KOMONG'U 32 - BUKUIT NE TILIL

Saetab kanamonik eng’ Israel amu kiilos moita ne kigitanyi

¹ Ak ye kingogeer bik kole kagogagei Musa eng’ tulwet, ama chorgei, kotuiyechi bik ole mi Aron, ak kilenji, Ng’eet, yaiywech kanamonik, che bendi kondoi eng’ achek; amu magingen kit ne kinyor Musa-inito, chichoto kiimutwech kemong’une emetab Misri.

² Ak kilenji Aron bichoto, Ocherune munaokab tahabu osotikwok, ak werikwok, ak tibikwok che tinyei eng’ itik, ak oibwa.

³ Ak kiicher bik tugul anyun munaok tugul che bo tahabu che kimi itikwak, ak koipchi Aron.

⁴ Ak kitaach tuguchoto kobunu eunekwak, ak kichob eng’ karnet ne kiboisie, ak kiitany kanamwet ne bo moita ye kingo kagobeel kochootyo; ak kole, Kanamoniguk chu, inye Israel, che kiimutun imong’une emetab Misri.

⁵ Ak ye kingogeer Aron kioto, koteech kaptisisiet eng’ taitab kanamwonoto; ak kimwaita Aron kole, Egu igorta ne o mutai eng’ Jehovah.

⁶ Ak king’eetyo karon mising’ eng’ betut ne kiisubi betunoto, ak kiigoito kagochinoik che kibeelei, ak kiib kagochinoikab kalyet; ak kiteb ng’ony bik koamis ak koeeiso, ak kong’eetyo kourerenso.

⁷ Ak king’alalji Jehovah Musa kolenji, Ui, chortegei; amu kagong’emgei biguk che kiimutu komong’une emetab Misri:

⁸ kosib komasta kometo oret ne kiga ang’atyi: kagoyachigei kanamwet ne bo moita ne kigitany, ak kogutung’ji, ak kagoeng’ji tiseiywek, ak kolen, Kanamoniguk chu, inye Israel, che kiimutun imong’une emetab Misri.

⁹ Ak kilenji Jehovah Musa, Koageer ale, uui kaat bichu:

¹⁰ bagakta anyun, si kolalyo neregekyuk agobo ichek, si kobiit awong’ ichek: ak ayain iegu bororiet ne o.

¹¹ Ak kiigaigai Musa Jehovah Kamuktaindennyi, kolenji, Bwa Jehovah, amu nee si kolalyo neregeguk agobo biguk, che kiimutu komong’une emetab Misri eng’ kimnatet ne o ak eng’ eut ne kim?

¹² Amu nee si komwa tun Misrik kole, Kiga imutyin ichek yaitiet kole si kobar ichek eng’ tulonok, ak kowong’ kobetyo eng’ ng’ony? Ketite neregeguk che laldos, ak iwal kii ya koistoegei biguk.

¹³ Ibwat Abraham, Isak, ak Israel, otwogiguk, che kiiyosiechi inyege, ilenji, Abaroi iyoteng’wong’ kotenit kecheikab kipsengwetisiek, ak agochini iyoteng’wong’ emoni komugul ne kiamwawok, ak kobunji ichek koigeny.

¹⁴ Ak kiwal Jehovah kabwatutikyik agobo yaitionoto kiga mwa kole yachjin bikyik.

¹⁵ Ak kiweigei Musa, kochortagei eng’ tulwet, koibe eunnyi koik aeng’ che lebelen che bo baornatet; ki sirotin koichato komoswek tuwai; kiga kisir komosi ak komosi.

¹⁶ Ak ki boisietab Kamuktaindet koichato, ak sirutichoto ko ki sirutikab Kamuktaindet, che kiga kisir kewai eng’ koichato.

¹⁷ Ak ye kingogas Josua bolatetab bik kowaaktos, kolenji Musa, Mi bolatetab boriet nganaset.

¹⁸ Ak kile, Ma bo kutinato icheget che boldos amu kagoterteris, ama bo che boldos amu kagiterter: ago bo bolatonoto agase icheget che tiendos.

¹⁹ Ak ye kingo kagorik nganaset, kogeer kanamwetab moita ak ureriet: ak kilalyo neregekab Musa, ak kowirta koichato eng’ eunekyik, ak kitui eng’ tulwet kel.

²⁰ Ak kinam kanamwonoto bo moita ne kiga kotany, ak kobeel eng’ ma, ak kong’a koek busio, ak koseerji beek barak, ak kobirji lagokab Israel koee.

²¹ Ak kilenji Musa Aron, Nee ne kiyaun bichu, kot iipchi ichek tengegi o?

²² Ak kile Aron, Amat kolalyo neregekab kiptaiyandennyu: ingen inye bichu, ile kigotokyigei yaitiet.

²³ Amu kilenja, Yaiywech kanamonik, che bendi kondoenech: amu Musa-inito, chito ne kiimutwech kemong’une emetab Misri, ko magingen kit ne kinyor.

²⁴ Ak kialenji, Ingocher chi age tugul tahabu che tinyei, ak kogona: ak kiawirji ma, ak kimong’ moi.

²⁵ Ak ye kingogeer Musa kole kabistoe bik; amu kiigochi Aron kobistoe si koek che kirenyei eng’ kwenutab bunikwak,

²⁶ kotonon anyun Musa eng’ ormarichetab nganaset, ak kole, Ingonyo age tugul oli ne mi komostab Jehovah.

²⁷ Ak kilenji ichek, Kamwa ko u ni Jehovah, Kamuktaindet ne bo Israel, kole, Ingorat chi age tugul rotwennyi bo chok, ak ingwo chi tugul komosi ak komosi kobun kwenutab kurget age agoi kurget age, eng’ nganaset komugul, ak kobar chi tugul ne tupcho, ak kobar chi tugul ne choruennyi, ak chitab kokwennyi.

²⁸ Ak kiyai werikab gab Lawi ko u ng’olyotab Musa: ak kibek bik betunoto che itei elfusiek somok.

²⁹ Ak kile Musa, Otabanjigei Jehovah rani, ee, agot chi tugul ne manamegei ak werinnyi, anan ne tupcho; si kogonok inendet berurto rani.

³⁰ Ak eng’ betut ne kiisubi betunoto, kolenji Musa bik, Kioyai tengekto ne o: katogoste anyun nguno awe ole mi Jehovah: tamangab ayai kagaigaet agobo tengektang’wong’.

³¹ Ak kiweekyigei Musa Jehovah, ak kolenji, Bwa, kiyai bichu tengekto ne o mising’, ak kigoyachigei kanamwet ne bo tahabu.

³² Ago nguno, ngicham inyochi kaat tengektanywa; ak ngo ma u noto asomin ale, iistaa eng’ bukuing’ung’ ne kiisir.

³³ Ak kilenji Jehovah Musa, Aistoi eng’ bukuinnyu age tugul ne kigoyaiywa tengekto.

³⁴ Ui anyun, nguno, indochi bik koba kot koit ole kiamwaun: keero, indoun malaikaiyandennyu: agot nganda u noto, ko eng’ betut ne aruokyini, aruokyini amu tengektanywa.

³⁵ Ak kibir Jehovah bik, amu kiyai kanamwetab moita, ne kiyai Aron.