KOMONG'U 15 - BUKUIT NE TILIL

Tiendab Musa

¹ Kitienji Musa koboto lagokab Israel Jehovah tieni, komwa kole, Atienjini Jehovah, amu kiibelis eng’ kabelisiet ne toror mising’: Kiwirji nyanjet mbartanyit koboto ne kilanyei.

² Jehovah kimnatennyu ak tiendanyu, Ak kaek yetunennyu: Nito ko Kamuktaindennyu, ak alosu inendet; Inendet ko Kamuktaindet ne bo baba, atorori inendet.

³ Jehovah inendet ko ne bo luget: Kainennyi ko Jehovah.

⁴ Kiwirji nyanjet karisiekab Parao koboto lugennyi: Ak kiimaluuch Nyanjet ne Birir kiptainikyik che kilewen.

⁵ Kituch ichek rirosiek: Kirorokta koba rirosiek ko u koita.

⁶ Ee Jehovah, konyitot eung’ung’ ne bo tai eng’ kimnatet, Ee Jehovah, nyinyiri eung’ung’ ne bo tai bunik kotonogis.

⁷ Iluuli ichek che ng’eetyinin eng’ oindab telunateng’ung’: Iyoktoi neregeguk, che beelei ichek kowong’gei ko u mobek.

⁸ Ak kiiyumgei beek amu kimnatetab kabuset ne bo seruneguk, Kitononso beek kototen; Kinamgei beek kouuegitu eng’ nyanjet kwen.

⁹ Kile bunyondet, Asubi, aname, ak apchei che kagiluul: Ak kobiyong’e magennyu ichek; Ang’usu rotwennyu bo chok, ak kobar eunnyu ichek.

¹⁰ Kiiusyi eng’ usoneng’ung’, ak kituch nyanjet ichek: Kirorokyi beek che kimen orit, ko u ngosielait.

¹¹ Ee Jehovah, tos ngoro ne u inye eng’ cheptalelisiek? Tos ng’o ne u inye, ne konyitot eng’ tililindo, Ne kiywei eng’ kalosunet, ne yaei kwong’utik?

¹² Kiite eung’ung’ ne bo tai, ak kilugui ng’ony.

¹³ Kiindochi inye eng’ rireneng’ung’ bik che kiitiach, komanda: Kiindochi ichek eng’ kimnateng’ung’ koba oldang’ung’ ne tilil.

¹⁴ Kigogas bororiosiek alage, ak kibotanso: Kinyor ng’wanindo che menyei Pilistia.

¹⁵ Kitang’any anyun kiruogik che bo Edom; Botandos che kimen che bo Moabik: Kachootyo tugul che menyei Kanan.

¹⁶ Kanam ichek kamuiset ak kaiyweisiet; Kasisyo ko u koita amu etunatetab eung’ung’; Ee Jehovah, agoi kolanda biguk, Agoi kolanda bik che kiial.

¹⁷ Imutu ichek komong’, ak inde ichek kominogis eng’ tulwetab boroteng’ung’, Komosta ne kiichopchige si imeny, ee Jehovah, Ole tilil, ne kigogimit eung’ung’, ee Kamuktaindet.

¹⁸ Laitorani Jehovah koigeny ak koigeny.

¹⁹ Amu kiba mbartanyisiek che bo Parao nyanjet koboto karisiekyik ak bikyik che lanyei mbartanyisiek, ak kiiweech Jehovah beekab nyanjet kogeny kotuch ichek; ago kibun lagokab Israel emet ne yaamat eng’ kwenutab nyanjet.

Tiendab Miriam

²⁰ Ak kinam Miriam ne kwondo ne maotio, ne chepkametab Aron, sugutit ne ming’in eng’ eunnyi; ak kiisub inendet kobogorisiek tugul che kiibei sugutisiek che mengechen kotienoti.

²¹ Ak kiwolji Miriam kolenji, Otienji Jehovah, amu kiibelis eng’ kabelisiet ne toror mising’; Kigiwirji nyanjet mbartanyit koboto ne kilanyei.

²² Ak kiindochi Musa Israelik koba eng’ Nyanjet ne Birir, ak kiit ong’atetab Sur; ak kiba bandab betusiek somok eng’ ong’atet, ak kimanyor beek.

Banda agoi Mara ak Elim

²³ Ak kingoit Mara, koma komuch koee beekab Mara, amu ki ng’wonen: kigiguure anyun kainennyi Mara amu noto.

²⁴ Ak kiing’unyng’ung’ji bik Musa, kolenji, Kiee nee?

²⁵ Ak kirirji Jehovah; ak kiiborji Jehovah inendet ketit, ak kiwirji ketoto beek, ak kianyinyitu beek. Ak kichopchi eng’ oloto ng’atutiet ak kiruoget, kotiem ichek eng’ yoto:

²⁶ ak kile, Ngot igas iman kutitab Jehovah Kamuktaindeng’ung’, ak iyai ne bo iman eng’ tainnyi, ak iepchji it ng’atutikyik, ak isub kotigonutikyik tugul, ko magonin mian age tugul, ne kiagochi Misrik: amu ane ko a Jehovah ne asoobin.

²⁷ Ak kiit ichek ole kiguure Elim, oloto ole kimi kong’ikab beek tamanu ak aeng’, ak tironik tamanwogik tisab: ak kiimuung’e yoto ole negite beechoto.