KIRUOGIK 9 - BUKUIT NE TILIL

Laitornatetab Abimelek, ak meennyi

¹ Ak kiwa Sekem Abimelek weritab Jerubaal oldab gab imamet, ak kong’alal ak ichek, ak bik tugul che bo gotab kwandab kamennyi kolenji,

² Kaigai omwachi bik tugul che bo Sekem kogas ngo mie eng’ okwek koboiywok werik tugul che bo Jerubaal che tamanwogik tisab, anan boiywok agenge? Obwat kogeny ole a kowekwok ak ko a banyekwok.

³ Ak kimwachi imamosiekyik bik tugul che bo Sekem ng’alechato kogas: ak kimach mugulelwekwak kosub Abimelek; amu kimwa kole, Inendet ko ne kitupche.

⁴ Ak kiigochi bichoto inendet fedaisiek tamanwogik tisab eng’ gotab Baal-berit, che kiigaigae Abimelek bik che yaach, che njaamik, che kiisub inendet.

⁵ Ak kiwa gotab kwandanyi eng’ Opra, ak kibarji koita agenge tupchosiekyik werikab Jerubaal, che ki bik tamanwogik tisab: ago king’et Jotam werit ne ming’in ne bo Jerubaal; amu kiunygei.

⁶ Ak kiiyumgei bik tugul che bo Sekem, ak got tugul ne bo Milo, ak koba koyai Abimelek koek laitoriat, eng’ ole negite ketitab toloita ne kimi Sekem.

⁷ Ak ye kingemwachi Jotam, kwo kotonone tulwet barak ne bo Gerisim, ak komwa eng’ kutit ne o, kowaach, kolenji, Ogasa, okwek bikab Sekem, si kobiit kogasak Kamuktaindet.

⁸ Kiba betut age ketik koiil age koek laitoriat ne bou ichek; ak kilenji emdit, Laitoran eng’ achek.

⁹ Ago kilenji emdit ichek, Tos abagakte akwaiyennyu, ne kigonyite bik Kamuktaindet ak bik, ak awe atumdumotegei eng’ baragutab ketik?

¹⁰ Ak kilenji ketik mogoiywet, Nyo ilaitoran eng’ achek.

¹¹ Ago kilenji mogoiywet ichek, Tos abagakte anyinyindanyu, ak logoekyuk che miach, ak awe atumdumotegei eng’ baragutab ketik?

¹² Ak kilenji ketik ketitab sabibuk, Nyo, ilaitoran eng’ achek.

¹³ Ak kilenji ketitab sabibuk ichek, Tos, abagakte divaikyuk, che iboiboi Kamuktaindet ak bik, ak awe atumdumotegei eng’ baragutab ketik?

¹⁴ Yeityo kolenji ketik tugul ketit ne ming’in ne bo katok, Nyo ilaitoran eng’ achek.

¹⁵ Ak kilenji ketoto ming’in ketik, Ngot iman oiila aek laitoriat eng’ okwek, obwa anyun ak omang’u uruennyu: ak ngo ma u noto, ko ingomong’une mat ketit ne ming’in, ak kobeel taragonikab Lebanon koges.

¹⁶ Noto anyun ngo kioyai ne bo iman ak ne litit, ye kioyai Abimelek koek laitoriat, ak ngot ko kioyachi ne mie Jerubaal ak gonnyi, ak kioyachi inendet ko u ye nyoljin boisionikab eunekyik;

¹⁷ (amu kiyai luget baba agobo okwek, ak ma iit sobondanyi, ak kosoruok eng’ eutab Midian:

¹⁸ ak kong’eetyi gotab baba ra, ak kaobar werikyik, bik tamanwogik tisab eng’ koita agenge, ak kaoyai Abimelek, weritab otwogindennyi ne chepto, koek laitoriat eng’ bikab Sekem, amu inendet ko ne otupche;)

¹⁹ ngot ko kioyachi Jerubaal ne bo iman ak ne litit koboto gonnyi rani, oboiboitu anyun eng’ Abimelek, ak ingobaibait agine eng’ okwek:

²⁰ ago ngot ko ma u noto, ko ingomong’ mat eng’ Abimelek, ak kobeel bikab Sekem koges, koboto gotab Milo; ak ingomong’ mat eng’ bikab Sekem, ak eng’ gotab Milo, kobeel Abimelek koges.

