KOMONG'U 14 - BUKUIT NE TILIL

Kolandoe bik Nyanjet ne Birir

¹ Ak king’alalji Jehovah Musa, kolenji,

² Mwachi lagokab Isreal koweek komuung’e taitab Pi-hairot, kwenutab Migdol ak nyanjet, ole itoorjingei Baal-sepon: omuung’e yoto negit nyanjet.

³ Ak tun mwaei Parao agobo lagokab Israel, kole, Kigobetyo eng’ emet, kigoger ong’atet ichek.

⁴ Ak auuiiti muguleldab Parao, si kosub ichek; ak anyorune teegisto Parao, ak lugennyi tugul, ak konai Misrik kole a Jehovah. Ak kiyai ko u noto.

⁵ Ak kigimwachi laitoriatab Misri, kelenji, Kogomwei bik: ak kiwalak muguleldab Parao koboto che bo otwogikyik, agobo bikab Israel, ak kile, Nee ni kogiyai, kot kechamji Israelik koba, kometo otwognatet ne kootech?

⁶ Kichob anyun karinnyi, ak komut bikyik:

⁷ ak kiib karisiek bogol lo che kigilewen, ak karisiek tugul che bo Misri, kotinyei kiptainikwak che kibou choto tugul.

⁸ Ak kiiuuiit Jehovah muguleldab Parao laitoriatab Misri, ak kiisub lagokab Israel: amu kimanda lagokab Israel eng’ eut ne kim.

⁹ Ak kiisub Misrik ichek, ak mbartanyisiek tugul, ak karisiek che bo Parao, ak bikyik che kilanyei mbartanyisiek, ak lugennyi, ak kiba konamji ole kiimuung’e eng’ ye negit nyanjet, korikyin Pi-hairot, ye tokyingei Baal-sepon.

¹⁰ Ak ye kingorikta Parao, kotobendo lagokab Israel, ak kogeer kobwanei Misrik kosubu ichek; kiiyweis mising’: ak kirirji lagokab Israel Jehovah.

¹¹ Ak kilenji ichek Musa, Kemutwech kebekyi ong’atani, amu kima komi kererisiek Misri? Amu nee si iyaiywech ko u ni, imoong’wech eng’ Misri?

¹² Tos ma nito ng’olyot ne kigimwaun eng’ Misri, kelenjin, Bagaktech keot Misrik? Amu kita kaigai keot Misrik, kosiir kebekyi ong’atet.

¹³ Ak kilenji Musa bik, Amoiywei, otononse kityo, si ogeer yetunetab Jehovah ne yaiywok rani: amu ma ogeere kogeny Misrichu koigeny, chu ogeere rani.

¹⁴ Yaei Jehovah inendet luget agobo okwek; osisie okwek.

¹⁵ Ak kilenji Jehovah Musa, Amu nee si irirja? Ilenji lagokab Israel koba tai.

¹⁶ Ak inamji barak siaring’ung’, ak ichuul eung’ung’ itokyi nyanjet, ak ipcheune aeng’: ak kobun lagokab Israel kwenutab nyanjet, kobun emet ole yaamat.

¹⁷ Keero, auuiiti anendet mugulelwekab Misrik, ak kosub ichek: ak anyorune teegisto Parao, ak lugennyi tugul, ak karisiekyik, ak bikyik che lanyei mbartanyisiek.

¹⁸ Ak konai Misrik kole a Jehovah, ye kaanyorune teegisto Parao, ak karisiekyik, ak bikyik che lanyei mbartanyisiek.

¹⁹ Ak kiwa let malaikaiyatab Kamuktaindet ne kiindoe tuiyetab Israel, ak kiwa toloitab boldet ne kimi tainywa, kotonone let:

²⁰ ak kitonone kwenutab tuiyetab Misrik ak tuiyetab Israel; ak kimi boldet ak mesundeito, ago kiiluu boldanato kemoi: ak kima rikyin tuiyosiechoto kemout komugul.

²¹ Ak kichuul Musa eunnyi kotokyi nyanjet; ak kiiyok Jehovah usonet ne bunu kong’asis kous kemout komugul, koweekta nyanjet kwo let, ak kipcheigei beek.

²² Ak kiba lagokab Israel kobun emet ne yaamat eng’ kwenutab nyanjet: ak kitoten beek eng’ komostab tai ak eng’ komostab katam.

²³ Ak kiisub Misrik ichek, kochorjigei kwenutab nyanjet, mbartanyisiek tugul che bo Parao, ak karisiekyik, ak bikyik che lanyei mbartanyisiek.

²⁴ Ak eng’ ripset ne bo karon, kogeerot Jehovah lugetab Misri, kogeerune toloitab mat ak ne bo boldet, ak kiinyalil lugetab Misrik.

²⁵ Ak kiichun kelyekab karisiekwak, kong’onng’onio, kot ko ye kikwerie, ko uuen: kot kole anyun Misrik, Ongemwee Israelik; amu yaei Jehovah luget agobo ichek, konyo kobarech achek Misrik.

²⁶ Ak kilenji Jehovah Musa, Chuul eung’ung’ tokyi nyanjet, si kobiit koweeigei beek kotuch Misrik, koboto karisiekwak, ak bikwak che lanyei mbatanyisiek.

²⁷ Ak kichuul Musa eunnyi kotokyi nyanjet ak kiweeigei beek kotuiyo ko u yegonye ko kaeech; ak kimwei Misrik ye kingogeer beek kotokyingei icheget; ak kitoorji Jehovah Misrik kwenutab nyanjet.

²⁸ Ak kiweeigei beek, komaluuch karisiek, ak bik che lanyei mbartanyisiek, agot luget tugul ne bo Parao ne kiisubi ichek kobendi nyanjet; kima ng’et agot agenge eng’ ichek.

²⁹ Ago kibun lagokab Israel emet ko kagoyaam eng’ kwenutab nyanjet; ak kitoten beek eng’ komosi ak komosi.

³⁰ Kisor Jehovah anyun Israel ko u noto eng’ betunoto eng’ eunekab Misrik; ak kigeer Israel Misrik ko kagobek komi ngegutab nyanjet.

³¹ Ak kigeer Israel boisiet ne kim ne kiyachi Jehovah eng’ Misrik, ak kiiywei bik Jehovah: ak kiiyan Jehovah, ak Musa otwogindennyi.