KOMONG'U 3 - BUKUIT NE TILIL

Keguurei Musa kosor Israel

¹ Ak kiiyagi Musa akwetab kechirek che bo kabyugoinnyi Jetro, tisiindetab Midian: ak kikweri akwet koba ong’atet komosin, ak kiit tulwetab Kamuktaindet, ne kiguure Horeb.

² Ak kimong’ji inendet malaikaiyatab Jehovah eng’ mat ne lalei ne kimong’une kwenutab ketit ne samum: ak kogeer, ogeero, kima lal ketoto kilale mat.

³ Ak kile Musa, Kawe ageer kwong’utioni te ni, katepto ano si malal ketit.

⁴ Ak ye kingogeer Jehovah kole, kawa kogeer, koguur inendet Kamuktaindet eng’ kwenutab ketit, kole, Musa, Musa. Ak kile, Ami yu.

⁵ Ak kilenji, Amerigu yu: icheru kweoniguk eng’ kelyeguk amu tilil yoto itonone.

⁶ Ak kilenji kogeny, A Kamuktaindet ne bo kwandang’ung’, a Kamuktaindet ne bo Abraham, a Kamuktaindet ne bo Isak, a Kamuktaindet ne bo Jakobo. Ak kiuny Musa togennyi; amu kiiywei kogeer Kamuktaindet.

⁷ Ak kilenji Jehovah, Koageer iman nyalilwogikab bikyuk che mi Misri, ak koagas rirekwak amu kayagik che usausi; ak angen ng’wanindanywa;

⁸ kachoruge anyun si kobiit asor ichek eng’ eunekab Misrik, ak amutu ichek kotogos komong’ eng’ emonoto koba emet ne mie ne baraa, emet ne nyiitat chego ak kumik; oldab Kananik, Hitik, Amorik, Perisik, Hibik, ak Jebusik.

⁹ Keero, kagobwanja rirekab lagokab Israel; ak koageer kanyalilet ne inyalili ichek Misrik.

¹⁰ Nyo anyun, si ayokten iwe gab Parao, si kobiit imoong’u bikyuk lagokab Israel eng’ Misri.

¹¹ Ak kilenji Musa Kamuktaindet, A ng’o, ne tos amuch awo gab Parao, ak amoong’u lagokab Israel eng’ Misri?

¹² Ak kile Jehovah, Amu ami koboten iman; ni kaborunet ne inae ile kayokten: ye kaimoong’u bik eng’ Misri, oboisiechi Kamuktaindet eng’ tulwoni.

¹³ Ak kilenji Musa Kamuktaindet, Ye ait ole mi lagokab Israel, ak alenji, Kagoyokwa Kamuktaindet ne bo kwanisiekwok anyonjok; ak ngo teebena kole, Kiguure nee kainennyi? Alenjini nee bichoto?

¹⁴ Ak kilenji Kamuktaindet Musa, ANENDET NE AMI: ak kile, Imwachini lagokab Israel ng’olyondoni, ilenjini, Kagoyokwa anyonjok inendet ne keguure AMI.

¹⁵ Ak kilenji Kamuktaindet Musa kogeny, Imwachini lagokab Israel ng’olyondoni ilenjini, Kagoyokwa anyonjok Jehovah Kamuktaindet ne bo kwanisiekwok, Kamuktaindet ne bo Abraham, Kamuktaindet ne bo Isak, Kamuktaindet ne bo Jakobo; kainennyu nito agoi koigeny, ak kabwatennyu nito agoi ibinwek tugul.

¹⁶ Ui, iyum boisiekab Israel, ak ilenji ichek, Kigomong’ja Jehovah, Kamuktaindet ne bo kwanisiekwok, Kamuktaindet ne bo Abraham, Isak, ak Jakobo, kolenja, Kaanyonjok iman, ak kaageer noto ne kiyaiywok eng’ Misri:

¹⁷ ak kiamwa ale, Amutwok otogosu omong’une nyalildab Misri, agoi oit emetab Kananik, Hitik, Amorik, Perisik, Hibik, ak Jebusik, emet ne nyiitat chego ak kumik.

¹⁸ Ak tun kasei it kuting’ung’: ak iwe gab laitoriatab Misri, inye ak boisiekab Israel, ak olenji, Kogetuiye ak Jehovah, Kamuktaindet ne bo Hebranik: ara anyun, kisain kele, undech kebe bandab betusiek somok eng’ ong’atet, si kobiit keeng’ji Jehovah Kamuktaindennyo tiseiywot.

¹⁹ Ak angen ale machamwok laitoriatab Misri obe, kobate eng’ eut ne kim.

²⁰ Ak achuul eunnyu abire Misrik boisionikyuk tugul che kikwong’e che amache ayai eng’ kwenunywa: ak ye ibata choto koundak obe.

²¹ Ak agochini bichu konyor chamet eng’ taitab Misrik: si ye obe, ko matun obe buch:

²² ak ingosom kwondo age tugul chitab kokwennyi, ak eng’ inendet ne tebe gonnyi, tuguk che bo feda, ak tuguk che bo tahabu, ak ngoroik: si olaakyi werikwok, ak tibikwok; ak onyaban anyun tugukab Misrik.