KOMONG'U 29 - BUKUIT NE TILIL

Kaanyinyetab tiseinatet

¹ Ni kit ne iyachini ichek ianyinyi, si kobiit koboisiewa eng’ boisietab tiseinatet: nam kirgit agenge ne neran ak mengichik aeng’ che libwoben,

² koboto makatinik che ma kinde mermerek, ak makatinik che mengechen che kigikwang’da mwaiita, ak makatinik che terteren che kigiile mwaita: ichobe busiek che tambulul che bo nganok.

³ Ak inde aterut agenge, ak ibune aterunoto, koboto kirgit ak mengichichoto aeng’.

⁴ Ak imutu Aron ak werikyik kobwa kurgetab emait ne kituiyechin, ak iun ichek eng’ beek.

⁵ Ak inam ngoroik, ak ilaakyi Aron ngoriet ne koi, ak ngoriet ne bo epod, ak epod, ak ngorietab teget, ak igermen eng’ birenet ne bo epod, ne kiginab eng’ ng’omnatet:

⁶ ak igerjine metinnyi nariet, ak iratyi kioto tilil ne bo tahabu, ne kergei ak eurto, baragutab nariet.

⁷ Yeityo inam mwaita ne kiilse, ak irong’ji metinnyi ak iil inendet.

⁸ Ak imutu werikyik agichek, ak ilaakyi ngoroik che koen.

⁹ Ak igermen eng’ birenaik, Aron ak werikyik, ak igerji metowekwak eng’ chepkuloik che mengechen: ak konam boisionoto bo tiseinatet eng’ ng’atutiet ne bo agoi: ak itororji Aron ak werikyik boisionoto bo tililindo.

¹⁰ Ak igetu kirgit konyo taitab emait ne kituiyechin: ak kogonoor Aron ak werikyik eunekwak metitab kirgoto.

¹¹ Yeityo ieny kirgoto eng’ taitab Jehovah, eng’ kurgetab emait ne kituiyechin.

¹² Ak itaach korotikab kirgoto, ak iile korotik kuinoikab kaptisisiet eng’ morneng’ung’: ak irong’ji korotichoto tugul kaptisisiet kel.

¹³ Ak ibut mwanik tugul che kiilaach moet, ak kwambeleliet ne tuchei koet, ak soromok tuwai, ak mwanik che mi soromochoto, ak ibeel choto eng’ kaptisisiet.

¹⁴ Ago beel eng’ mat banyekab kirgoto, ak muitanyi, ak eiyandennyi, eng’ sang’utab nganaset: noto kagochinet ne bo tengekto.

¹⁵ Ak inam mengit agenge agine: ak kogonoor Aron ak werikyik eunekwak metitab mengoto.

¹⁶ Ak ieny mengit, ak itaach korotikyik, ak iisote kaptisisiet.

¹⁷ Ak itonaton banyekab mengoto, ak iun tugukab ke tugul, ak kelyekyik, ak ituiye ak banyechato kagetonaton, koboto metinnyi.

¹⁸ Ak ibeel mengoto komugul eng’ kaptisisiet: nito ko kagochinet ne kibeelei ne bo Jehovah: nyamdutiet ne anyiny, kagochinet ne kigochin Jehovah kobunei mat.

¹⁹ Ak inam mengit ne bo aeng’; si kogonoor Aron ak werikyik eunekwak metitab mengoto.

²⁰ Yeityo anyun ieny mengoto, ak itaach korotikyik, ak iile walitab itit ne bo tai ne bo Aron, ak eng’ walisiekab itik che bo tai che bo werikyik, ak eng’ morik che eechen che bo eunekwak che bo tai, ak eng’ morik che eechen che bo kelyekwak che bo tai, ak iisote korotichoto kaptisisiet komoswek tugul.

²¹ Ak inam korotik che mi kaptisisiet barak, ak mwaita ne kiilse, ak iise Aron, ak ngoroikyik, ak werikyik, ak ngoroikab werikyik che mi koboto inendet: ak kitaban inendet, ak ngoroikyik, ak werikyik, ak ngoroikab werikyik che mi koboto inendet.

²² Ak inemu mwanikab mengit, ak saruriet, ak mwanik che kiilaach moet, ak kwambeleliet ne bo koet, ak soromok tuwai, koboto sunetikwak, ak kubesto ne bo tai; amu nito ko mengit ne bo boisietab katabanet:

²³ ak makatiat agenge komugul, ak makatiat ne ming’in ne kagiile mwaita, ak makatiat agenge ne terter, che mi aterut ole mi makatinik che ma kinde mermerek, ne mi taitab Jehovah:

²⁴ ak inde choto tugul eunekab Aron, ak eunekab werikyik; ak iongoi inye koek kagochinet ne kiongoi eng’ taitab Jehovah.

