KOLOSAIK 1 - BUKUIT NE TILIL

Kagatet

¹ Paulo, ne kiyoktoi ne bo Kristo Jesu eng’ magetab Jehovah, ak Timoteo tupchennyo,

² kisirjini che tililen che kitupche che iyanotin eng’ Kristo, che mi Kolosai: Ingotebi kobotok mieindo ak kalyet che bunu Jehovah Kwandanyo.

Kongoi ak saet

³ Kigochini kongoi Jehovah Kwandab Kiptaiyandenyo Jesu Kristo, kesaiywok kotugul,

⁴ ye kingegas agobo kayaneng’wong’ eng’ Kristo Jesu, ak chamnyet ne oting’e tugul che tililen

⁵ amu kamang’unet ne kigegonoruok eng’ kipsengwet, ne kiosib ogas eng’ ng’olyotab imanit ne bo logoiywek che miach,

⁶ ne kigoityok; ko u ole teptoi agine eng’ ng’ony komugul koiyiei logoek ak ko tesoksei, ko u eng’ okwek, koboch betut ne kiogas ak onai mieindab Jehovah eng’ iman;

⁷ ko u ye kionetge eng’ Epapra chamanennyo ne kiboisiei tugul, ne kiboitiot ne iyanat ne bo Kristo agobo achek,

⁸ ne kiiboruech chamnyeng’wong’ ne mi eng’ Tamirmiriet.

⁹ Amu nito anyun, ko magimete kesa ak kesom agobo okwek koboch betut ne kingegas, kele konyiiak naetab magennyi eng’ ng’omnatet tugul ne bo tamirmiriet ak kaguiyet,

¹⁰ si obendate ko u ye nyolu eng’ Kiptaiyat, oboiboi inendet, oitosi logoek eng’ boisiet age tugul ne mie, ak otesage eng’ naetab Jehovah;

¹¹ kigimitok eng’ kamuktaet tugul, ko u kamugetab torornatennyi, agoi muitaet tugul ak talasiet eng’ boiboiyet,

¹² ogochini kongoi Kwanda, ne kiyaech keegu che nyoljin keyamde borotetab che tililen eng’ lapkeiyet;

¹³ ne kisoruech kemong’une kimnatetab mesundeito, ak kouutech kebe bounatetab Werit ne bo chamnyennyi;

¹⁴ ne kitinye eng’ inendet katiagennyo, nyoetab kaat ne bo tengekwogikyok.

Kristo inendet ak boisiennyi

¹⁵ Inendet itondab Jehovah ne ma toogu, inendet ne kisib kesich eng’ kit age tugul ne kigitoi keyai;

¹⁶ amu kigitoi keyai tuguk tugul eng’ inendet, che mi kipsengwetisiek ak che mi ng’ony, tuguk che toogu ak tuguk che ma toogu, anan laitornatosiek, anan kiptainatosiek, anan bounatosiek anan kimnatosiek; kigitoi keyai tuguk tugul eng’ inendet ak ko bo inendet;

¹⁷ ak bo tai inendet eng’ tuguk tugul, ak namegei tuguk tugul eng’ inendet.

¹⁸ Ak inendet metitab borto, noto kaniset: inendet taunet, taunindetab che kimong’ eng’ che kibek; si kobiit koek ne o eng’ tuguk tugul.

¹⁹ Amu kichamak komie kele komeny nyiiet tugul eng’ inendet;

²⁰ si kotuiyechigei tuguk tugul inendet, ye kingo kagoyai kalyet eng’ korotikab kimurtoiyondennyi; eng’ inendet, ngo tuguk che mi ng’ony anan tuguk che mi kipsengwetisiek.

²¹ Ak nganda kio kipsagarek eng’ betusiek che kigosiirto, ak kio bunik eng’ kabwatutikwok eng’ boisionikwok che yaachen, ko kagotuiyok inendet nguno,

²² eng’ bortanyi ne bo banyek, eng’ meet, si kobiit komutak ko o tililen ko motinye tisia, amotinyei kiy ne kiruogunenok eng’ tainnyi:

²³ ngotebi iman eng’ kayanet, ko o lumdootin ak ko o tononiotin komie, ama kiistok eng’ kamang’unetab logoiywek che miach che kiogas, che kigiamda eng’ yautiet tugul eng’ kureretab kipsengwet; kigiyaa ane Paulo amu noto aek kiboitiot.

Koboisiei Paulo kibagenge ak Kristo

²⁴ Abaibai anyun nguno eng’ nyalilwogikyuk agobo okwek, ak anyiiti eng’ komostanyu noto ne rarunot agobo nyalilwogikab Kristo eng’ bortanyu agobo bortanyi, noto kaniset;

²⁵ ak, kigiyaa agobo noto aek kiboitiot, eng’ tononjinetab Jehovah ne kigigona amu okwek, si ayai ng’olyotab Jehovah kosulda,

²⁶ ung’otiet ne kigiuny koboch kenyisiek tugul che kigosiirto ak ibinwek: ago nguno, ko kagiborji chechik che tililen,

²⁷ che kicham Jehovah kong’ang’ji kit ne u magornatosiekab torornatet ne bo ung’otionito eng’ Bororiosiek, noto Kristo eng’ okwek, kamang’unetab torornatet:

²⁸ inendet ne kimwaitoi, ak kiteechini chi age tugul ak kineti chi age tugul eng’ ng’omnatet tugul, si kobiit kimut chi age tugul kogesunotgei eng’ Kristo;

²⁹ abirtochinige agine noto, agiilige ko u boisiennyi, ne boisiei eng’ ane eng’ kamuktaet.