KOMONG'U 28 - BUKUIT NE TILIL

Ngoroikab tiseinatet che bo Aron ak werikyik

¹ Ak imutu Aron ng’etab komet konyo ole ami, koboto werikyik, kobwa eng’ ole mi lagokab Israel, si kobiit koboisiewa eng’ boisietab tiseinatet, icheget ko Aron, Nadab, ak Abiu, Eleasar, ak Itamar, choto werikab Aron.

² Ak inapchi Aron ng’etab komet ngoroik che itabanotin che bo teegisto ak kororonindo.

³ Ak ing’alalji tugul che tinyei muguleldo ne bo kaguiyet, che kianyiit tamirmirietab ng’omnatet, si konab ngoroik che bo Aron si kobiit kitaban inendet koboisiewa eng’ boisietab tiseinatet.

⁴ Chu ngoroik che nabei ichek: ngoriet ne kilaakyin teget, ak epod, ak ngoriet ne koi, ak age ne koi mising’ ne kigilelesonji, ak nariet, ak birenet; ak konapchi Aron ng’etab komet ak werikyik ngoroik che itabanotin, si koboisiewa eng’ boisietab tiseinatet.

⁵ Ak ingoib ichek tahabu, ak che tuuen ne nyalil, ak che arusen ne birir, ak che biriren, ak katanit ne kararan ne kigila.

⁶ Ak ingoyai ichek epok eng’ tahabu, ak eng’ che tuuen ne nyalil ak eng’ che arusen ne birir, ak eng’ che biriren, ak eng’ katanit ne kararan ne kigila, boisietab nabindet ne ng’om.

⁷ Tinyei eng’ tigigoik kebeberwek che ituitos ngoroichoto tuwai koek ngoriet agenge.

⁸ Ak kiginab birenet eng’ ng’omnatet kituiyo kogergeit ak epok si kerategei; kinabe tahabu, ak che tuuen ne nyalil, ak che arusen ne birir, ak che biriren, ak katanit ne kararan ne kigila.

⁹ Nam koik aeng’ che kiguure soam, ak iwachi eng’ siret kainaikab lagokab Israel;

¹⁰ sirji koita age kainaik lo, ak kainaik lo che kang’et, isirji koita age, ko u ortinwekwak.

¹¹ Sirji koichato aeng’ kainaikab lagokab Israel, eng’ boisietab waindetab koik, ko u waet ne bo ng’okset, ak inde koichato tahabu che kigitogul konam koik.

¹² Ak inde koichato aeng’ tigigoikab epod si koek koichato kabwatet agobo lagokab Israel: si koibot Aron kainaikwak eng’ tigigoikyik aeng’, eng’ taitab Jehovah, koek kabwatet.

¹³ Ak iyai tuguk che togulotin eng’ tahabu:

¹⁴ ak sirimoik aeng’ che bo tahabu che tililen; ilet koigei rogoonik: ak iratyi sirimwechoto kagilet tuguchoto togulotin.

¹⁵ Ak inab ngorionoto bo teget ne bo kiruoget, boisietab nabindet ne ng’om; inabe kogergeit ak epok; eng’ tahabu, ak eng’ ne tuui ne nyalil, ak eng’ ne arus ne birir, ak eng’ ne birir, ak eng’ katanit ne kararan ne kigila. Inabe ko u noto.

¹⁶ Ingoaechin koindo ak tebeesindo ko kagiliich: ingoek kakwautiennyi olobo inchisiek sogol eng’ koindo ak eng’ tebeesindo.

¹⁷ Ak inde ngorionoto koik che tetotin eng’ ortinwekwak ang’wan: inde oret ne bo tai sardio, tapasio ak bareqet;

¹⁸ ak inde oret ne bo aeng’ sumaragdo, sapire ak yaholom;

¹⁹ ak inde oret ne bo somok huakinto, sebu ak ametusto;

²⁰ ak inde oret ne bo ang’wan berulo, soam, ak jasipi: kitetyin koichato kelongonikab tahabu.

²¹ Egu koichato taman ak aeng’ ko u kainaikab lagokab Israel; bendi ko u kainaikwak; ko u ye kiwaei ng’okset, tinyei koita age tugul kainennyi, bee ortinwek taman ak aeng’.

²² Ak inapchi ngorionoto bo teget sirimwek che u rogoonik che bo tahabu che tililen, che kigilet.

²³ Ak inapchi ngorionoto bo teget peteinik aeng’ che bo tahabu, ak inde peteinichoto aeng’ tabanwekab luukwek aeng’ che bo ngorionoto bo teget.

