KIRUOGIK 6 - BUKUIT NE TILIL

Gideon ak Midianik

¹ Ak kiyai lagokab Israel yaitiet eng’ taitab Jehovah: ak kiinde Jehovah ichek eunekab Midian kenyisiek tisab.

² Ak kiiterter eutab Midian Israel: ak kibaljigei lagokab Israel keringonik eng’ tulonok, ak kebenonik, ak kiyachigei irimoik, amu Midian.

³ Ak kingo kagogolso Israel, kotogos anyun Midianik, ak Amalegik, ak bikab kong’asis; kobwa kobargei ak ichek;

⁴ ak koteech tainywa, ak kong’em ruratetab emet, agoi koit Gasa, ama ituuch amitwogik eng’ Israel, kechir, anan ko tany, anan ko sigirio.

⁵ Amu kibwa kotogos ak tukwak ak emaisiekwak, ak kimong’ ko u chereng’enyinik eng’ chang’indo; kima ko iitoksei ichek ak tambesikwak; ak kibwa kong’em emet.

⁶ Ak kinyor Israel nyalilda ne o amu Midianik, ak kirirji lagokab Israel Jehovah.

⁷ Ak ye kingorirji lagokab Israel Jehovah amu Midianik,

⁸ koyokyi Jehovah lagokab Israel maotiot: ak kimwachi kolenji, Kamwa ko u ni Jehovah Kamuktaindetab Israel kole, Kiamutwak otogosu eng’ Misri, ak amutwak omong’une gotab otwognatet;

⁹ ak kiatiachak eng’ eutab Misrik, ak eng’ eutab tugul che kiinyalilak, ak kiaon ichek koba eng’ taing’wong’, ak agonok emenywa;

¹⁰ ak kialenjok, A Jehovah Kamuktaindeng’wong’; moiywei cheptalelisiekab Amorik, che omenye emenywa: ago ma ogas it kutinnyu.

¹¹ Ak kinyo malaikaiyatab Jehovah, ak kotebe ketit kel ne kimi Opra, ne ki bo Joas Abiesrindet: ak kituei werinnyi Gideon nganok eng’ ole kitue sabibuk, si kobiit kouny nganochoto eng’ Midianik.

¹² Ak kimong’ji inendet malaikaiyatab Jehovah, ak kolenji, Mi Jehovah koboten, inye chito ne i kim ak ko i nyigan.

¹³ Ak kilenji Gideon inendet, Bwa kiptaiyandennyu, ngot komi Jehovah kobotech, ko amu nee si kobwanjech tuguchu tugul? Ak mi ano boisionikyik tugul che bo kwong’et che kimwawech kwanisiekyok, kolenjech, Tos kima imutwech Jehovah ketogosu eng’ Misri? Ago kigobagaktech Jehovah, ak kondeech eunekab Midianik.

¹⁴ Ak kigusyi kong’ Jehovah inendet, ak kolenji, Ui eng’ kimnatoning’ung’, ak isoru Israel eng’ eutab Midianik: tos ma ayokten?

¹⁵ Ak kolenji, Bwa Kiptaiyat, asorune nee Israel? Keero, orennyo ko bonon kosiir tugul che bo Manase, ak ko a ne ming’in eng’ tugul eng’ gotab kwandanyu.

¹⁶ Ak kilenji Jehovah, Ami koboten iman, ak ibare Midianik ko u chito agenge.

¹⁷ Ak kilenji, Ngot ko kaanyoru chamet eng’ taing’ung’, iborua anyun kaborunet ile inye ne ing’alalwa.

¹⁸ Asain ale, amat iwe eng’ yu, agoi anyo ole imi, ak aibu kagochinennyu, ak ande taing’ung’. Ak kile, Atebye kot iitu kogeny.

¹⁹ Ak kiwa Gideon go, ak kochob aruetab ng’oror, ak makatinik che ma kinde mermerek che bo busiek che bo epah agenge: kiinde banyek kerebet, ak kiinde sutek teret, ak koipchi inendet eng’ ketit kel, kwo kogochi.

²⁰ Ak kilenji malaikaiyatab Kamuktaindet inendet, Inemu banyek ak makatinik che ma kinde mermerek, ak inde koi, ak irong’u sutek. Ak kiyai ko u noto.

