KOMONG'U 10 - BUKUIT NE TILIL

Koroito ne bo sisiit ak ne bo sogol

¹ Ak kilenji Jehovah Musa, Ui gab Parao: amu kaauuiit muguleldanyi, ak mugulelwekab otwogikyik, si kobiit abarta kaborunoichu eng’ kwenunywa:

² ak si kobiit imwa kogas wering’ung’, ak mochogoreng’ung’, tuguk che kiayai eng’ Misri, ak kaborunoikyuk che kiayai eng’ kwenunywa; si kobiit onai ole a Jehovah.

³ Kiba anyun Musa ak Aron gab Parao, ak kolenji, Kamwa ko u ni Jehovah, Kamuktaindet ne bo Hebranik, Iesioi kot kotianit si iming’inige eng’ tainnyu? Unde bikyuk koba, koba koboisiewa.

⁴ Amu ngiesie iunde bikyuk koba, keero, ayokyini chereng’endet mutai emeng’ung’:

⁵ ak tuchei emet, kot ko maimuchi chi kogeer emet: ak koam tuguk tugul che ng’etu, che kong’etwok eng’ koikab ropta, ak koam ketit age tugul, ketikwok che bitos eng’ emet:

⁶ ak nyiiei goriguk ak gorikab otwogiguk, ak gorikab Misrik tugul, che kitomo kogeerei kwanisieguk anan aguiywogiguk, koboch betut ye kingobiit agoi kora. Ak kiwelelgei kwo eng’ ole mi Parao.

⁷ Ak king’alal otwogikab Parao, kolenji inendet, Egu mestet chichi eng’ achek kot kotianit? Igochi bik koba, koba koboisiechi Jehovah Kamuktaindenywa: tos tom inai ile kogome Misri?

⁸ Ak kigimutyi Musa ak Aron Parao kogeny: ak kilenji inendet ichek, Oba, oboisiechi Jehovah Kamuktaindeng’wong’: ago ngorjo che bendi?

⁹ Ak kile Musa, Kibendi koboto neranikyok, ak boisiekyok, ak werikyok, ak tibikyok, kikwerie nekyok ak tukyok; amu kanyol keyachi Jehovah igorta.

¹⁰ Ak kilenji inendet ichek, Ingoteb Jehovah kobotok ko u ye achamwok obe koboto lagokwok; ogeero, mi kiy ne ya taing’wong’.

¹¹ Ma u noto: oba okweget murenik, oba oboisiechi Jehovah; amu noto ne omache. Ak kigion ichek koba eng’ ole mi Parao.

¹² Ak kilenji Jehovah Musa, Tokyi eung’ung’ emetab Misri si kobwa chereng’enyinik kotogos emetab Misri, si koam ket age tugul ne tuon ne bo emet, agot tugul che kong’etune koikab ropta.

¹³ Ak kitokyi Musa siarinnyi emetab Misri, ak kigon Jehovah usonet ne bunu kong’asis kousyi emet betunoto komugul, ak kemout komugul; ak kingoeech, koib usonetab kong’asis chereng’endet.

¹⁴ Ak kitogos chereng’endet koyom emet komugul ne bo Misri, ak kiru kobochit emet tugul ne bo Misri; ki koromen kot; kitom kobiitu chereng’endet ne u noto, ama kobiitu kogeny ne u noto.

¹⁵ Amu kituch emet komugul, kot koimenit emet; ak kiam ket age tugul ne tuon ne mi emet, ak logoek tugul che bo ketik che king’etune koikab ropta: ak kima ng’et ket age tugul ne nyalil, anan ket age tugul ne tuon ne mi timin, eng’ emet komugul ne bo Misri.

¹⁶ Kiiyokto anyun Parao keguur Musa ak Aron kochok; ak kolenji, Kaayachi tengekto Jehovah Kamuktaindeng’wong’, ak kaayaiywok okwek.

¹⁷ Noton anyun, asain ale nyoiywa kaat amu tengektanyu nito inegei, ak osa Jehovah Kamuktaindeng’wong’, koistoena meoni kityo.

¹⁸ Ak kiwa eng’ ole mi Parao, kwo kosa Jehovah.

¹⁹ Ak kiwal Jehovah usonet ne kim mising’ kousune cherongo, ne kiib chereng’endet, ak koon kwo Nyanjet ne Birir; ma ng’et chereng’endet agot agenge eng’ emet komugul ne bo Misri.

²⁰ Ago kiiuuiit Jehovah muguleldo ne bo Parao, ak ma unda lagokab Israel koba.

²¹ Ak kilenji Jehovah Musa, Chuul eung’ung’ tokyi kipsengwet, si kobiit mesundeito eng’ emetab Misri, mesundeito ne kitung’dung’ioti.

²² Ak kichuul Musa eunnyi kotokyi kipsengwet; ak kibiit mesundeito ne o mising’ eng’ emet komugul ne bo Misri eng’ betusiek somok;

²³ kima imuchi chi kogeer chi, ak kima ng’et chi eng’ ye tebe eng’ betusiechoto somok: ago kilapkeen meng’otosiek tugul che bo lagokab Israel.

²⁴ Ak kiguur Parao Musa, kolenji, Oba, oboisiechi Jehovah; ago obagakte nekwok ak tukwok kotebi: ak omut lagokwok agichek.

²⁵ Ak kile Musa, Kanyol igonech che kienyei ak kagochinoik che kibeelei, si kobiit keeng’ji tiseiywek Jehovah Kamuktaindennyo.

²⁶ Kikwerie akwotisiekyok agichek; mang’etu agot agenge; amu choto che kekwerie si keboisiechine Jehovah Kamuktaindennyo; ak magingen kit ne kanyol keboisiechine Jehovah, agoi tun keit oloto.

²⁷ Ago kiiuuiit Jehovah muguleldab Parao, ak kima chamji ichek koba.

²⁸ Ak kilenji Parao Musa, Ui eng’ ole ami, iripge, amata igeera togoch kogeny; amu imee eng’ betut ne igeere togennyu.

²⁹ Ak kile Musa, Kemwa komie; ma ageerin togoch kogeny.