²⁴ Ak inde sirimwechoto aeng’ bo tahabu che kigilet, eng’ peteinik aeng’ che mi tabanwek aeng’ che bo ngorionoto bo teget.

²⁵ Ak inam komoswechun alak aeng’ che bo sirimwechoto aeng’ kigilet, irooch kelongonik aeng’ che kigitogul, yeityo ituiye ak epod eng’ komostab tigigoik ole tabanu tai.

²⁶ Ak ichob peteinik aeng’ che bo tahabu, yeityo inapchji ngorionoto bo teget eng’ komostab luukwek aeng’, eng’ tabanwekyik, che tabanu komostab orit eng’ epod kel.

²⁷ Ak ichob peteinik aeng’ che bo tahabu, inapchi tuguchoto tigigoikab ngorionoto kiguure epod eng’ komostab kapkelyen ole tabanu tai, eng’ ole negite ye kigituiye, eng’ baragutab birenonoto bo epod, ne kiginab eng’ ng’omnatet.

²⁸ Ak kogiich ichek ngorietab teget eng’ peteinikyik, koratyin ak peteinikab epod, korate rogoet ne tuui ne nyalil, si kotebe baragutab birenet ne bo epod, ne kigila eng’ ng’omnatet, si mabesio ngorietab teget ak epod;

²⁹ si koibei Aron kainaikab lagokab Israel eng’ ngorionoto bo teget ne bo kiruoget eng’ muguleldanyi, ye mandoi ole tilil, koek kabwatet eng’ taitab Jehovah kotugul.

³⁰ Ak inde ngorionoto bo teget ne bo kiruoget Urim ak Tumim; ak kotebe choto muguleldab Aron, ye mandoi taitab Jehovah; ak koibei Aron kiruogetab lagokab Israel eng’ muguleldanyi eng’ taitab Jehovah kotugul.

³¹ Ak inab ngoriet ne kiroochigei, ne bo epod, ne kigisal konyalilit ne ais kityo.

³² Ak inab ole kirooktoi metit eng’ kwenunnyi: ak igurman kaatit ko u boisietab laindet, ko u ye kichobei ngoroikab luget, si magerer.

³³ Ak inapchi ngorionoto tabandab kel logoek che tuuen ne nyalil, ak che arusen ne birir, ak che biriren, koyiem tabandab kapkelyen tugul; ak itilate chepchingilokab tahabu kot kotuiyo:

³⁴ indoi twolyot ne bo tahabu, yeityo inde logoiyandanato korupgei, ak itilate ko u noto korubatgei agoi, eng’ tabandab ngoriet komugul.

³⁵ Ak ingolaach Aron si koboisie: ak kegas cheetab chepchingilichoto ye wendi ole tilil eng’ taitab Jehovah, ak ye mong’u, si mame.

³⁶ Ak itany tahabu che tililen kolebelitu, kogergeit ek eurto, ak iwai eng’ baragunywa waet ne u ne bo ng’okset, ile, TILIL ENG’ JEHOVAH.

³⁷ Ak iratyi rogoet ne tuui ne nyalil, si kotebe nariet chepkulet; ak kotebe nariet ole bo togoch.

³⁸ Ak kotebe togetab Aron, ak koibot Aron tengektab tuguk che tililen, che itabani lagokab Israel eng’ kagochinoikwak tugul che tililen; ak kotebe noto togetab Aron kotugul, si kobiit kochamogis eng’ taitab Jehovah.

³⁹ Ak inab ngoriet ne koi eng’ katanit ne kararan, ak inab nariet ne bo katanit ne kararan, ak inab birenet, boisietab chito ne nabei kondoi lelesta.

⁴⁰ Ak inapchi werikab Aron ngoroik che koen, ak birenaik, ak chepkuloik che mengechen che bo teegisto ak kororindo.

⁴¹ Ak ilaakyi ng’etab komet Aron tuguchoto, ak werikyik agichek; ak iil, ak itororji ichek boisietab tililindo, itaban, si kobiit koboisiewa eng’ boisietab tiseinatet.

⁴² Ak inapchi sirualisiek che bo katanit si kobiit kotuge ach ngorinywa; che ng’eete suet agoi kubesoik.

⁴³ Ak kolaach ichek tuguchoto, Aron ak werikyik, si kobendi emaitab tuiyet, anan ye rikyin kapkorosut si kobiit kobois eng’ ole tilil si manam ichek tengekto, ak kobek: egu nito ng’atutiet eng’ inendet ak eng’ iyotennyi ne biitu let.