KOMONG'U 1 - BUKUIT NE TILIL

Kinyalili Israelik eng’ Misri

¹ Chu anyun kainaikab werikab Israel, che kiit Misri; kiwa chi tugul ak gonnyi koboto Jakobo:

² Reuben, Simeon, Lawi, ak Juda;

³ Isakar, Sebulun ak Benjamin;

⁴ Dan ak Naptali, Gad ak Aser.

⁵ Ki tamanwogik tisab bik tugul che kimong’une bortab Jakobo; ak kimi ine Josep Misri.

⁶ Ak kime Josep, ak tupchosiekyik tugul, ak bik tugul che bo ibinato.

⁷ Ak kiiyo mising’ bikab Israel, ak kotesogis kochang’ait, ak kogimegitu kot; ak kiyom ichek emet.

⁸ Ak kibiit laitoriat age ne kiboi Misri, ne kima kongen Josep.

⁹ Ak kilenji bikyik, Ogeero, chang’ bikab werikab Israel kosiirech ago kimen:

¹⁰ ongeng’omenji anyun, si matesogis; amu nda biitu boriet, konamegei ak bunikyok, ak koborienech, ak koba komanda eng’ emoni.

¹¹ Kiinde anyun amu noto kiptainikab boisiet si kobiit konyalil ichek eng’ boisionikwak che nyigisen. Kiteekyi anyun Parao nganasok che kigiguure Pitom ak Raamses, ole kigonore tuguk.

¹² Ago ye kingotesak kanyalilet ne kiginyalili ichek, kotesogis agichek kosiir, ak koyom emet. Ak kiimgei kot Misrik agobo lagokab Israel.

¹³ Ak kibirji Misrik lagokab Israel kobois kobirtogei:

¹⁴ ak kiigochi sobonwekwak kong’wonegitu eng’ otwognatet ne korom; eng’ boisietab menet ak matabaruk, ak boisionik alak tugul che bo emet, otwognatenywa tugul ne kiyai, kigigochi koyai boisiet kobirtoegei.

¹⁵ Ak king’alalji laitoriatab Misri chebiosokab sigisio che bo Hebranik: kigiguure age Sipra, ak kigiguure age Pua:

¹⁶ kilenji, Ye osigisiechi kwonyik che bo Hebranik, ak ye ogeer lakwet ne kagisich; ngo ng’etet, obar; ago ngo chepto, obagakte kosob.

¹⁷ Ago kiiywei chebiosochato bo sigisio Kamuktaindet, ak kima yai ko u ye kiga mwachi laitoriatab Misri, ago kisor ng’etik kosopcho.

¹⁸ Ak kiguur laitoriatab Misri, chebiosochato bo sigisio, konyo kolenji, Amu nee si oyai kii, ounde ng’etik kosopcho?

¹⁹ Ak kilenji chebiosochato bo sigisio Parao, Amu ma kergei kwonyikab Hebranik ak che bo Misrik; amu sib kosichei kotom koit chebiosetab sigisio.

²⁰ Ak kiyachi Kamuktaindet ne mie chebiosochato bo sigisio: ak kitesogis bik, ak kogimegitu mising’.

²¹ Amu kiiywei chebiosochato bo sigisio Kamuktaindet, kiiberur anyun ichek kotesogis ortinwekwak.

²² Ak king’at Parao bikyik kolenji, Owirjini ainet werit age tugul ne kisichei, ak ounde chepto age tugul kosob.