KOMONG'U 11 - BUKUIT NE TILIL

Baret ne kinyonjin werik che bo tai ak twateiywekab tuguk tugul

¹ Ak kilenji Jehovah Musa, Kang’et koroito agenge ne ta aipchini Parao, ak Misrik; ak ye ibata kochamwok obe eng’ olito: ak ye kagochamwok obe, koonok okwek obe agoi.

² Mwachi anyun bik kogas eng’ itikwak, ingosom chi age tugul chitab kokwennyi, ak ingosom kobogoriot age tugul ne bo kokwennyi, tuguk che bo feda, ak tuguk che bo tahabu.

³ Ak kiigochi Jehovah bik chamet eng’ taitab Misrik. Kogeny ko ki toogunot mising’ Musa eng’ emetab Misri, eng’ taitab otwogikab Parao, ak eng’ taitab bik.

⁴ Ak kile Musa, Kamwa ko u ni Jehovah, Alabuli Misri ko negit kemoi kwen:

⁵ ak kobek taiywek tugul eng’ emetab Misri, koboch taita ne bo Parao ne tebe ng’echerennyi ne bo bounatet, agoi taita ne bo kwondo ne otwogindet ne ng’aisei; ak kirgit age tugul ne twatei tiony age tugul.

⁶ Ak kobiit kateiyet ne o eng’ emetab Misri komugul, ne kitom kobiitu ne u noto, ak ma kobiitu ne u noto kogeny.

⁷ Ago eng’ lagokab Israel ko mami agot seset ne imuchi koseng’eng’ji chi anan tiony: si kobiit onai ole ibestos Jehovah Misrik ak Israel.

⁸ Ak kochorgei otwogichuguk kobwa ole ami, kong’urukso eng’ ole ami, kolen, Mande, ak bik tugul che isubin: ak ye ibata noto amande anyun. Ak kiwa Musa eng’ ole mi Parao eng’ neregek che laldos.

⁹ Ak kilenji Jehovah Musa, Machamei Parao kogasak; si kobiit kotesogis kochang’a kwong’utikyuk eng’ emetab Misri.

¹⁰ Ak kiyai Musa ak Aron kwong’utichuto tugul eng’ taitab Parao: ak kiiuuiit Jehovah muguleldab Parao, ak kima chamji lagokab Israel koba eng’ emennyi.