KOMONG'U 25 - BUKUIT NE TILIL

Gotab Jehovah ak tuguk che mi orit

¹ Ak king’alalji Jehovah Musa kolenji,

² Mwachi lagokab Israel koibwa konunoik: name konunoichoto chi age tugul ne ichirjini muguleldanyi kogon konunoikyuk.

³ Chu konunoik che itaache eng’ ichek; tahabu, ak feda, ak sugunonik;

⁴ ak angok che tuuen ne nyalil, ak che arusen ne birir, ak che biriren, ak katanit ne kararan, ak che kiyae kororikab ng’ororek,

⁵ ak magatokab mengichik che kigisal kobiriritu, ak magatokab mengichikab beek, ak ketik che u chebitoik che kiguure shita;

⁶ mwaitab kit ne ikweng’sei, ak tuguk che ng’uu ne anyiny che bo mwaita ne kiilegei, ak che bo nyamdutik che kibeelei;

⁷ koik che kiguure soam, ak koik che kitetyin epok, ak ngoriet age ne kigilaakyin teget.

⁸ Ak ingoteekwa ole tilil; si ameny kwenunywa.

⁹ Oyai tugul ko u ye aborun, ole teptoi got, ole teptoi tuguk tugul che kindoi orit.

¹⁰ Ak ingoyai moinget eng’ ketik che kiguure shita: ingoek koindanyi kakwautik che bo eut aeng’ ak kebeber; ak ingoek tebeesindanyi kakwautiet ne bo eut agenge ak kebeber; ak ingoek koindab tononennyi kakwautiet ne bo eut agenge ak kebeber.

¹¹ Ak iliige tahabu che tililen, iliige orit ak barak, ak itegele tegeleiywotab tahabu iyieme baragunnyi tugul.

¹² Ak itang’ji peteinik ang’wan che bo tahabu, ak inde peteinichoto luita age tugul ne bo moinget ole bo kel; indoi aeng’ komosta age ak aeng’ eng’ komosta age.

¹³ Ak iyai ketik che kiname che bo shita, ak iliige tahabu.

¹⁴ Ak irookte ketichoto peteinik, che mi tabanwekab moinget, che kitandane moingonoto.

¹⁵ Tebe ketichato peteinikab moinget; magicheru.

¹⁶ Ak inde moingonoto orit baornatet ne agonin.

¹⁷ Ak iyai keruennyi ne bo rirenet ne bo tahabu che tililen: ingoek koindanyi kakwautik che bo eut aeng’ ak kebeber, ak ingoek tebeesindanyi kakwautiet ne bo eut agenge ak kebeber.

¹⁸ Ak iyai kerubisiek aeng’ eng’ tahabu, ak iyae tahabu che kitanyi, eng’ tabanwek aeng’ che bo keruetab rirenet.

¹⁹ Ak iyai kerubit age kotebe tabanda age, inde age kotaban eng’ komosta age: kinamdos keruet ne bo rirenet, ak kerubit eng’ tabanda age tugul.

²⁰ Ak koiito kerubisiek kebebaikwak koba barak, kouure kebebaikwak keruetab rirenet, ak kotoorjin togochikwak; ing’ururi kerubisiechoto keruetab rirenet.

²¹ Ak inde keruanato bo rirenet baragutab moinget; ak inde moinget orit baornatet ne tun agonin.

²² Ak ketuiye ak inye eng’ oloto, ak keng’alal ak inye ko katebe keruanato bo rirenet barak, ami kwenutab kerubisiek aeng’ che mi baragutab moingetab baornatet, amwaun tuguk tugul che ang’atin agobo lagokab Israel.

²³ Ak iyai meset eng’ ketikab shita: ingoek koindanyi kakwautik aeng’ che bo eut, ak ingoek tebeesindanyi kakwautiet agenge ne bo eut, ak ingoek kakwautiet ne bo eut agenge ak kebeber, koindab tononennyi.

²⁴ Ak iliige tahabu che tililen, ak itegele tegeleiywotab tahabu iyieme baragunnyi tugul.

²⁵ Ak iyachi tegeleiywot ne yamei eut agenge tebeesindanyi, koyiem kioto, ak iyai tegeleiywotab tahabu koyiem tabanwekyik tugul kotegel.

²⁶ Ak iyachi peteinik ang’wan che bo tahabu, ak inde peteinichoto luukwek ang’wan che mi kelyekyik ang’wan.

²⁷ Ingorikyi peteinichoto tegeleiywot, koek che chutei ketik che kiibe meset.

²⁸ Ak iyai ketik che kiibe, che bo shita, ak iliige tahabu, si kobiit keibe meset.

²⁹ Ak itany tahabu che tililen iyai koek tabokyik, ak kechigosiekyik, ak kikombokyik, ak tageiywekyik, che kirong’jine tuguk.

³⁰ Ak inde makatinik che bo kabartaet meset kotebe tainnyu kotugul.

³¹ Ak iyai keldab tait eng’ tahabu che tililen: iyae keloto tahabu che kitanyi, kelunnyi, ak toloitanyi; kikombokyik, mulonokyik, ak taptokyik, kiropchindos choto tugul koek kiy agenge:

³² ak kosach temenik koek lo eng’ toloato; sachei temenik somogu eng’ komosta age ne bo keloto, ak sachei temenik somogu ko u noto eng’ komosin.

³³ Tinyei temet agenge kikombok somok che kigiyai koigei taptok che kiguure almond, ak mulwet ak taptet, tinyei ko u noto temet age ne bo komosta age kikombok somok che kigiyai koigei taptochoto kiguure almond, ak mulwet ak taptet: ko u noto eng’ temenik tugul lo, che sage keloto komugul.

³⁴ Ak mitei ole bo toloita inendet kikombok ang’wan, che kigiyai kogergeit ak taptokab almond, koboto mulonokyik ak tapokyik.

³⁵ Ak ye kisage temenik aeng’u, komi kel yoto mulwet, ne kigituiye koek kiy agenge, ak ye kisage kogeny temenik aeng’u, komi kel yoto mulwet, ne kigituiye koek kiy agenge, ak ye kisage kogeny temenik aeng’u, komi kel yoto mulwet, ne kigituiye koek kiy agenge. Mitoti ko u noto eng’ wagichoto tugul ole kisage temenik tugul ko lo.

³⁶ Namegei mulonokwak ak temenikwak, kiek kiy agenge: kitang’e kioto komugul tahabu che tililen.

³⁷ Ak iyai taisiekyik koek tisab: ak konam taisiekyik, si kobiit kokweny ole mi.

³⁸ Ak kiyae tahabu che tililen kanameiywondennyi, ak tabokyik che mengechen.

³⁹ Kiyae tainato ak tuguchuto tugul tahabu che tililen che yamei talentait agenge.

⁴⁰ Rib si iyai tugul ko u kergeindenywa ne kigiborun eng’ tulwet.