KOMONG'U 12 - BUKUIT NE TILIL

Ketau yaetab Paska

¹ Ak king’alalji Jehovah Musa ak Aron eng’ emetab Misri, kolenji,

² Egu arawani taunetab arawek eng’ okwek: egu arawet ne bo tai ne bo kenyit eng’ okwek.

³ Omwachi tuiyet komugul ne bo Israel olenji, Ingonam chi age tugul aruet eng’ betutab taman ne bo arawani, ko u ole te gorikab kwanisiekwak, aruet eng’ got age tugul:

⁴ ak ngo ng’ering’ bik eng’ gab chi eng’ aruanato, ko kanyol anyun koyomogei chitab goyoto ak chito ne rubegei gonnyi ak nenyinet, ko u koitetab bik; oiityi got age tugul che te che imuchi koam chi.

⁵ Egu arueng’wong’ ne libwob, mengit ne masiirei kenyit agenge: oleweni eng’ kechirek, anan ko eng’ ng’ororek:

⁶ ak otaban agoi koit betutab taman ak ang’wan ne bo arawanito: si koeny tuiyet komugul ne bo Israel aruanato koskoleny.

⁷ Ak konam ichek korotik, koiile tugatugik tuwai ak rateiywotab tugatuk, eng’ gorik ole kiame aruanato.

⁸ Ak koam banyechato kemounoto, che kagiwatan eng’ ma, koamda makatinik che ma kinde mermerek; koboto ngwek che ng’wonen.

⁹ Amoam ko tuonen, amat koyo agot kitigin eng’ beek, ago kiwatani; metit ak kelyek ak tugukab ke.

¹⁰ Amat kong’et agot kitigin kot koeekyi; ago ne kang’et agoi koeech obeel eng’ ma.

¹¹ Oam anyun ko u ni; ko kaoratge, ko kaolaach kweonikwok, oting’e eunekwok kirokwek: ak oam ochokyini: nito ko paska ne bo Jehovah.

¹² Amu abunoti kwenutab emetab Misri eng’ kemounoto, ak abar taiywek tugul eng’ emetab Misri, che bo bik ak che twatei tiong’ik; ak aruokyi cheptalelisiek tugul che bo Misri: a Jehovah.

¹³ Ak koek korotichoto kaborunet eng’ okwek eng’ gorikwok eng’ ole omi; ak ye ageer korotik, asiirtoenok, ak maityinok koroato konyo kong’emak, ye abare emetab Misri.

¹⁴ Ak egu betunito kabwatet eng’ okwek, ak orib kobunji igorta ne bo Jehovah; oyai igorito koek ng’atutiet eng’ ibinwekwok tugul agoi koigeny.

¹⁵ Oam makatinik che ma kinde mermerek betusiek tisab; oistoi eng’ gorikwok mermerek agot eng’ betut ne bo tai: amu king’etoi age tugul eng’ Israel ne kaam makatinik che mi mermerek eng’ betut ne bo tai agoi betut ne bo tisab.

¹⁶ Ak koek eng’ okwek betut ne bo tai kayumetab ge ne itabanat, ak koek eng’ betut ne bo tisab kayumetab ge ne itabanat; magiyaei boisio age tugul eng’ betusiechoto, kobate kochob chi age tugul amitwogik che amei, oyae choto kityo.

¹⁷ Ak orib igorta ne bo makatinik che ma kinde mermerek; amu kaamoong’u eng’ betunito lugosiekwok komong’une emetab Misri: amu noto anyun orib betunito eng’ ibinwekwok tugul koek ng’atutiet ne bo koigeny.

¹⁸ Oame anyun makatinik che ma kinde mermerek, eng’ arawet ne bo tai, eng’ koskoleng’utab betutab taman ak ang’wan, agoi koskoleng’utab betutab tiptem ak agenge.

¹⁹ Maginyorjin gorikwok mermerek eng’ betusiechoto tisab: amu king’etoi eng’ tuiyetab Israel, age tugul ne amei ne kaginde mermerek, ngo ne kiprutoiyo, anan ne kigisikyin emonito.

²⁰ Moame kiy age tugul ne kaginde mermerek; oame makatinik che ma kinde mermerek eng’ meng’otosiekwok tugul.

²¹ Kiguur anyun Musa boisiek tugul che bo Israel, kolenji, Oba olewenote eng’ akwetab kechirek kobeeate gab chi, ak oeny koek tiseiywotab paska.

²² Ak onam ratutietab ketik che kiguure husop, ak orooch korotik che mi tabet, ak oise rateiywotab tugatuk ak tugatugik tuwai eng’ korotik che mi tabet; amat komanda chi sang’ agoi koeech.

²³ Amu nyo kosiirtoi Jehovah kowendi kobarei Misrik; ak ye keer korotik eng’ rateiywotab tugatuk ak eng’ tugatugik tuwai, kosiirto Jehovah eng’ kurganato, ak ma chamjin ng’emindet komong’ gorikwok nyo kobarak.

