KOMONG'U 24 - BUKUIT NE TILIL

Koteechei Musa kaptisisiet ak kotogostoi Tulwet

¹ Ak kilenji inendet Musa, Otogosu ole mi Jehovah, inye ak Aron, Nadab ak Abiu, ak boisiek tamanwogik tisab che bo Israel; ak ong’urukya eng’ ye loo:

² ak nyonei Musa inegei korikyin Jehovah; ago marigu ichek; ak matogosu bik koboto inendet.

³ Ak kinyo anyun Musa konyo komwachi bik ng’alek tugul che bo Jehovah, ak kiruogutik tugul: ak kiwol bik tugul eng’ kutit agenge kole, Kiyae ng’alechato tugul kamwa Jehovah.

⁴ Ak kisir Musa ng’alek tugul che bo Jehovah, ak king’eet karon ko tuui, ak kiteech kaptisisiet eng’ tulwet kel, ak tolochik taman ak aeng’, ko u ortinwek taman ak aeng’ che bo Israel.

⁵ Ak kiiyokto murenik che neran che bo lagokab Israel, che kiigoito kagochinoik che kibeelei, ak kieng’ji Jehovah tiseiywekab kalyet, che bo tuga.

⁶ Ak kinam Musa korotik kebeber, konde tabok che mengechen; ak kiisote kaptisisiet che king’et eng’ korotichoto.

⁷ Ak konam bukuitab arorutiet, ak kosomanji bik kogas: ak kile ichek, Kiyae choto tugul kamwa Jehovah, ak kegas it.

⁸ Yeityo konam Musa korotik, ak koisote bik, kolen, Ogeero, korotikab arorutiet ne kagoyai Jehovah kobotok eng’ ng’alechu tugul.

⁹ Kitogosta anyun Musa, ak Aron, Nadab, ak Abiu, ak boisiek tamanwogik tisab che bo Israel,

¹⁰ ak kigeer Kamuktaindet ne bo Israel; ak kimi kelyekyik kel koita ne kiguure sapire, ne u sengwetiet inendet, eng’ tililindanyi.

¹¹ Ak ma twa eng’ eunnyi kandoichoto bo lagokab Israel: ak kigeer Kamuktaindet, ak kiamis ak koee.

¹² Ak kilenji Jehovah Musa, Togosu oli ami eng’ tulwet, ak itebe olito; si agonin koik che lebelen, ak ng’atutik ak kayomisutik, che kiasir, si kobiit kinet ichek.

¹³ King’eet anyun Musa ak Josua kiboitiondennyi, ye ibata kotogosta Musa kwo tulwetab Kamuktaindet.

¹⁴ Ak kilenji boisiek, Otebi eng’ yu, ogenech, agoi keweege kogeny ole omi: ogeero, mi Aron ak Hur kobotok: ingonyo ole mi ichek chi age tugul ne tinyei ng’olyo.

¹⁵ Kitogosta anyun Musa kwo tulwet, ak kituch boldet tulwet.

¹⁶ Ak kitebe lilindab Jehovah tulwetab Sinai, ak kituch boldet tulwonoto betusiek lo; ak eng’ betutab tisab koguur Jehovah Musa komong’une kutit boldet orit.

¹⁷ Ak ki u itondab lilindab Jehovah mat ne beelei kowong’u eng’ tulwet barak ko u ye kigeerei lagokab Israel.

¹⁸ Ak kiwa Musa boldet orit, ak kotogosta tulwet; ak kitebe Musa tulwet betusiek artam ak kemousiek artam.