KOMONG'U 27 - BUKUIT NE TILIL

Kapatisisiet: seremutab Got

¹ Ak iyai kaptisisiet eng’ ketikab shita, ingoek koindo kakwautik mut che bo eut, ak tebeesindo kakwautik mut che bo eut; aechin komoswek tugul ang’wanu che bo kaptisisionoto: ak ingoek koindo ne bo tononennyi kakwautik somok che bo eut.

² Ak iyai isikyi kuinoikyik eng’ luukwekyik ang’wan: kitanyi kuinoichoto konomnyo ak kaptisisiet koek kiy agenge: ak iliige sugunwet.

³ Ak itany terenikyik che kiibe orek, ak kechigosiekyik che eechen, ak tabokyik che mengechen ak karik che sogotin, ak tabokyik alak che kiibe mat: itany tugukyik tugul eng’ sugunonik:

⁴ ak iyachi sugunonik che kiregeri, ak inde sugunonichoto kagireger peteinik ang’wan eng’ luukwekyik ang’wan.

⁵ Ak inde karnanato kagireger kapkelyenutab mireiywot ne yiemei kaptisisiet komosta ole bo kel, si komuurmuur kaptisisiet.

⁶ Ak iyachi kaptisisiet ketik che kiibe, choto ko ketikab shita, ak iliige sugunwet.

⁷ Ak kirooktoi ketichato peteinik, tebe ketichato komoswek aeng’ che bo kaptisisiet, si kobiit keibe.

⁸ Itete baoinik koek moinget eng’ kaptisisionoto: ingoyai bik ko u ye kogiborun eng’ tulwet.

⁹ Ak iyai seremut ne ng’otat ne bo got: ole tokyingei murot ne bo tai, kindoi ngoroik che u emait ne bo katanit ne kararan ne kigila ne yamei kakwautik bogol agenge che bo eut, ko u koindab seremut eng’ komosta agenge:

¹⁰ ak egu tiptem lumeiywek che bo sugunonik che keratyin ngoroichoto, ak kong’ikwak tiptem che bo sugunonik, che tononie; bo feda ireusiekab lumeiywek.

¹¹ Ak u noto agine eng’ komostab murot ne bo katam, eng’ koindo, king’ote ngoroik che u emait che yamei kakwautik bogol agenge che bo eut, ak egu tiptem lumeiywekwak che bo sugunonik, ak kong’ikwak tiptem che bo sugunonik, che tononie; bo feda ireusiekab lumeiywek koboto rateiywekwak che kituiye.

¹² Ak eng’ tebeesindab seremut eng’ komostab cherongo, ing’ote ngoroik che u emait, che yamei kakwautik konom che bo eut: egu taman lumeiywekwak, ak kong’ikwak taman che tononie.

¹³ Ak ingoek kakwautik konom che bo eut tebeesindo ne bo seremut ne tokyingei kong’asis.

¹⁴ Ak ingoek kakwautik taman ak mut che bo eut ngoroik che u emait che bo komosta age: ak lumeiywekwak somok ak kong’ikwak somok che tononie.

¹⁵ Ak ingoek che bo komosta age ngoroik che yamei kakwautik taman ak mut che bo eut; ak lumeiywekwak somok, ak kong’ikwak somok che tononie.

¹⁶ Ak ingoek ngoroik che bo ormarichet ne bo seremut kakwautik tiptem che bo eut, che tuuen ne nyalil, ak che arusen ne birir, ak che biriren, ak katanit ne kararan ne kigila, boisietab chito ne nabei kondoi lelesta: ak ingoek lumeiywek ang’wan, ak kong’ikwak ang’wan che tononie.

¹⁷ Bo feda rateiywek che keratote lumeiywek tugul che yiemei seremut; bo feda ireusiekwak, ak bo sugunonik kong’ikwak che tononie.

¹⁸ Ingoek koindab seremut kakwautik bogol che bo eut, ak ingoek tebeesindo kakwautik konom komosta age tugul, ak ingoek tononet kakwautik mut che bo eut, che bo katanit ne kararan ne kigila, ak ingobunji sugunonik kong’ik che tononie.

¹⁹ Ingobunji sugunonik tuguk tugul che keboisie eng’ boisietab got, ak tigongenikyik tugul, ak tigongenik tugul che bo seremut.

²⁰ Ak ing’at lagokab Israel, koibun mwaita ne tilil ne bo emitik ne kigitui si kobunji kit ne ikweng’sei, si kobiit kolal tait kotugul.

²¹ Ingochobei Aron ak werikyik lapkeiyonoto eng’ taitab Jehovah kong’eete lagat agoi karon, eng’ emait ne kituiyechin eng’ ole sib kemong’jin eng’ anget ne iyoitos got, ne mi tai eng’ baornatet: egu ng’atutiet ne bo koigeny eng’ ibinwekwak tugul agobo lagokab Israel.