²⁴ Oribe anyun ng’olyondoni koek ng’atutiet eng’ inye ak weriguk koigeny.

²⁵ Ak ye tun oit emet ne konok Jehovah, ko u ye kigoaror, orib anyun boisionito.

²⁶ Ak ye tun teebenak lagokwok, kole, Bo nee boisionito?

²⁷ Olenji anyun, Tiseiywot ne bo paska ne bo Jehovah, ne kisiirtoe gorikab lagokab Israel eng’ Misri, ye kibarei Misrik, ak kisor gorikyok. Ak kiing’urukso bik kolos Jehovah.

²⁸ Kiba anyun lagokab Israel koyai ko u noto; ko u ye kiga ng’at Jehovah Musa ak Aron, kiyai anyun ko u noto.

Koroito ne bo taman, ak komandoi Israelik eng’ Misri

²⁹ Ak kingoit kemoi kwen, kobar Jehovah taiywek tugul eng’ emetab Misri, koboch taita ne bo Parao ne kitebe ng’echerennyi ne bo bounatet, agoi taita ne bo luulenet ne ki ratat eng’ keringet; ak tugul che kitwatei tiong’ik.

³⁰ Ak king’eet Parao kemoi, koboto otwogikyik tugul, ak Misrik tugul; ak kibiit kateiyet ne o eng’ Misri; amu kima ng’et got agot agenge ne kima me chi.

³¹ Ak kiiyokto keguur Musa ak Aron kemoi, kolenji, Ong’eetye, oba eng’ oldab bikyuk, okwek koboto lagokab Israel; oba, oboisiechi Jehovah, ko u ye kiomwa.

³² Okweri kechirekwok ak tukwok, ko u ye kiomwa, oba; ak oberura agane.

³³ Ak kiichirjir Misrik bik kochakta komanda eng’ emet; amu kile, Kagibegu tugul.

³⁴ Kinam anyun bik makatinik che tuonen che tomo kinde mermerek, ak terenikwak che kikwang’e makatinik, ak koratita ngoroikwak, yeityo konde tigigoikwak.

³⁵ Ak kiyai lagokab Israel ko u ng’olyotab Musa; ak kisom Misrik tugukab feda, ak tugukab tahabu, ak ngoroik:

³⁶ ak kiigochi Jehovah Misrik kocham Israelik, ak kiigochi kiy age tugul ne kisom. Ak kinyaban anyun tugukab Misrik.

³⁷ Kiba anyun lagokab Israel kong’eetye Rameses agoi koit Sukot, ki negit murenik elfusiek bogol lo, che kibendi eng’ kelyek, ko ma kiitito lagok.

³⁸ Kiba koboto icheget tuiyet ne o ne bo bik alak tugul che terotin; koboto kechirek, ak tuga che chang’.

³⁹ Ak kibeel makatinik che mengechen che kima kinde mermerek eng’ makatinichoto tuonen che kiibune Misri, amu kima kinde mermerek; amu kigion eng’ Misri, ak kimata komuch kogagei, ak kitom kochopchigei amitwogik alak tugul.

⁴⁰ Kiga kotebe anyun lagokab Israel Misri kenyisiek bogol ang’wan ak sosom.

⁴¹ Ak kingobata kenyisiechoto bogol ang’wan ak sosom, komanda eng’ betunoto lugosiek tugul che bo Jehovah eng’ emetab Misri.

⁴² Egu kemout ne kanyol kibwate Jehovah amu kiimut ichek komandae emetab Misri: nito ko kemoutab Jehovah, ne ibwati mising’ lagokab Israel tugul eng’ ibinwekwak tugul.

⁴³ Ak kilenji Jehovah Musa ak Aron, Ni ko ng’atutiet ne bo paska; maamei kipsagarin:

⁴⁴ ago amei otwogindet ne kigiale siling’isiek, ne kigiyatita, ne bo chi age tugul.

⁴⁵ Maamei bunotyot anan otwogindet ne nyoru melekto.

⁴⁶ Kiame got agenge; amat oib beny komanda sang’ agot kitigin; amat oiri kowet age tugul.

⁴⁷ Ingoyai ko u noto tuiyet komugul ne bo Israel.

⁴⁸ Ak ngo rutochin kiprutoiyot, ne machei koripchi Jehovah paska, ko kanyol kimuratan werikyik tugul, ak korikyi anyun eng’ yoto ak korib; ak kogergeit ak ne kigisikyi emeng’wong’; ago amongoam chi age tugul ne makiyatita.

⁴⁹ Mi ng’atutiet agenge eng’ ne kigisikyin emeng’wong’, ak toondet ne rutochinok.

⁵⁰ Kiyai ko u noto lagokab Israel tugul; ko u ye king’at Jehovah Musa ak Aron, kiyai ko u noto anyun.

⁵¹ Ak kiimaanda Jehovah betunoto lagokab Israel eng’ emetab Misri eng’ lugosiekwak.