KOMONG'U 21 - BUKUIT NE TILIL

Ng’atutik ak kayomisutik

¹ Chu anyun kiruogutik che indechini tainywa.

² Ngial otwogindet ne Hebranindet, koboisiei kenyisiek lo, ak eng’ kenyitab tisab komanda buch kotiagat.

³ Ngo kinyonei inegei, komandoi inegei: ago ngo kiga kotunis, komandoi ak osotiondennyi.

⁴ Ago ngo kiigochin kiptaindennyi osotiot, ak kosikyi werik anan ko tibik; kobunjin osotiondonoto ak lagokyik kiptaiyandennyi, ak komanda chichoto inegei.

⁵ Ak ngo mwa komie otwogindet kole, Achame kiptaiyandennyu, ak osotiondennyu, ak lagokyuk; mamandoi, nganda atiagat:

⁶ komut anyun kiptaiyandennyi chichoto konyo taitab Kamuktaindet, ak komut konyo kurgat, anan tugatukyietab kurgat; ak kobarbar itinnyi kiptaiyandennyi eng’ katet; ak koot inendet agoi.

⁷ Ak ngo alda chi cheptanyi koek otwogindet, ko mamandoi ko u otwogik che muren.

⁸ Ngo maibaibai cheboto kiptaiyandennyi, ne kilewen chichoto kole si tun koek osotiondennyi, kochamda kitiach: matinyei kimnatet koalda kwo bororiosiek alak, amu king’al inendet.

⁹ Ak ngogochi inendet werinnyi koek osotiondennyi, koyachi inendet ko u ye yachin tibikyik.

¹⁰ Ak ngo sion, ko mat kochuchuch amitwogikyik, anan ngoroikyik, anan ko u ye nyoljin osotik.

¹¹ Ak ngo mayachi inendet tuguchoto somok, komuchi osotiondonoto komanda buch, ama eng’ alyet.

¹² Inendet ne birei chi kot kome, kebarei chichoto iman.

¹³ Ago chito ne kama kosetyin, ago kiigochi Kamuktaindet inendet konyo eunnyi: achobun ole mwechin.

¹⁴ Ak ngo wechi chito chitab kokwennyi eng’ menotet, kwo kobar inendet eng’ ng’alset; ing’usu eng’ kaptisisiennyu, si kebar.

¹⁵ Ak inendet ne birei kwandanyi, anan kamet, kebarei iman.

¹⁶ Ak inendet ne chorei chi, ak koalda, anan ngenam komi eunekyik, kebarei iman.

¹⁷ Ak inendet ne sasei kwandanyi, anan kamet, kebarei iman.

¹⁸ Ak ngo borio bik, ak kewire age koita, anan ngo luch, ama kome, ago ngo ru eng’ itogunnyi konyagei,

¹⁹ ago ngo ng’eet, kowendot kotebenoti kiroktanyi, keunda anyun ne kibirei: ago igochin tuguk che yamei betusiekyik che kibetyo buch, ak konya inendet komie agoi kosob.

²⁰ Ak ngo bir chi age tugul otwogindennyi ne muren, anan ne tie, eng’ kirokto, kot komechi eunekyik, kigeerjin chichoto yaitiennyi iman.

²¹ Ago ngot koeekyi betut agenge anan ko aeng’ ama me, ko ma kigeerjin kiy; amu kiga al.

²² Ak ngo borio bik, kot kokwer osotiot ne tamano, ak kororok moet, ama koam kiy osotiondonoto: kogeerjin che yamegei ak che machei manong’otiotab osotiondonoto; igoitoi ko u ye kamwa kiruogik.

²³ Ago ngoyaak kiy ne ya, kigeeri sobondo eng’ sobondo,

²⁴ konda eng’ konda, keldet eng’ keldet, eut eng’ eut, keldo eng’ keldo,

²⁵ beelset eng’ beelset, kaguotenet eng’ kaguotenet, biret eng’ biret.

²⁶ Ak ngo kwer chi kondab otwogindennyi ne muren anan ne tie, kot kotui kong’ato; kounda kwo kotiagat amu kondanyi.

²⁷ Ak ngo kwer keldetab otwogindennyi ne muren, anan otwogindennyi ne tie kot kochun; kounda kwo kotiagat amu keldannyi.

²⁸ Ak ngo toor kirgit muren anan kobogorio, ak kome, kelachei kirgoto iman, ak magiamei banyekyik; ak keunda anyun chitab kobo kirgoto.

²⁹ Ago ngo kocham kobarei bich kirgoto, ak kigemwachi chitab kobo, ama koger inendet, ago kabar muren anan kobogorio; kelachei kirgoto, ak kebar chitab kobo agine.

³⁰ Ak ngo biit kiy ne itiagegei, kogoito anyun noto kitiage sobondanyi ko u ye kagecham.

³¹ Ngo kibar werit, anan chepto, keyachin ko u kiruogonito.

³² Ak ngo toor kirgit otwogindet ne muren anan otwogindet ne tie; kogoitoi sekelisiek sosom che bo feda, kogochin kiptaiyandenywa, ak kelach kirgoto.

³³ Ak ngo yat chito keringet, anan ngo bal keringet ama koger, ak ngo rorokyi tany anan sigiriet,

³⁴ kogeeri chitab kobo keringet; ak igochin chitab kobo tuguchoto siling’isiek, ak kobunji noto kagome chitab kobo keringet.

³⁵ Ak ngo bar kirgit kirgitab chito age kot kome; kealdoi noto sobei, ak kopchei tuguk che kagialdae, ak kopchei banyekab ne kame agine.

³⁶ Ak ngingen kele kicham kobarisiei kirgoto, ama koger chitab kobo; kowale kirgoto kirgit age, ak kobunji inendet banyekab ne kame.