KOMONG'U 26 - BUKUIT NE TILIL

Gotab Jehovah

¹ Teech got anyun, si isikyi ngoroik taman; inabe katanit ne kararan ne kigila, ak che tuuen ne nyalil, koboto kerubisiek che boisietab laindet ne ng’om.

² Ingoek koindab ngoriet age tugul kakwautik tiptem ak sisiit che bo eut, ak ingoek tebeesindab ngoriet age tugul kakwautik ang’wan che bo eut: ingoaechin ngoroik tugul.

³ Kiropchindos ngoroik mut; ak keropchin ngoroik alak mut agichek.

⁴ Ak iyachi belelutik che tuuen ne nyalil eng’ tabandab ngoriet age, eng’ ole kurmanat, eng’ ole kagituiyechi; ak iyai ko u noto eng’ tabandab ngoriet age ne tabanu barak eng’ ole kagituiye ne bo aeng’.

⁵ Napchi ngoriet age belelutik konom, ak inapchi belelutik konom eng’ tabandab ngoriet ne bo aeng’, eng’ ole kagituiyechi; tokyindos belelutik tugul.

⁶ Ak iyai karik konom che bo tahabu che kiname ngoroik, ak ituiye ngoroik karichato: ak koek agenge got.

⁷ Ak inab ngoroikab ng’ororek koek emait ne kituge got: napchi taman ak agenge.

⁸ Ingoek koindab ngoriet age tugul kakwautik sosom che bo eut, ak ingoek tebeesindab ngoriet age tugul kakwautik ang’wan che bo eut, ak ingoaechin ngoroichoto tugul tamanu ak agenge.

⁹ Ak ituiye ngoroik mut koek agenge, ak ituiye alak lo koek agenge agichek, ak iliich ngorionoto bo lo eng’ ole kimandoe eng’ emait.

¹⁰ Ak iyachi belelutik konom eng’ tabandab ngoriet age ne tabanu barak eng’ ole kituiyechin, ak iyachi belelutik konom eng’ tabandab ngoriet ne bo aeng’ eng’ ole kituiyechin.

¹¹ Ak iyai karik konom che bo sugunonik, ak irooch karichato belelutik, ak ituiye emait koek agenge.

¹² Ak ne kang’etune ngoroikab emait, kebeberta ne kang’et, kosonginine batetab got.

¹³ Ak kakwautiet agenge ne bo eut ne kang’et eng’ komosta age kogeny, ne kang’etune koindab ngoroikab emait, ingosonginine komosi ak komosi ne bo got, si kobiit kotuch.

¹⁴ Ak inab ngoroikab mengichik che kigisal kobiriritu si ketuge emait, ak inab ngoroikab mengichikab beek kotabon barak.

¹⁵ Ak iyai baoinik che bo ketikab shita, che tonondos, kobunji got.

¹⁶ Ingoek kakwautik taman che bo eut koindab baoiyot, ak ingoek tebeesindab baoiyot age tugul kakwautiet ne bo eut agenge ak kebeber.

¹⁷ Iyae baoiyot age tugul konyor ng’elyebwek aeng’ che kiituiyogei; yai ko u noto eng’ baoinik tugul che bo got.

¹⁸ Yai baoinikab got che itei tiptem; inde choto ole tokyingei murot ne bo tai.

¹⁹ Ak ibarbar feda isikyi kong’ik artam, si kotaban kapkelyenutab baoinichoto tiptem; chutei ng’elyebwek aeng’u che bo baoiyot agenge, kong’ik aeng’ che mi kapkelyen; chutei ko u noto ng’elyebwek aeng’u che bo baoiyot age, kong’ik aeng’ che mi kapkelyen:

²⁰ ak che bo komosta age ne bo got, ole tokyingei murot ne bo katam, inde baoinik tiptem:

²¹ ak kong’ikwak artam che bo feda, kong’ik aeng’ eng’ kapkelyenutab baoiyot agenge, ak kong’ik aeng’ eng’ kapkelyenutab baoiyot age.

²² Yai anyun baoinik lo kobunji got batai ole tokyingei cherongo.

²³ Ak iyai baoinik aeng’ kobunji luukwek che bo go che mi batai.

²⁴ Ak kitwakyindos aeng’ koboch ng’ony agoi barak, ak kituiye tugul peteit: kiyaei ko u noto eng’ tuwai; ak inde choto luukwek aeng’.

²⁵ Ak egu choto baoinik sisiit, ak kong’ikwak che bo feda taman ak lo; kong’ik aeng’ eng’ kapkelyenutab baoiyot agenge, ak kong’ik aeng’ eng’ kapkelyenutab baoiyot age.

²⁶ Ak iyai eng’ shita ketik che u rateiywek; iyae mut che bo baoinik che bo komosta agenge ne bo got,

²⁷ ak rateiywek mut che bo baoinik che bo komosta age ne bo got, ak rateiywek mut che bo baoinik che bo komosta age ne bo got ne mi batai, ole tokyingei cherongo.

²⁸ Ak ingobochit tabanda age agoi tabanda age rateiywot ne bo kwen ne muroksei, ne mi kwenutab baoinichoto.

²⁹ Ak iliige tahabu baoinik, ak iyai peteinikwak che bo tahabu koek choto ole kirooktoi rateiywek: ak iliige rateiywechoto tahabu.

³⁰ Ak ingotonon goyoto ko u ye kiging’at ak kiborun eng’ tulwet.

³¹ Ak iyai anget ne kigioiye got ne tuui ne nyalil, ak ne arus ne birir, ak ne birir, ak katanit ne kararan ne kigila: kinapchin anganato kerubisiek che boisietab laindet ne ng’om:

³² ak isonginine lumeiywek ang’wan che bo ketikab shita che kiliige tahabu, bo tahabu ireusiekwak, tonone lumeiywechoto kong’ik ang’wan che bo feda che kigibal.

³³ Ak isonginine anganato kapkelyenutab karik che kiname ngoroik ak iibu moinget ne bo baornatet inde got ne bo orit ne tilate anget: si kopcheiywok anganato ole tilil ak ole tilil mising’.

³⁴ Ak inde keruet ne bo rirenet moinget ne bo baornatet eng’ ole tilil mising’.

³⁵ Ak inde meset got ne sib kemong’jin, anget ne kigioiye got, ak inde keldab tait kotoorjin ak meset eng’ komostab murot ne bo tai eng’ got: ak inde meset ole tokyingei murot ne bo katam.

³⁶ Ak inab ngorioet ne kigere kurgetab emait, ne tuui ne nyalil, ak ne arus ne birir, ak ne birir, ak katanit ne kararan ne kigila, boisietab chito ne nabei kondoi lelesta.

³⁷ Ak iyachi ngorionoto lumeiywek mut che bo ketikab shita, ak iliige tahabu, ak bunjin tahabu ireusiekwak: ak itang’ji eng’ sugunwet kong’ik mut che kilolonda.