KOLOSAIK 2 - BUKUIT NE TILIL

¹ Amu amache onai ole agiilige mising’ agobo okwek, ak ichek che mi Laodikia, ak alak tugul che tomo kogeera togoch eng’ borto;

² si kobiit kigaigai mugulelwekwak, ak keropchin eng’ chamnyet, ak eng’ magornatosiek tugul che bo nyiietab kaguiyet, si kobiit konai ichek ung’otietab Jehovah, inendet Kristo,

³ kigiuny eng’ inendet konoraik tugul che bo ng’omnatet ak naet.

Katuiyet koboto Kristo. Kiteechin bik si maiyan ng’omnatosiek che ma bo iman

⁴ Amwae nito ale, si magenak chi age tugul eng’ ng’alekab lomset.

⁵ Amu agot ngo mami ane eng’ borto, ami kobotok eng’ tamirmiriet, ko abaibai eng’ atebeng’wong’, ne ageere, ak kimnatetab kayaneng’wong’ eng’ Kristo.

⁶ Ko u ye kiotaach anyun Kristo Jesu Kiptaiyat, obendate eng’ inendet,

⁷ ko o lumdootin ak ko o teegotin eng’ inendet, ak kigimitok eng’ kayaneng’wong’, ko u ye kiginetak, otese omwae kongoi.

⁸ Oripge si maluulok chi age eng’ ng’omnatennyi ak kaberberisiet ne bo buch, eng’ bitonwekab bik, eng’ konetisiosiek che bo tai che bo ng’ony, ak ma eng’ Kristo:

⁹ amu menyei eng’ inendet eng’ borto nyiiet tugul ne bo Jehovah,

¹⁰ ak keyaok oegu che nyiitotin eng’ inendet, ne metitab bounatet tugul ak kimnatet:

¹¹ kigimuratanak eng’ inendet eng’ kamuratanet ne kima kiyae eunek, eng’ istoetab bortab banyek, eng’ kamuratanetab Kristo;

¹² ko kagetubok koboto inendet eng’ kabatisanet, ak kiging’eetak eng’ noto koboto inendet amu kayanet eng’ yaet ne yaei Jehovah, ne kiing’eet inendet komong’ eng’ che kibek.

¹³ Ak okwek, che kio begunotin eng’ yaitwogikwok ak borwekwok che ma kimuratan, kiisoobok okwek, koboto inendet, ko kagonyoiywech kaat yaitwogikyok tugul;

¹⁴ ko kagobuch siret ne bo arorutik ne kiga kogikyech, ne kiranyech: ak kigoisto, kobirji kimurtoiyot;

¹⁵ ko kagorek bounatosiek ak kimnatosiek, kobor kotook, koterteri ichek eng’ kimurtoiyot.

¹⁶ Noto anyun amat koruokwok chi age tugul agobo amitwogik, anan agobo che kieei, anan agobo betutab igorta anan agobo arawet ne kaleel anan betutab sabato:

¹⁷ che uruetab tuguk che bwanei; ago borto ko bo Kristo.

¹⁸ Amat korebenak chi melektang’wong’ eng’ oret ne machei inendet, ne bo kaming’inetab ge ak kalosunetab malaikaisiek, ak kogimitegei tuguk che kigogeer, ak komene kabwatutikyik che bo borto,

¹⁹ ama namei komie Metit, ne nyorune borto tugul teset eng’ teset ne bunu Jehovah, ko kagonyor tugul, ak konamatgei eng’ kabeberwek ak tigitik.

²⁰ Ko u ye kiobegu koboto Kristo omong’une konetisiosiek che bo tai che bo ng’ony, amu nee anyun si ogas it arorutik, ko u ye osoptosi eng’ ng’ony,

²¹ amonam, anan ochamjam, anan otwa

²² (betos tuguchuto tugul ye kiboisie), ko u ng’atutik ak konetisiosiekab bik?

²³ Tinyei tuguchoto kaborunet ne bo ng’omnatet eng’ chamet ne bo kalosunet, ak eng’ kaming’inetab ge, ak nyalilda ne kinyalili borto; matoreti kiy age tugul eng’ katerteretab magutikab borto.