²¹ Ak kilabat Jotam komwei kwo Beer, ak komeny oloto, amu kiiywei Abimelek ng’etab kamet.

²² Ak kiek bounindet Abimelek eng’ Israel kenyisiek somok.

²³ Ak kiiyokyi Jehovah tamirmiriet ne ya kwenutab Abimelek ak bikab Sekem; ak kiiberber bikab Sekem Abimelek:

²⁴ si konyo kolgoliet ne kigiyachi werikab Jerubaal tamanwogik tisab, si kotebe korotikwak baragutab tupchenywa, ne kibarei ichek, ak baragutab bikab Sekem, che kiigimit eunekyik si kobar werik che tupcho.

²⁵ Ak kiinde bikab Sekem bik che kiribistos koribei inendet eng’ tulonok barak, ak kirebe tuguk bik tugul che kibunei oranato ki negite ichek: ak kigimwachi Abimelek.

²⁶ Ak kinyo Gaal weritab Ebed koboto tupchosiekyik kolanda koba Sekem: ak kiimang’ inendet bikab Sekem.

²⁷ Ak kiba mbarenywa, koba kobut sabibuk, ak kotui, ak koyai igorta, yeityo koba gotab cheptalelinywa, koamis ak koeeisei, ak kochub Abimelek.

²⁸ Ak kile Gaal weritab Ebed, Ng’o Abimelek, ak ki ng’o achek che kebo Sekem, kot keot inendet? Ma inendet ko weritab Jerubaal? Ak Sebul kiptaiyandennyi? Oot okwek bikab Hamor kwandab Sekem: ago amu nee si keot inendet?

²⁹ Kata kaigai nda kami bichu eunnyu! Ta kaiste Abimelek. Ak kilenji Abimelek, Tes lugeng’ung’ ak imong’u.

³⁰ Ak kingogas Sebul bounindetab nganaset ng’alekab Gaal weritab Ebed, kolalyo neregekyik.

³¹ Ak kiiyokto bik koba oldab Abimelek eng’ ng’alset, kolenji, Keero, kabwa Sekem, Gaal weritab Ebed, ak tupchosiekyik; machei kochaamji bikab nganaset si kobokyin.

³² Noto anyun, ng’eet kemoi, inye, ak bik che mi koboten, ak oribisye eng’ mbar:

³³ ak mutai karon, ko kata kochor asista, isib ing’eet, ak ibokyi nganaset: ak keero, ye kamong’ inendet koboto bik che mi tugul kobokyin, iyachi anyun kit age tugul ko u ye kenyoru boroindo.

³⁴ King’eet anyun Abimelek kemoi ak bik tugul che kimi koboto inendet, ak kiribisyo ichek agobo Sekem eng’ kweanaik ang’wan.

³⁵ Ak kimanda Gaal weritab Ebed, ak kotonon eng’ ole kibunei eng’ kurgetab nganaset: ak king’eet anyun Abimelek ak bik che kimi koboto inendet eng’ ole koga ribisye.

³⁶ Ak kingogeer Gaal bik, kolenji Sebul, Keero, chorugei bik eng’ tulonok barak. Ak kilenji Sebul, Igeere uruetab tulonok ko u bik.

³⁷ Ak kimwa Gaal kogeny kole, Keero, chorugei bik eng’ kwenutab emet, ak nyonei kweanet agenge kobunu oretab ketitab Meonenim.

