KOMONG'U 2 - BUKUIT NE TILIL

Sigetab Musa, ak betusiekying che bo tai

¹ Kiwa chito ne bo oretab Lawi kotun cheptab Lawi.

² Ak kimanach osotiondonoto, ak kisich ng’etet; ak ye kingogeer kole lakwet ne kararan, kouny inendet arawek somok.

³ Ak ye kima kota komuchi kouny, kocheng’ji inendet moinget ne bo cherungusiek, ak komale lamit ak manget ak konde lakwet orit, ak konde ngegutab ainet, saoset orit.

⁴ Ak kitonone chepkamet ole loo, kole kogeer kit ne tos kiyachi.

⁵ Ak kichortagei cheptab Parao kwo koungei eng’ ainet; ak kibendat tibik che kimi tugul ak inendet eng’ tabandab ainet; ak kigeer moinget eng’ saoset, ak kiiyokto otwogindennyi kwo koib.

⁶ Kiyat anyun, ak kigeer lakwet ne ng’etet, yeityo korir lakwanato. Kirire anyun lakwanato, ak kile, Bo lakwani Hebranik.

⁷ Kimwaji anyun chepkametab lakwanato chebo Parao, kolenji, Tos mie awo aguurun cheblakwet eng’ osotikab Hebranik, si koribun lakwanito?

⁸ Ak kilenji cheptab Parao, Ui iguur. Kiwa anyun cheboto koguur kametab lakwet.

⁹ Ak kilenji chebo Parao, Imut lakwani, ui iguiywa, si agonin melektang’ung’. Kiimut anyun osotiondonoto lakwet, ak kiireri.

¹⁰ Ak kiner lakwet koeet, ak kiimutyi chebo Parao, ak kiigei werinnyi. Ak kiguure kainennyi Musa, kole, Amu kiamoong’u eng’ beek.

¹¹ Ak eng’ betusiechoto, ye kiga koeet Musa, kwo ole mi tupchosiekyik, ak kigeer laisenywa: ak kigeer Misrindet kobirei Hebranindet ne ki age eng’ bikyik.

¹² Ak kigeer komosi ak komosi, ak kingogeer kole mami chi, kobar Misrindonoto, ak kotube ng’aniek.

¹³ Ak kiwa kogeny eng’ betut ne bo aeng’, ak ogeero, kobortos bik aeng’ che bo Hebranik: ak kilenji inendet ne kichalwogen, Amu nee si ibir ching’wong’?

¹⁴ Ak kolenji, Ng’o ne koindein iegu bounindet ak kiruogindet iruokwech? Ilen ibara, ko u ye koibar Misrindet? Ak kiiywei Musa, ak kole, Koga kogenai nito.

¹⁵ Kingogas Parao anyun ng’olyondonoto, kocheng’ kobar Musa. Ago kimwei Musa eng’ taitab Parao, kwo komeny emetab Midian: ak kotebi ng’ony eng’ ole negite keringetab beek.

¹⁶ Kitinyei tisiindetab Midian tibik tisab: ak kibwa tipchoto konyo koram beek, ak konyiit beek togomwek si kobiit kogoigoch akwetab kechirekab kwandanywa.

¹⁷ Ak kibwa mestowek nyo koon tipchoto: ago king’eet Musa kotoret, kogoigokyi.

¹⁸ Ak ye kingoit ole mi kwandanywa Reuel, kolenji, Ngosib oweeige rani?

¹⁹ Ak kolenji, Kaetech Misrindet eng’ eunekab mestowek, ak yeityo koramwech beek, ak kogoigoch akwet.

²⁰ Ak kilenji tibikyik, Mi ano chichoto? Amu nee si obagakte? Oguur konyo koamis.

²¹ Ak kicham Musa kotebi ak chichoto: ak kiigochi cheptanyi Sipora kotun.

²² Ak kisich werit, ak kiguure kainennyi Gersom: kole, A kiprutoiyo eng’ emetab bororiosiek alak.

²³ Ak ye kingobata betusiek che chang’, kome laitoriatab Misri: ak kitigenso eng’ ng’wanindo lagokab Israel amu otwognatet ak kiririo, ak kiit rirekwak oldab Kamuktaindet amu otwognatet.

²⁴ Ak kigas Kamuktaindet tigenoikwak, ak kiibwat Kamuktaindet kayomisennyi ne kiiyomisyi Abraham, ak Isak, ak Jakobo.

²⁵ Ak kigeer Kamuktaindet lagokab Israel, ak kinai Kamuktaindet kit ne u.