KOMONG'U 17 - BUKUIT NE TILIL

Kokwerei Musa ruandet komong’ beek

¹ Kinam banda anyun tuiyet komugul ne bo lagokab Israel kong’eetye ong’atetab Sin, ko u banwekwak, ko u ng’atutietab Jehovah, kiba komuung’e Repidim: ak kima komi beek oloto che eei bik.

² Kibolji anyun bik Musa amu noto, kolen, Inagech beek kee. Ak kilenji Musa ichek, Amu nee si obolja? Otieme Jehovah amu nee?

³ Ak kiam bik melelda eng’ oloto; ak kiing’unyng’ung’ji bik Musa, ak kile, Kilya si imutwech kemong’une Misri, nyo ibarenech melelda achek ak lagokyok ak akwotisiekyok?

⁴ Ak kirirji Musa Jehovah kolenji, Aitoi nee bichu? Negit kolacha.

⁵ Ak kilenji Jehovah Musa, Ui indoe bik, imut boisiekab Israel alak, ib siaring’ung’, ne kiikwere ainet, ak iwe.

⁶ Keero, atonone ruandet eng’ Horeb eng’ taing’ung’; ak ikwer ruandanato, si komong’une beek, si koee bik. Ak kiyai Musa ko u noto eng’ taitab boisiekab Israel.

⁷ Ak kiguure yoto Masa, ak Meriba, amu bolatetab lagokab Israel, amu kitiem Jehovah kolen, Tos mi Jehovah kobotech anan mami?

Kogirindoisiei Amalek eng’ Repidim

⁸ Kibwa anyun Amalek nyo kobaregei ak Israel eng’ Repidim.

⁹ Ak kilenji Musa Josua, Lewenwech bik, ak obe, obarge ak Amalek: awendi atononi mutai eng’ tulwet barak, ating’e siaritab Kamuktaindet eunnyu.

¹⁰ Kiyai anyun Josua ko u ye kiga komwachi Musa, ak kibargei ak Amalek: ak kitogosta anyun Musa tulwet barak ak Aron, ak Hur.

¹¹ Ak ye kingonamji Musa barak eunnyi, koterteris Israel: ak kingotu eut, koterteris Amalek.

¹² Ago kinyigisitu eunekab Musa; kinam anyun koita, ak konde ole tebe, si kotebe; ak kinam Aron ak Hur eunekyik kotononso, kitonone age komosi, ak age komosi; kitononso eunekyik ko u noto agoi kororokta asis.

¹³ Ak kiiterter Josua Amalek ak bikyik eng’ rotokab chok.

¹⁴ Ak kilenji Jehovah Musa, Sirji ng’alechu bukuit si koek kabwatet; ak isomanji Josua: amu abuktoi kabwatetab Amalek kobet eng’ kureretab kipsengwet.

¹⁵ Ak kiteech Musa kaptisisiet, ak koguure yoto Jehova-nisi:

¹⁶ ak kile, Kagoyosio Jehovah: yaei Jehovah luget ak Amalek eng’ ibinwek tugul.