KOMONG'U 16 - BUKUIT NE TILIL

Kong’unying’ung dos Israelik eng’ ang’atet, ak kiyogu mana

¹ Kinam anyun bandanywa kong’eetye Elim, ak kiit tuiyet komugul ne bo lagokab Israel ong’atetab Sin, ne mi kwenutab Elim ak Sinai, kiit eng’ betutab taman ak mut ne bo arawetab aeng’ koboch ye kingomong’ eng’ emetab Misri.

² Ak kiing’unyng’ung’ji tuiyet komugul ne bo lagokab Israel Musa ak Aron eng’ ong’atet:

³ ak kilenji lagokab Israel ichek, Kita kaigai kebegu eng’ eutab Jehovah eng’ emetab Misri, ye kigitebe ole negite terenikab banyek, ye kigiamisiei kot kebiyong’se; amu kiomoong’wech kebwa ong’atani, si obare rubet tuiyoni komugul.

⁴ Kilenji Jehovah Musa anyun, Keero, arong’wok amitwogik che bunu kipsengwet; ak koba bik betut age tugul koyum che yamei betut, si kobiit atiem ichek, anai ngomuchi kobendate ng’atutiennyu, anan acha.

⁵ Ak tebyei ko u ni eng’ betut ne bo lo, chobei ichek choto che kaib kobwa go, tenitu choto ko bo kotugul konyil aeng’.

⁶ Ak kilenji Musa ak Aron lagokab Israel tugul, Onae koskoleny ole kiimutwak Jehovah omong’une emetab Misri:

⁷ ak ogeer karon telunatetab Jehovah; amu kasei inendet kang’unyng’unyeng’wong’ ne ong’unyng’ung’jini Jehovah: achek anyun ko ki ng’o si ong’unyng’ung’jech?

⁸ Ak kile Musa, Egu ko u ni, konok Jehovah banyek oam koskoleny, ak konok karon amitwogik oam obiye; amu kasei Jehovah kang’unyng’unyeng’wong’ ne ong’unyng’ung’jini inendet: achek ko ki ng’o? Ma achek che ong’unyng’ung’jini, ago ong’unyng’ung’jini Jehovah.

⁹ Ak kilenji Musa Aron, Ilenji tuiyet komugul ne bo lagokab Israel, Obwa orikyi Jehovah: amu kogogas kang’unyng’unyeng’wong’.

¹⁰ Ak ye kita kong’alaljin Aron tuiyet komugul ne bo lagokab Israel, kotobendo kotokyigei ong’atet, ogeero, kitook lilindab Jehovah eng’ boldet.

¹¹ Ak king’alalji Jehovah Musa kolenji,

¹² Kaagas kang’unyng’unyetab lagokab Israel: mwachi ilenji, Oame banyek koskoleny, ak obiye kimnyet karon; si onai ole a Jehovah Kamuktaindeng’wong’.

¹³ Ak kibwa taok koskoleny, konyi nganaset: ak kiibut rewot karon koyiem nganaset.

¹⁴ Ak ye kingotogosta rewot ne kogaibut, ogeero, kotook eng’ ong’atet tuguk che mengechen, che terteren komi ng’ony, che u chepkoset.

¹⁵ Ak ye kingogeer lagokab Israel tukchoto, koteebegei ichegei, kole, Nee tuguchuto? Amu kima nai tukchoto. Ak kilenji Musa, Amitwogik chuto che kagonok Jehovah oam.

¹⁶ Nito kit ne kong’at Jehovah, Ingoyum chi tugul che yamei koam; yamei chi tugul che bo kerebet ne kiguure omer, che yamei koitetab bikwok, ingoipchi chi age tugul bikyik che mi gonnyi.

¹⁷ Ak kiyai ko u noto lagokab Israel, ak kiiyum alak che chang’, koyum alage che ng’ering’.

¹⁸ Ak ye kingoger eng’ kerebet, ko ma kosiirto che bo inendet ne kagaiyum che chang’, ak kima ng’ering’itu che bo inendet ne kagaiyum che ng’ering’; kiiyum chi tugul che yamei koam.

¹⁹ Ak kilenji Musa ichek, Amat kotuuch chi agoi koeech.

²⁰ Ago kima kas it kit ne kimwachin Musa; ago kiituuch alage koteb kot koeech, ak kiam kutik, ak kibulyo: ak kinerekyi Musa bichoto.

²¹ Ak kiiyumi karonet age tugul, che yamei koam chi tugul: ak kingong’wanit asis, kochootyo.

²² Ak kiiyum eng’ betut ne bo lo che te che cham koyumi konyil aeng’, kerebonik aeng’ chi tugul: ak kiba bounik tugul che bo tuiyet komwachi Musa.

²³ Ak kilenji Musa ichek, Noto ko kit ne kimwa Jehovah, Mutai ko kamuung’et, sabato ne itabanat eng’ Jehovah: obeel che omache obeel, ak oyoi che omache oyoi; ak ogonorjige che kang’et kobunji mutai.

²⁴ Ak kigonor kobunji karon, ko u ye kimwachi Musa: ak kima bulyo, ama kinyorji kutik.

²⁵ Ak kile Musa, Oam choto rani; amu sabato ne bo Jehovah rani: monyorjini rani emet.

²⁶ Oyumi eng’ betusiek lo; ago betutab tisab ko sabato, mabiitu eng’ betunoto.

²⁷ Ago kiba alage eng’ betutab tisab, kolen koyumat, ago manyor.

²⁸ Ak kilenji Jehovah Musa, Oesioi osub ng’atutikyuk ak kayomisutikyuk kot kotianit?

²⁹ Ogeero, kagogonok Jehovah sabato, eng’ noto anyun konok amitwogik eng’ betutab lo che yamei betusiek aeng’; ingotebe chi tugul oldanyi, amat kwo chi ui eng’ oldanyin eng’ betutab tisab.

³⁰ Kiimuuny anyun bik eng’ betutab tisab.

³¹ Ak kiguure gotab Israel amitwogichoto Mana: ki kergei tuguchoto ak bek che mubere che leelach; ak kichamu makatinik che mengechen che kigikwanda kumiat.

³² Ak kile Musa, Nito kit ne kong’at Jehovah, kole, Kinyiit kerebet agenge tuguchoto kegonorji ibinwekwok che biitu let; si kobiit kogeer amitwogichoto che kiabaenak eng’ ong’atet, ye kiamoong’wok omong’une emetab Misri.

³³ Ak kilenji Musa Aron, Inemu teret ne ming’in ak inyiit mana che yamei kerebet agenge, ak igonore taitab Jehovah, kegonorji ibinwekwok che biitu let.

³⁴ Kigonor anyun Aron eng’ taitab Baornatet kole kerib, ko u ye king’at Jehovah Musa.

³⁵ Ak kiam lagokab Israel mana kenyisiek artam, agoi koit emet ne menyei bik; kiam mana agoi koit kiwotisiekab emetab Kanan.

³⁶ Kerebonoto kigere mana ne kiguure omer ko kebebertab taman ne bo epah.