KOLOSAIK 4 - BUKUIT NE TILIL

¹ Kiptainichu, ogochini otwogikwok noto ne bo imanda ak ne nyolu; ongen ole otinye ak okwek Kiptaiyat eng’ kipsengwet.

² Ogiilige kotugul eng’ saet, oripsei eng’ noto koboto kongoi;

³ osaiywech ak achek, si koyatwech Jehovah kurget ne bo ng’olyot, kemwa ung’otietab Kristo; kigirata agobo noto;

⁴ si abortoi, ko u ye nyolu amwa.

⁵ Obendoti eng’ ng’omnatet eng’ taitab icheget che mi sang’, ingoek saisiek kamanut eng’ okwek.

⁶ Ingoteb ng’alekwok eng’ mieindo kotugul, koanyinyogis eng’ munyuk, si kobiit onai ole kanyol owoljinde chi age tugul.

Kagatosiekab Paulo inegei, koboto ng’alek che bo let

⁷ Mwawok ng’alekyuk tugul Tukiko, tupchet ne chamat, ak ko kiboitiot ne iyanat, inendet otwogindet ne kiboisiei tuwai eng’ Kiptaiyat:

⁸ ne koayokwok amu ng’olyondonito, si kobiit onai atebennyo, si kogaigai mugulelwekwok;

⁹ koboto Onesimo, tupchet ne kiyani ak ko chamat, ne age eng’ okwek. Mwawok ichek tuguk tugul che bo olito.

¹⁰ Igatok Aristarko ne ki kimonjororinik tuwai, ak Mariko ne tupchetab Barnaba (kionyoru ng’alek agobo inendet; ngo nyonjok, otaach),

¹¹ ak Jesu, ne kiguure Justo, icheget che bo che imuratonotin: chuto kityo che keboisiei tugul agobo bounatetab Jehovah, icheget che kigoek kagaigaet eng’ ane.

¹² Igatok Epapra, ne age eng’ okwek, otwogindetab Kristo Jesu, igiilegei kotugul agobo okwek eng’ sautikyik, si kobiit otononse ko ogesunotingei, ak ongen komie maget tugul ne bo Jehovah.

¹³ Amu abaoriani agobo inendet, ale tinyei kagiiletab ge ne o agobo okwek, ak agobo ichek che mitei Laodikia, ak ichek che mitei Hierapoli.

¹⁴ Igatok Luka, chepkerichot ne chamanet, ak Dema.

¹⁵ Ogat tupchosiek che mitei Laodikia, ak Numpa, ak kaniset ne mitei gonnyi.

¹⁶ Ak ye kagesoman baruani eng’ kwenung’wong’, ogoite kesoman agine eng’ kanisetab Laodikiek; ak osoman ak okwek baruanin bo Laodikia.

¹⁷ Ak omwachi Arkipo olenji, Rib boisiet ne kiitaach eng’ Kiptaiyat, si kobiit iyai kosulda.

¹⁸ Kagatennyu ane Paulo eng’ eunnyu. Obwat monjorornatennyu. Ingoteb mieindo kobotok.