²¹ Ak kiiyogoito malaikaiyatab Jehovah walitab kirokto ne kitinyei eng’ eunnyi, ak kotwae banyechato ak makatinichato ma kinde mermerek; ak kitogosta mat eng’ koyata, kobeel banyek ak makatinichato ma kinde mermerek; yeityo kobetito kwo malaikaiyatab Jehovah eng’ tainnyi ne mata kogeer.

²² Ak kigeer Gideon kole kaga inendet ko malaikaiyatab Jehovah; ak kile Gideon, Bwa, ee Kiptaiyat Jehovah! Amu kageer malaikaiyatab Jehovah kimni.

²³ Ak kilenji Jehovah inendet, Ingoteb kalyet koboten; ameiywei: memee.

²⁴ Koteekyi Gideon anyun Jehovah kaptisisiet eng’ yoto, ak koguure Jehovah-salom: mitei agoi kora eng’ Opra ne bo Abiesrik.

²⁵ Ak kilenji Jehovah inendet kemounoto, Kweri kirgitab kwandang’ung’, kirgitab aeng’ ne bo kenyisiek tisab, ak ibut kapkorosutab Baal ne tinyei kwandang’ung’, ak iluul Asera ne negite kapkorosunoto:

²⁶ ak iteekyi Jehovah Kamuktaindeng’ung’ kaptisisiet eng’ baragutab irimonito, kotetak komie, ak ikweri kirgit ne bo aeng’ ak igoite kagochinet ne kibeelei koboto kwenikab Asera che iebe.

²⁷ Kiimut anyun Gideon bik taman eng’ otwogikyik, ak koyai ko u ye kamwachi Jehovah: amu kiiywei bikab gotab kwandanyi ak bikab nganaset, ko ma imuch anyun koyai bet, koyai kemoi.

²⁸ Ak kingong’eetyo bikab nganaset kota ko karon inne, ogeero, ko kiga kebut kapkorosutab Baal, ak kiga kiluul Asera ne ki negite kapkorosut, ak kiga kigoito kirgit ne bo aeng’ eng’ kaptisisiet ne kiga kiteech.

²⁹ Kolenjigei, Ng’o ne koyaei kii? Ak ye kingogin ak koteebat, kole, koyaei kiito Gideon weritab Joas.

³⁰ Ak kolenji bikab nganaset Joas, Imutu wering’ung’ komong’, kebar: amu kabut kapkorosutab Baal, ak amu koeb Asera ne komi yoto.

³¹ Ak kilenji Joas bik tugul che kiibeligei ak inendet, Ong’alali otoreti Baal? Anan osoru inendet? Ne ng’alali agobo inendet ko mie kebar kota ko karon: ngot ko cheptalelit inendet, ko ingong’alal kotoretgei, amu kogoluul chito kapkorosunnyi.

³² Koguure anyun inendet eng’ betunoto Jerubaal, kole, Ingong’alal Baal koruokyi inendet, amu kobut kapkorosunnyi.

³³ Kiiyumgei anyun Midianik tugul ak Amalegik ak bikab kong’asis, ak kolong’ koteech atebwetab Jesreel.

³⁴ Ago kinyonji Tamirmirietab Jehovah Gideon; ak kiguut igondit; ak kiiyumgei Abiesrik kosub inendet.

³⁵ Ak kiiyokto bik koba Manase komugul; ak kiiyumgei agichek kosub inendet: ak kiiyokto bik koba Aser, ak Sebulun, ak Naptali; ak kitogos kotorok ichek.

³⁶ Ak kilenji Gideon Kamuktaindet, Ngot isoru Israel eng’ eunnyu ko u ye kiimwa,

³⁷ keero, andoi kororikab kechirek ruanyut ne kiborse; ngot konam rewot kororik ichegei ak ko yaamat ng’onyut tugul, anai anyun ale isoru Israel eng’ eunnyu, ko u ye kiimwa.

³⁸ Ak kiek ko u noto: amu king’eet kota ko karon mising’ eng’ betut ne bo aeng’, ak koruruny kororik, ak koiiny kororichoto komong’ beekab rewot, konyi tabet.

³⁹ Ak kilenji Gideon Kamuktaindet, Amat kolalyo neregeguk agobo ane, kota amwa ni kityo: asain ale chamwan atiem kororik konyil agenge kogeny; ingosaiyo kororik ichegei, ak ingobiit rewot eng’ ng’onyut tugul.

⁴⁰ Ak kiyai Kamuktaindet ko u noto kemounoto: amu kisaiyo kororik ichegei, ak kibiit rewot eng’ ng’onyut tugul.