KIRUOGIK 7 - BUKUIT NE TILIL

Kiterteri Midianik

¹ King’eet anyun karon mising’ Jerubaal, inendet ko Gideon, koboto bik tugul che kimi ak inendet, ak koteech ole negite kondab beek ne bo Harok: ak kimi nganasetab Midian murot ne bo katam ne bo bichoto, ole negite tulwetab More, eng’ atebwet.

² Ak kilenji Jehovah Gideon, Chang’ bik che mi koboten ne mamuchi ande Midianik eunekwak, si mamenja Israel kole, Kasorua eunnyu.

³ Ui anyun nguno, imwaite kogas bik, ilenji, Age tugul ne nyogor ak kobotani ko ingoweek kwo eng’ tulwetab Gilead. Ak kiweek bik elfusiek tiptemu ak aeng’; ak king’et elfusiek tamanu.

⁴ Ak kilenji Jehovah Gideon, Ta ko chang’ bik; imutu kobwa ole mi beek, si atiemun ichek eng’ yoto: si age tugul ne amwaun alenjinin, Obendi ak ni, obe ak noto; ak age tugul ne amwaun alenjinin, Mobendi ak ni, ko mawendi noto.

⁵ Komut anyun bik kobwa ye mi beek: ak kilenji Jehovah Gideon, Age tugul ne labei beek eng’ ng’eleptanyi ko u ye labei seset, itaban noto; ko u noto agine age tugul ne kutunyi si koee beek.

⁶ Ak koitetab ichek che kilabune beek eunekwak kobwa kutit, ko ki bik bogol somok: ago kigutung’so bik chun alak koee beek.

⁷ Ak kilenji Jehovah Gideon, Asoruok eng’ bichoto bogol somok che kalab beek, ak ande Midianik euneguk: ago ingoba bik tugul, ingowo chi tugul oldanyi.

⁸ Koib anyun bik amitwogik eng’ eunekwak, ak igondisiekwak: ak kimwachi bikab Israel tugul koba, kwo chi tugul emainnyi, ago kirany bik bogol somok: ak kimi nganasetab Midian ng’ony eng’ ole kimi inendet, eng’ atebwet.

⁹ Ak kilenji Jehovah inendet kemounoto, Ng’eet, chortege nganaset; amu kande eung’ung’.

¹⁰ Ago ngot iwe ichortege, obe ak otwogindeng’ung’ Pura ochortege nganaset:

¹¹ ak igas kit ne mwaei; ak ye ibata kigimit euneguk ichortege nganaset. Kichortagei anyun ak otwogindennyi Pura agoi koit ole boch bik che kimi nganaset che tinyei karik.

¹² Ak kiga ruiyo Midianik ak Amalegik ak bikab kong’asis tugul eng’ atebwet koigei chereng’enyinik eng’ chang’indo; ak kima ko iitoksei, ki te tambesikwak ng’aniekab ngegutab nyanjet eng’ chang’indo.

¹³ Ak kingoit Gideon, ogeero, kimi chito ne kiga mwachi choruennyi karuotitoet, kolenji, Keero, koaruotyi karuotitoet, ak keero, kiibutyi makatiat ne ming’in ne bo sairik nganasetab Midian, ak kororokyi emait, kokwer kolul, ak kogabui, koru eng’ ng’ony.

¹⁴ Ak kiwolji choruennyi kolenji, Nito ko ma kit age kobate rotwetab chok ne bo Gideon weritab Joas, chitab Israel: kagonde Kamuktaindet Midian eunekyik, ak luget tugul.

¹⁵ Ak ye kingogas Gideon mwaunetab karuotitaonoto, ak weegennyi, kong’uruk kosa; ak kwo nganasetab Israel, ak komwa kole, Ong’eetye; amu kagonde Jehovah eunekwok lugetab Midian.

¹⁶ Ak kipchei bichoto bogol somok koek kweanaik somok, ak kiigochi ichek tugul igondisiek konam eng’ eunekwak, ak terenik che mami kiy, che mi orit kegenganikab mat.

¹⁷ Ak kolenji, Ogeera, ak oyai ko u ye ayae, ak ogeero, ye kaait ye boch nganaset, ko u ye ayae, oyai ak okwek ko u noto.

¹⁸ Ye aguut igondit, ane ak bik tugul che mi kobota, oguut anyun ak okwek igondisiek eng’ komosta age tugul ne bo nganaset tugul, ak omwa ole, Bo Jehovah ak Gideon.

¹⁹ Kiit anyun Gideon ak bichoto bogol che kimi koboto inendet, ole boch nganaset eng’ taunetab ripset ne bo kemoi kwen, ye kata kewale ripset: ak kiguut igondisiek, ak kotui terenik che kimi eunekwak.

²⁰ Ak kiguut kweanaichoto somogu igondisiek, ak kotui terenik, ak koname eunekab katam kegenganikab mat, ak konam igondisiek eng’ eunekwak che bo tai si koguut: ak kiwaach kole, Rotwetab chok ne bo Jehovah ak ne bo Gideon.

²¹ Ak kitonon chi tugul eng’ komostanyi ko kayiem nganaset: ak kiibokto luget tugul: ak kowaach ak koon bichoto.

²² Ak kiguut igondisiechoto bogol somok, ak kogochi Jehovah kobar chi age tugul chito ne kaonei, ak kobargei ak luget tugul: ak kimwei luget kot koit Bet-sita kotokyigei Serera, kot koit kiwotetab Abel-meola, ole negite Tabat.

²³ Ak kiiyumgei murenikab Israel kobun Naptali, ak Aser, ak Manase tugul, ak koon Midianik.

²⁴ Ak kiiyokto Gideon bik koba emet komugul ne bo tulonokab Epraim, kolenji, Ochoruge, kebarge ak Midian, ak onam beek agoi Bet-bara, ak Jordan. Kiiyumgei anyun murenik tugul che bo Epraim, ak konam beek tugul kot koit Bet-bara, agot Jordan.

²⁵ Ak kinam bounik aeng’ che bo Midian, Oreb ak Seeb; ak kibar Oreb eng’ ruandetab Oreb, ak kibarji Seeb ole kitue sabibuk, eng’ Seeb, ak koon Midianik: ak kiib metitab Oreb ak ne bo Seeb koipchi Gideon eng’ Jordan bitonin.