²⁵ Icheru tuguchoto eng’ eunekwak, ak ibeel eng’ kaptisisiet eng’ baragutab kagochinet ne kibeelei, koek nyamdutiet ne anyiny eng’ taitab Jehovah: noto kagochinet ne kigochin Jehovah kobunei mat.

²⁶ Ak iib tagatet ne bo mengitab boisiet ne bo katabanet ne bo Aron, ak iongoi koek kagochinet ne kiongoi eng’ taitab Jehovah si koek noto kebebertang’ung’.

²⁷ Ak itaban tagatet ne bo kagochinet ne kiongoi, ak kubesto ne bo kagochinet ne kinamjin barak, ne kiongoi, ak ne kinamjin barak, che bo mengoto bo boisietab katabanet, agot noto bo Aron, ak ne bo werikyik:

²⁸ ak kobunji choto Aron ak werikyik koek ng’atutiet ne bo agoi eng’ lagokab Israel: amu kagochinet ne kinamjin barak: ak koek noto kagochinet ne kinamjin barak ne bunu lagokab Israel eng’ tiseiywekab kagochinoikwak che bo kalyet, agot kagochinenywa ne kinamjin barak ne bo Jehovah.

²⁹ Ak tun bunjin werikyik ngoroichoto itabanotin che bo Aron, ilaachi si kiili, ak kinde boisionoto tilil.

³⁰ Ak tun ilaachi ngoroichoto betusiek tisab, weroto ne tun namjin inendet boisietab tiseinatet, ye mandoi emait ne kituiyechin si koboisiei eng’ ole tilil.

³¹ Ak inam mengit ne bo boisietab katabanet, si iyo banyekyik eng’ ole kigitilil.

³² Ak koam Aron ak werikyik banyekab mengoto, ak makatinik che mi aterut, eng’ kurgetab emait ne kituiyechin.

³³ Ak koam tuguchoto che kiyae kagaigaet, ak kinde boisietab tililindo, ak kitaban ichek: ago amat koam toondet, amu tililen tuguchoto.

³⁴ Ak ngo ng’et banyek che bo noto kigitabanji boisietab katabanet, anan eng’ makatinik, ak ngo tebi kot koeech, ibeel anyun eng’ ma tugul che kong’et: amat keam, amu tililen.

³⁵ Yachi Aron anyun ko u noto, ak werikyik ko u tugul che kang’atin: inde ichek boisionoto tilil eng’ betusiek tisab.

³⁶ Ak igoitoi inye betut age tugul kirgit ne neran ne bo kagochinet ne bo tengekto kobunji kagaigaet: ak ianyiny kaptisisiet, ye iyachini kagaigaet agobo inendet; ak iil, itabani.

³⁷ Iyae kagaigaet agobo kaptisisiet eng’ betusiek tisab, ak itilil: si kotililit kaptisisiet mising’; ak kanyol kotililit kiy age tugul ne twaei kaptisisiet.

³⁸ Chu che igoitoi eng’ kaptisisio; igoitoi betut age tugul arek aeng’ che bo kechir che masiirei kenyit agenge, koek kit ne bo agoi.

³⁹ Igoite aruet age karon; ak igoite aruet ne bo aeng’ koskoleny:

⁴⁰ ak itesyi aruet age kebeberta agenge eng’ taman ne bo epah ne bo busiek che tambulul che kagiburukto kebeberta agenge eng’ ang’wan ne bo hin ne bo mwaita ne biitune tuisiet, ak kebeberta agenge eng’ ang’wan ne bo hin ne bo divaik koek kagochinet ne kirong’u.

⁴¹ Ak igoite aruet age koskoleny, ak iyachi ko u kagochinetab busiek ne bo karon, ak ko u kagochinennyi ne kirong’u, koek nyamdutiet ne anyiny, kagochinet ne kigochin Jehovah ne bunei mat.

⁴² Egu noto kagochinet ne kibeelei ne bo kotugul eng’ ibinwekwok tugul eng’ kurgetab emait ne kituiyechin eng’ taitab Jehovah: eng’ ole kituiyechini ak inye, si ang’alalun eng’ oloto.

⁴³ Ak kituiyechini yoto ak lagokab Israel; ak itilili torornatennyu yoto.

⁴⁴ Ak atilil emait ne kituiyechin, ak kaptisisiet: atabani Aron ak werikyik agichek, si koboisiewa eng’ boisietab tiseinatet.

⁴⁵ Ak ameny kwenutab lagokab Israel, ak aegu Kamuktaindenywa.

⁴⁶ Ak konai kole a Jehovah Kamuktaindenywa, ne kiamoong’u eng’ emetab Misri, si kobiit ameny kwenunywa: A Jehovah Kamuktaindenywa.