KOMONG'U 30 - BUKUIT NE TILIL

Kaptisisietab nyamadutik che kibeelei, ak tebetab sugunwet

¹ Ak iyai kapkorosut ole kebeele nyamdutik: yae ketikab shita.

² Ingoek koindanyi kakwautiet agenge ne bo eut, ak tebeesindanyi kakwautiet agenge; ingoaechin koindo ak tebeesindo: ak ingoek koindab tononennyi kakwautik aeng’ che bo eut: namegei kapkorosut ak kuinoikyik koegu kit agenge.

³ Ak iliige tahabu che tililen baragunnyi, ak komoswekyik tugul ak kuinoikyik; ak itany tegeleiywotab tahabu iyieme.

⁴ Ak itany peteinik aeng’ che bo tahabu, ak inde tuguchoto kotaban tegeleiywot kel, eng’ teget ne bo komosi ak ne bo komosi, iyachi komoswek tuwai, si koek ole kiroochi ketik che kiibe.

⁵ Ak iyai ketichato kiibe eng’ ketikab shita, ak iliige tahabu.

⁶ Ak inde kapkorosunoto taitab anget ne ioitos got, ye negite moingetab baornatet, ne mitei taitab keruet ne bo rirenet ne mi baragutab baornatet, ole kituiyechini ak inye.

⁷ Ak beelei Aron nyamdutik che bo tuguk che ng’uu ne anyiny eng’ oloto: karonet age tugul ye chobei taisiek.

⁸ Ak beelei Aron ye inaami taisiek koskoleny, koek nyamdutiet ne kibeelei eng’ taitab Jehovah eng’ ibinwekwok tugul.

⁹ Amobeele oloto nyamdutik che ter, anan tiseiywek che kibeelei anan che bo busiek; amorong’ji kagochinoik alak tugul che kirong’u.

¹⁰ Ak koyai Aron kagaigaet eng’ kuinoikab kaptisisionoto konyil agenge eng’ kenyit age tugul: koyai kagaigaet eng’ korotikab kagochinetab tengekto ne bo kagaigaet konyil agenge eng’ kenyit age tugul eng’ ibinwekwok tugul: tilil noto mising’ eng’ taitab Jehovah.

¹¹ Ak king’alalji Jehovah Musa kolenji,

¹² Ye iit lagokab Israel, ko u che biitu eng’ koitetab bichoto, eng’ yoto anyun kogochi chi tugul Jehovah kit ne itiage sobondanyi, ye iit ichek; si mabiit koroito eng’ kwenunywa, ye iiti ichek.

¹³ Chu che konu ichek, konu chi age tugul kebebertab sekel ko u sekel ne bo ole tilil, ye siirtoi kowendi ole mi che kagiit: (yamei sekel agenge gerahisiek tiptem:) egu kebebertab sekel kagochinet ne bunjin Jehovah.

¹⁴ Igochin chi age tugul Jehovah kagochinet, ne siirtoi kowendi ole mi che kagiit, che bo kenyisiek tiptem ak che siirei choto.

¹⁵ Magonu magoriot che siirei choto, ak maichuchuchi kibananok, konu tugul kebebertab sekel, ye igochin Jehovah kagochinet, si oyai kagaigaet ne bo sobonwekwok.

¹⁶ Ak itaach feda che bo kagaigaet eng’ lagokab Israel, ak igoite kobunji boisietab emaitab tuiyet; si koek kabwatet agobo lagokab Israel eng’ taitab Jehovah, si koyai kagaigaet agobo sobonwekwok.

¹⁷ Ak king’alalji Jehovah Musa kolenji,

¹⁸ Yai tabet agine ne bo sugunwet, ak iyae sugunwet ng’echerennyi, si kiunse: ak inde kwenutab emait ne kituiyechin ak kaptisisiet, ak irong’ji beek.

¹⁹ Si koune Aron ak werikyik eunekwak ak kelyekwak:

²⁰ iunegei ichek ye mandoi emait ne kituiyechin, si mabek; anan ye rikyin kaptisisiet si kobois, si kobeel kagochinet ne kigochin Jehovah, kobunei mat:

²¹ iuni anyun eunekwak ak kelyekwak, si mabek: ak koek ng’atutiet ne bo agoi eng’ ichek, eng’ inendet ak eng’ iyotennyi eng’ ibinwekwak tugul.

²² Ak king’alalji Jehovah Musa kogeny, kolenji,

²³ Inemunote tuguk che miachen kosiir, tuguk che u igomoik, kumiat ne yamei sekelisiek bogol mut, ak kinamon che anyiny che yamei kebebertab choto, agot sekelisiek bogol aeng’ ak konom, ak kalamus che anyiny, sekelisiek bogol aeng’ ak konom,

²⁴ ak che bo kasia che yamei bogol mut, ko u sekel ne bo ole tilil, ak mwaitab emitik ne yamei hin:

²⁵ ak ichob tuguchoto koburugogis koek mwaita ne tilil ne kiilse, ne ng’uu ne anyiny, ne boisietab ng’omotiot ne buruchi tuguk che ng’uu ne anyiny: egu mwaita ne tilil ne kiilse.

²⁶ Ak iil emait ne kituiyechin eng’ mwaita, ak moinget ne bo baornatet,

²⁷ ak meset ak tugukyik tugul, ak keldab tait ak tugukyik, ak kapkorosut ne kibeele nyamdutik,

²⁸ ak kaptisisiet ne kibeele tiseiywek ak tugukyik tugul, ak tabet ak kelunnyi.

²⁹ Ak itaban tuguchoto, si kotililitu mising’: ak kanyol kotililit age tugul ne twaei tuguchoto.

³⁰ Ak iil Aron ak werikyik, ak ianyiny, si koboisiewa eng’ boisietab tiseinatet.

³¹ Ak ing’alalji lagokab Israel ilenji, Egu mwai eng’ ane ne tilil ne kiilse, eng’ ibinwekwok tugul.

³² Magirong’jin bortab chi mwai, amoyai age ne u nito, ne kichobei ko u nito; amu tilil nito, ak egu ne tilil eng’ okwek.

³³ Chi age tugul ne buruchi mwai age tugul koigei nito, anan chi age tugul ne iile mwaiita toondet, king’etoi chichoto eng’ bikyik.

³⁴ Ak kilenji Jehovah Musa, Inemunote tuguk che ng’uu ne anyiny, natap, sekelet, kelbena; tuguk che ng’uu ne anyiny koboto tuguk che nyamdut che tililen: ingoaechin tugul eng’ karogendoet agenge.

³⁵ Ak iyai eng’ choto nyamdutik, tuguk che ng’uu ne anyiny, ne boisietab ng’omnatet ne buruchi tuguk che ng’uu ne anyiny, che kitestoi munyuk, che tililen, che kigitaban:

³⁶ ak itui alak eng’ choto komengegitu, ak inde choto taitab baornatet eng’ emait ne kituiyechin, ole kituiyechini ak inye: egu ne tilil mising’ eng’ okwek.

³⁷ Amat oyachigei nyamdutik alak tugul che kergei ak chuto kichobei: egu ne tilil eng’ inye ne bo Jehovah.

³⁸ Ngo yai chi age tugul alak che u choto, kole kogas ng’uunennyi, king’etoi chichoto eng’ bikyik.