KOMONG'U 20 - BUKUIT NE TILIL

Ng’atutik Taman

¹ Ak kimwa Kamuktaindet ng’alechu tugul kole,

² A Jehovah Kamuktaindeng’ung, ne kiimutun imong’une emetab Misri, eng’ gotab otwognatet.

³ Amecheng’jige cheptalelisiek che ter, kobatena anege.

⁴ Ameyachige kanamwet, anan itondab kiy age tugul ne mi barak kipsengwet, anan ne mi ng’ony, anan ne mi nyanjet, ng’ony orit;

⁵ ameng’urukyi anan iot ichek: amu ane Jehovah Kamuktaindeng’ung’, ko a Kamuktaindet ne ama ng’etkong’, ageerjini lagok tengektab kwanisiekwak, agoi ibindab somok ak ne bo ang’wan eng’ ichek che wecha,

⁶ ak arire elfusiek eng’ ichek che chama che isubi ng’atutikyuk.

⁷ Amemwa kainetab Jehovah Kamuktaindeng’ung’ eng’ tangoi; amu iityin Jehovah ng’ogisto ne mwaei kainennyi eng’ tangoi.

⁸ Ibwat betutab sabato, irib, itaban.

⁹ Iboisie betusiek lo, ak iyai boisioniguk tugul;

¹⁰ ago betutab tisab ko sabato ne bo Jehovah Kamuktaindeng’ung’; ameyai boisiet eng’ betunoto, inye, anan wering’ung’, anan cheptang’ung’, anan otwogindeng’ung’ ne muren, anan otwogindeng’ung’ ne tie, anan tuguk, anan toondeng’ung’ ne mitei kurgotiguk;

¹¹ amu kiyai Jehovah kipsengwetisiek ak ng’ony eng’ betusiek lo, ak nyanjet, ak tuguk tugul che mi orinywa, ak kiimuuny eng’ betutab tisab: kiiberur anyun Jehovah betutab sabato amu noto, kiitaban.

¹² Teech kwandang’ung’ ak komet: si kochang’a betusieguk eng’ emet ne konin Jehovah Kamuktaindeng’ung’.

¹³ Amerumisie.

¹⁴ Amoipge.

¹⁵ Amechorse.

¹⁶ Amebaorianji chitab kokweng’ung’ eng’ lembech.

¹⁷ Amegase miat gotab chitab kokweng’ung’, amegase miat osotiotab chitab kokweng’ung’ anan otwogindennyi ne muren, anan otwogindennyi ne tie, anan eitanyi, anan sigiriennyi, anan kiy age tugul ne bo chitab kokweng’ung’.

¹⁸ Ak ye kingogeer bik tugul kalyelosiek ak tulwet ne iyeni, ak kogas tuletab ilotik ak cheetab iriaget, kobotanso, ak kotononso eng’ ole loo.

¹⁹ Ak kilenji ichek Musa, Ng’alalwech inye, si kegasin: ago amengong’alalwech Kamuktaindet si ma kibegu.

²⁰ Ak kilenji Musa bik, Amoiywei; amu kanyo Kamuktaindennyo kotiemak, si kotebe taing’wong’ kaiyweisiennyi ne oiywei inendet, si moyai tengek.

²¹ Ak kitononso bik eng’ ole loo, ak kirikta Musa ole mi Kamuktaindet eng’ boldet ne tuui.

Ng’atutik che terotin ak kayomisutik

²² Ak kilenji Jehovah Musa, Mwachi lagokab Israel ko u ni, Kaogeerjige okwege ole, kaang’alalwok ami kipsengwet.

²³ Amat oyachige kanamonik alak otesena, che bo feda, anan kanamonik che bo tahabu.

²⁴ Teekwa kaptisiet ne bo ng’ung’unyek, ak ieng’wa eng’ kaptisisionoto kagochinoiguk che kibeelei, ak kagochinoiguk che bo kalyet, kechireguk, ak tuga cheguk: anyonjinin ak aberurin eng’ komosta age tugul ole andoi kainennyu kibwate.

²⁵ Ak ngimache iteekwa kaptisisiet ne bo koik, ko meteege koik che kigiwai: amu ngiwai, ko kaing’wanit.

²⁶ Ametogoste iwe kaptisisiennyu ibune long’eiywot, si mewe ach ngor.