KIRUOGIK 8 - BUKUIT NE TILIL

Keonati laitorinik

¹ Ak kimwachi bikab Epraim inendet kolenji, Amu nee si iyaiywech ko u ni, si meguurech ye kiiwendi obarge ak Midian? Ak kibolji inendet mising’.

² Kilenji, Koayai nee ne siirei ne kooyai okwek? Tos ma kaigai turetab sabibukab Epraim kosiir kesisietab Abieser?

³ Kogonde Kamuktaindet eunekwok bounikab Midianik, Oreb ak Seeb: ak nee ne kotamuchi ayai ne siirei ne kooyai okwek? Kogesgei anyun neregekwak agobo inendet, ye kingo kagomwa ko u noto.

⁴ Ak kiit Gideon Jordan, ak kolanda, inendet ak murenik bogol somok che kimi koboto inendet, ko kagong’etyo, ago kita koonei.

⁵ Ak kilenji bikab Sukot, Kaigai ogochi makatinik bik che isubwa; amu kagong’etyo, ak aone Seba ak Salmuna, laitorinikab Midian.

⁶ Ak kile bounikab Sukot, Tos mi eunekab Seba ak Salmuna eung’ung’ nguno, kot kigochi makatinik lugeng’ung’?

⁷ Ak kile Gideon, Noto anyun, ye kagonde Jehovah eunekyuk Seba ak Salmuna, abache anyun borwekwok eng’ katokab ong’atet ak katablelinik.

⁸ Kitogosta anyun eng’ oloto kwo Penuel, ak kong’alalji bichoto ko u noto: ak kiwolji inendet bikab Penuel ko u ye kiga wolji bikab Sukot.

⁹ Ak kimwachi bikab Penuel kolenji, Ye aweeige eng’ kalyet, anyone aluuli teeksoni koi.

¹⁰ Kimi Seba ak Salmuna Karkor, koboto lugosiekwak, olo bo bik elfusiek taman ak mut, tugul che king’et eng’ luget tugul ne bo bikab kong’asis: amu kibek bik elfusiek bogol ak tiptem che kiga ng’us rotokab chok.

¹¹ Ak kitogosta Gideon kobun oretab bik che kimenyei emaisiek eng’ komostab kong’asis ne bo Noba ak Jogbea, ak kibar luget; amu kimi luget eng’ kalyet.

¹² Ak kimwei Seba ak Salmuna; ak kion ichek; ak kinam laitorinichoto aeng’ bo Midian, Seba ak Salmuna, ak kiimu lugonoto tugul.

¹³ Ak kiweek Gideon weritab Joas eng’ luget kobun ole kitogostoe ne bo Heres.

¹⁴ Ak kinam muren age ne bo bikab Sukot, ak koteepse: ak kisirji inendet kainaikab bounikab Sukot, ak boisiekab nganaset, bik tamanwogik tisab ak tisab.

¹⁵ Ak kinyo ole mi bikab Sukot, ak kolenji, Ogeero, Seba ak Salmuna, che kiororecha agobo ichek, ole, Tos mi euneguk eunekab Seba ak Salmuna nguno, kot kigochi makatinik biguk che kagong’etyo?

¹⁶ Ak kinam boisiekab nganaset, ak koib katokab ong’atet ak katablelinik, ak kobaage bikab Sukot.

¹⁷ Ak kiiluul teeksonoto koi bo Penuel, ak kobar bikab nganasanato.

¹⁸ Kolenji anyun Seba ak Salmuna, Ki bich nee bik che kiobar eng’ Tabor? Ak kiwolji kolenji, Kit ne i u, ko ki u noto agichek. Ki u inye; ki kergei age tugul ak lagokab laitoriat.

¹⁹ Ak kile, Ki tupchosiekyuk, werikab kamennyu; ko u ye sobei Jehovah, ko nda kigobagakte kosopcho, ko kama kota abarok.

²⁰ Ak kilenji taitanyi Jeter, Ng’eet, ak ibar ichek. Ago ma ng’us rotwennyi bo chok nerananato: amu kiiywei, amu kita ko ming’in.

²¹ Yeityo komwa Seba ak Salmuna, kole, Ng’eet barech: amu ko u kit ne u mureno, ko u noto kimnatennyi. Ak king’eet Gideon, ak kobar Seba ak Salmuna, ak konem karikab lelesta che kimi kaatwekab tambesikwak.

Ng’alek che bo let che bo Gideon, ak meenyi

²² Yeityo komwachi bikab Israel Gideon kolenji, Boiywech inye, ak wering’ung’, ak weritab wering’ung’ agine: amu koisoruech eng’ eutab Midianik.

²³ Ak kilenji Gideon ichek, Maboiywok, ama boiywok werinnyu: boiywok Jehovah.

²⁴ Ak kilenji Gideon ichek, Amagenok teebutiet, ale kogona chi tugul munaokab itik eng’ barunenik. (Amu kitinyei munaokab tahabu che bo itik, amu ki Ismaelik.)

²⁵ Ak kiwol kole, Kigonu eng’ chamnyet. Ak kiito ngoriet, ak kowirji chi tugul munaokab itik che bo barunenik.

²⁶ Ak kiek nyigisindab munaokab itik che bo tahabu, che kiga som inendet, sekelisiekab tahabu elfut agenge ak bogol tisab; ko ma kiit karikab lelesta, ak karik alak che bo kaatit, ak ngoroik che arusen ne birir che kiilachi laitorinikab Midian, ko ma kiit sirimwek che kimi kaatwekab tambesik.

²⁷ Ak kiyai Gideon epod eng’ tuguchoto, ak kiinde nganasennyi, noto ko Opra: ak kiisub Israel tugul kioto koyaat ibetab ge: ak kiek kioto mestet eng’ Gideon ak eng’ gonnyi.

²⁸ Kigiterter anyun Midian eng’ taitab lagokab Israel, mata koyotgei met agoi. Ak kiimuuny emet kenyisiek artam eng’ betusiekab Gideon.

²⁹ Ak kiwa Jerubaal weritab Joas komeny gonnyi.

³⁰ Ak kitinyei Gideon werik tamanwogik tisab che kisichei: amu kitinyei osotik che chang’.

³¹ Ak kisikyi werit agine chebaigeiyandennyi ne kimitei Sekem, ak kiguure kainennyi Abimelek.

³² Ak kiilil Gideon weritab Joas, ak kigitupchi kereritab Joas kwandanyi eng’ Opra ne bo Abiesrik.

³³ Ak kingobata meetab Gideon, koweek kogeny lagokab Israel, koibotgei ak Baalik, ak koyai Baal-berit koek cheptalelinywa.

³⁴ Ak ma ibwat lagokab Israel Jehovah Kamuktaindenywa, ne kisor ichek eng’ eunekab bunikwak tugul che kimi komosta age tugul:

³⁵ anan korire gotab Jerubaal, ne inendet ko Gideon, ko u mieindo tugul ne kiga koyachi Israel.