KOMONG'U 22 - BUKUIT NE TILIL

Ng’atutik ak kayomisutik

¹ Ngo chor chi tany, anan kechir, ak koeny, anan koalda; kogonu tuga mut kogeere tanyato, ak kechirek ang’wan kogeere kechirionoto.

² Ak ngenam chorindet kobutei oldo age, ak kebar, ko mami tengektab korotik.

³ Ak ngo chor asis ama kiyachi kiy inendet, komitei tengektab korotik: nyolu kogeer che yamei; ak ngo matinyei kiy, kealda inendet amu chorsennyi.

⁴ Ngenyorji eunnyi kioto kachor kota kosobei, ngo tany, anan ngo sigirio, anan ngo kechir; kogeeri konyil aeng’.

⁵ Ngoyage chito tennyi mbaretab chito age, anan ko mbaret ne bo sabibuk, kogeerjin chitab kobo mbaret tugukyik che miachen che bo mbarennyi, ak logoekab ketikyik che kororon.

⁶ Ngo lal mat, ak konam ng’otwet, si kobeel bek anan bek che iyumotin anan kobeel mbaret inendet; kogeeri iman chito ne kainaami mat.

⁷ Ngogochi chi age tugul chitab kokwennyi fedaisiek anan tuguk kogonorji, ak kechor eng’ gotab chichoto; ak ngenam chorindet, kogeeri chorindonoto konyil aeng’.

⁸ Ago ngo maginyor chorindet, konyo anyun chitab kobo got taitab Kamuktaindet, si kobiit kotook ngo kinam eunnyi tugukab chitab kokwennyi.

⁹ Amu kachiliilutiet age tugul, ngo ne bo tany, anan sigirio, anan kechir, anan ne bo ngoriet, anan kiy age tugul ne kibet, ngo mwa chito kole, Ineni, keib anyun kobwa taitab Kamuktaindet ng’alekwak ichek tuwai; inendet ne iruokyin Kamuktaindet, kogeerjin chitab kokwennyi konyil aeng’.

¹⁰ Ngo manakyi chi age tugul chitab kokwennyi sigiriet, anan eito, anan kechir, anan tany age tugul; ak ngo me, anan ngo mian, anan ngekweri, ama keer chi:

¹¹ tebe kayosietab Jehovah kwenutab bichoto tuwai, ngo ma nam eng’ eunnyi tugukab chitab kokwennyi; ak koyan noto chitab kobo, ak magonu kiy.

¹² Ago ngo kaga kigichore inendet iman, kogeerjin chitab kobo che yamei.

¹³ Ngot ko kinam tiondo kotonaton, ingoib anyun tanyato nyo koek baornatet; magonu kiy kogeere noto kigibar.

¹⁴ Ak ngo som chi chitab kokwennyi kiy koboisie, ak ngo ng’emak, anan ngo me, ama mi chitab kobo, kogeere age iman.

¹⁵ Ago ngo mi chitab kobo, ko maigeeri: ak ngo teta ne kigibesendo kobois, si kigoito melekto, koyamegei ak melektanyi.

¹⁶ Ak ngogaigai chito bergeiyat ne tom keyachi koito, ak koruiyo ak inendet, ko kanyol koganda tuguk si kobiit kotun.

¹⁷ Ak ngo esio kwandab bergeiyandanato eng’ kimnatet, ko kanyol kogoito tuguk che aechin ak che kigandoe bergeinik.

¹⁸ Ameunde bonindet kosob.

¹⁹ Kibarei age tugul ne ruitos ak che kiyagi.

²⁰ Chi age tugul ne eng’jin tiseiywot cheptalelit age tugul, ne ma Jehovah inendet, keng’emei kiwong’u.

²¹ Ameyachi ne ya too, anan inyalil: amu kio toek ak okwek eng’ emetab Misri.

²² Amous mosok age tugul, anan lakwet ne matinyei kwanda.

²³ Ngius ichek eng’ kiy age tugul, ak korirja, agasyini iman rirekwak;

²⁴ ak kolalyo neregekyuk, ak abarenak rotwetab chok; ak koek mosogik osotikwok, ak koek bonon lagokwok.

²⁵ Ak ngo besenin bikyuk che kibananok che mi koboten, komat iyaach; amemage keljinet.

²⁶ Ak nginame besendo ngorietab chitab kokweng’ung’, iweekyini kotom kororokta asista:

²⁷ amu noto kityo ne tugegei, amu ngoriet ne tuge bortanyi: tos tugegei nee koruei? Ak ye rirja, agasyini; amu atinye rirenet.

²⁸ Amat isas Kamuktaindet, amat ichub bounindetab biguk.

²⁹ Amegage si igoitoi eng’ chang’indab tuguguk, ak che kieei. Igona taitang’ung’ ne werit.

³⁰ Ak iyai ko u noto eng’ tuga cheguk agichek, ak eng’ kechireguk: igochi kotebi ak kamet betusiek tisab; si igona eng’ betut ne bo sisiit.

³¹ Ak oegu bik che itabanotin eng’ ane: eng’ noto anyun amoam banyek alak tugul che kabar tiong’ik eng’ timin; owirji sesenik.