KOMONG'U 19 - BUKUIT NE TILIL

Koitei Israelik Sinai; chobetab ge si kigochi Ng’atutik

¹ Kiit anyun lagokab Israel ong’atetab Sinai eng’ arawetab somok koboch ngab komanda eng’ emetab Misri: kiit eng’ betunoto.

² Ak kingo kagoba eng’ Repadim, koit ong’atetab Sinai, komuung’e ong’atet; ak yoto ye kitebe Israel ko katokyigei tulwet.

³ Ak kitogosta Musa kwo ole mi Kamuktaindet, ak kiguur Jehovah inendet eng’ tulwet, kolenji, Mwachi ko u ni gotab Jakobo, ak imwachi lagokab Israel, ilenji,

⁴ Kiogeer kit ne kiayachi Misrik, ak ko u ye kiagesenenak kebebaikab kipsichinik, amutwak obwanja.

⁵ Eng’ noto anyun, ngot ogas it kutinnyu iman, ak orib kayomisenny u, oegu anyun eng’ ane chamanikyuk iman, che itabanotin eng’ bik tugul: amu nenyu ng’ony komugul:

⁶ ak oegu eng’ ane bororietab tisiik, ak bororiet ne itabanat. Chuto ng’alek che iwendi imwachini lagokab Israel.

⁷ Kinyo anyun Musa koguur boisiekab bichoto, ak kotetyi ichek ng’alechato tugul che king’atyi Jehovah inendet.

⁸ Ak kiwol bik tugul kibagenge kole, Kiyae choto tugul kamwa Jehovah. Ak kiipchi Musa Jehovah ng’alekab bik.

⁹ Ak kilenji Jehovah Musa, Keero, anyonjinin eng’ boldet ne tuui, si kobiit kogas bik ye ang’alalun, ak koyanin agoi. Ak kimwachi Musa Jehovah ng’alekab bik.

¹⁰ Ak kilenji Jehovah Musa, Ui ole mi bik, ianyiny ra ak mutai, ak ingomwet ngoroikwak,

¹¹ kochopgei agobo betut ne bo somok: amu chorjingei Jehovah tulwetab Sinai eng’ betutab somok eng’ taitab bik tugul.

¹² Ak itilji bik ole iboch, ilenji, Oripge, si motogoste tulwet, anan otwa kiwotennyi: kibarei age tugul ne twaei tulwet:

¹³ magitwaei eng’ eut chito ne katwa, kobate kilage koik, anan kemwok; masobei age tugul, ngo tiony anan chi. Ye kiguut igonditab kuinetab mengit koek keny, kotogos icheget tulwet.

¹⁴ Ak kichortagei Musa anyun kwo ole mi bik, kwo koanyiny bik; ak kimwet ngoroikwak.

¹⁵ Ak kilenji bik, Ochopge ogen betutab somok: amat korikyi chi kobogorio.

¹⁶ Ak eng’ betutab somok, ko kaeech, kobiit tulosiek ak kalyelosiek, ak kiilaach boldet ne tuui tulwet, ak kimi cheetab iriaget ne cheei kot; ak kobotanso bik tugul che kimi nganaset.

¹⁷ Ak kiimut Musa bik komong’ eng’ nganaset koba kotuiyo ak Kamuktaindet; ak kiba kotononie tulwet kel.

¹⁸ Ak kiiyeni tulwet komugul ne bo Sinai, amu kichorjigei Jehovah tulwonoto eng’ mat: ak kitogosta iyetanyi ne u ne bo mat ne o mising’, ak kibotan tulwet komugul mising’.

¹⁹ Ak kingotesak cheetab iriaget kwo barak mising’ kotwek Musa, ak kiwolji Kamuktaindet eng’ tuget.

²⁰ Ak kichorjigei Jehovah tulwetab Sinai, konyo tulwet barak: ak kiguur Jehovah Musa kwo tulwet barak; ak kitogosta Musa.

²¹ Ak kilenji Jehovah Musa, Ui iteechi bik, si mabut bik kiwotet ak kogeer Jehovah, ak kobek che chang’.

²² Ak ingoanyinygei tisiik agichek che rikyin Jehovah, si mabar Jehovah ichek.

²³ Ak kilenji Musa Jehovah, Ma chamdaat eng’ bik kotogos tulwonito bo Sinai: amu kiiteiywech, ilenjech, Onde kiwotet tulwet, ak otaban.

²⁴ Ak kilenji Jehovah inendet, Ui, chortege; si otogosu ak Aron: ago amat kobut bik ak tisiik kiwotet kotogos ole mi Jehovah, si mabar inendet ichek.

²⁵ Kichortagei anyun Musa kwo ole mi bik, kwo komwachi.