah Musa, Ayae ng’olyondoni kemwa agine: amu kenyoru chamet eng’ tainnyu, ak angen kaineng’ung’.

¹⁸ Ak kile, Asain ale, Iborua lilindang’ung’.

¹⁹ Ak kile, Achamdoi mieindanyu tugul kosiirtoe taing’ung’, ak amwaite kainetab Jehovah eng’ taing’ung’; ak ayachi ne mie ne amache ayachi ne mie, ak aborji rirenetab ge inendet ne yamei aborji rirenetab ge.

²⁰ Ak kile, Memuchi igeer togennyu: amu mageera chi ak kosob.

²¹ Ak kile Jehovah, Keero, mitei oli negitena oldo, ak itonone ruandet barak:

²² ak ye siirtoi lilindanyu, andein ruandet ole betat, ak atugenen eunnyu agoi asiirte:

²³ yeityo aiste eunnyu, ak igeer batennyu: ago magigeerei togennyu.