³⁸ Kolenji anyun Sebul inendet, Mi ano kuting’ung’ nguno, ne koimwa ile, Ng’o Abimelek kot keot inendet? Tos chu ko ma bik che koisase? Mande anyun nguno, kaigai, ak obarge ak ichek.

³⁹ Komanda Gaal kondoe bikab Sekem, ak kobargei ak Abimelek.

⁴⁰ Ak kion Abimelek inendet, ak kimwei eng’ tainnyi, ak kiibutyo che chang’ che kigiguoten, kot koit ole kibunei eng’ kurget.

⁴¹ Ak kimeny Abimelek Aruma: ak kion Sebul Gaal ak tupchosiekyik komanda, si mameny Sekem.

⁴² Ak mutai koba bik mbar; ak komwachi Abimelek.

⁴³ Ak kiimut bik, kopcheune kweanaik somok, ak koribisyo eng’ mbar; ak kigeer, ogeero, kimong’ bik sang’ eng’ nganaset; ak king’eet kobokyi ichek ak kobar.

⁴⁴ Ak kiruai Abimelek ak kweanaik che kimi koboto inendet koba tai, ak kotononso eng’ ye kibunei eng’ kurgetab nganaset: ak kiruai kweanaichoto aeng’u kobokyi che kimi mbar, ak kibar ichek.

⁴⁵ Ak kibargei Abimelek ak nganasanato betunoto tugul; ak kinam nganaset, ak kibar bik che kimi orit: ak kibut nganaset, ak koseerji munyuk.

⁴⁶ Ak kingogas bik tugul che bo teekset ne koi ne bo Sekem agobo ng’olyondonoto, koba irimet orit ne bo gotab Elberit.

⁴⁷ Ak kigimwachi Abimelek kelenji, kagoyumgei bik tugul che bo teekset ne koi ne bo Sekem.

⁴⁸ Ak kitogosta Abimelek tulwetab Salmon, inendet ak bik tugul che kimi koboto inendet; ak kinam Abimelek aiywet eng’ eunnyi, ak koeb temetab ketit, ak konam ak kotiiny kaat: ak kimwachi bik che kimi koboto inendet kolenji, Kit ne kogeer ayai, oyai ochokyi ko u ye kayai.

⁴⁹ Ak kieb chi tugul temennyi ne bo ketit, ak kosub Abimelek, ak konde ichek irimet, ak kobeel irimonoto komi bik orit; kibek anyun agichek bik tugul che bo teeksonoto koi ne bo Sekem, bik che itei elfut agenge murenik ak kwonyik.

⁵⁰ Yeityo kwo Abimelek Tebes, ak koteech kotoorji Tebes, ak konam.

⁵¹ Ago kimitei teeksonoto koi ne kim eng’ nganasanato, ak kimwechi oloto murenik tugul ak kwonyik, koboto ichek tugul che bo nganaset, ak kogerjigei orit, ak kotogosta kwo got barak.

⁵² Ak kinyo Abimelek teeksonoto koi, ak kobargei ak bichoto, ak kiwa korikyi kurgetab teeksonoto koi kole kobeel.

⁵³ Ak kotururji kobogoriot age metitab Abimelek isiet, ak kitui metinnyi.

⁵⁴ Ak kiguur kochokyi Abimelek muren age ne kiipchin karik, kolenji inendet, Ng’usu rotwet, ak ibara, si male bik, Kabar ane, kobogoriondo. Ak kitoor inendet murenonoto, ak kime.

⁵⁵ Ak kingogeer bikab Israel kole kagome Abimelek, kwo chi tugul oldanyi.

⁵⁶ Ak kiyaakta mugetut anyun Kamuktaindet agobo tengektab Abimelek, ne kiyachi kwandanyi, ye kibar tupchosiekyik tamanwogik tisab:

⁵⁷ ak tengekto tugul ne bo bikab Sekem ko kiyaakyi Kamuktaindet mugetut eng’ metowekwak: kinyonji anyun ichek chubetab Jotam weritab Jerubaal.