KIRUOGIK 5 - BUKUIT NE TILIL

Tiendab Debora ne bo katerteret

¹ Kotien anyun Debora ak Barak weritab Abinoam eng’ betunoto, kole,

² Amu kiindo kandoik eng’ Israel, Amu kiigoitogei bik eng’ chamnyet, Olosu Jehovah.

³ Ogas, ee, okwek, laitorinik; oeb it, ee, okwek bounik, Atienjini ane Jehovah; Atienjini kalosunet Jehovah, Kamuktaindetab Israel.

⁴ Jehovah, ye kiimande eng’ Seir, Ye kiiwe imande eng’ koretab Edom, Kobotan ng’ony korobon agine kipsengwetisiek, Ee, kosoi bolik beek.

⁵ Kiroot tulonok kotenden eng’ taitab Jehovah, Agot Sinainin eng’ taitab Jehovah, Kamuktaindetab Israel.

⁶ Eng’ betusiekab Samgar weritab Anat, Eng’ betusiekab Jael ko kima kobunei chi ortinwek che eechen, Ak kibun kiprutoinik ortinwekab taban.

⁷ Kiigesgei bounik eng’ Israel, kiigesgei, Kot ang’eet ane Debora, Ang’eet ane, kamet eng’ Israel.

⁸ Kilewen cheptalelisiek che taunen; Kibiit luget eng’ kurgotik: Tos kibiit long’et anan ko ng’otit ne kigigeerei Eng’ elfusiek artam eng’ Israel?

⁹ Tokyingei muguleldanyu bounikab Israel, Che kiigoitogei eng’ chamnyet eng’ kwenutab bik: Olosu Jehovah.

¹⁰ Omwaite okwek che olanye sigirok che leelach, Che otebe ngoroik che kiitoi eng’ ng’ony, che bo kamanutiet ne o, Ak okwek che obendoti eng’ oret.

¹¹ Che looen eng’ cheetab mwogik, eng’ komoswek che kirame beek, Yoto ye mwaitoe boisionikab imanda che bo Jehovah, Boisionikab imanda che bo bounatennyi eng’ Israel. Yeityo korekto bikabo Jehovah koba kot koit ormarichok.

¹² Ng’eet, ng’eet, Debora; Ng’eet, ng’eet, tien: Tonon, Barak, ak imut luuleniguk che kiiluul, inye weritab Abinoam.

¹³ Yeityo kochorgei che king’et eng’ bik che toogunotin eng’ bik; Kichorgei Jehovah agobo ane si kobargei ak che nyigonen.

¹⁴ Kimong’une Epraim che salu Amalek; Kosubun, inye Benjamin, eng’ biguk; Kibun Makir bounik, Ak kibun Sebulun ichek che boisie kiroktab sirindet.

¹⁵ Ak kimi bounikab Isakar koboto Debora; Kit ne ki u Isakar, ko kit ne ki u Barak agine; Kiruai atebwet kosub kelyekyik. Ole negite ainosiekab Reuben Ko kimi kabwatutik che eechen che bo muguleldo.

¹⁶ Kilya si itebe kwenutab biusiekab kechirek, Si igas kuutetab ndurerusiek che kiguutyin akwotisiek? Ole negite ainosiekab Reuben Ko kimi kasiagutik che eechen che bo muguleldo.

¹⁷ Kimeny Gilead Jordan bitonin: Ak Dan, ko kilya si kotebi eng’ melisiek? Kiteb Aser kosisyigei eng’ ngegutab nyanjet, Kimeny ole negite luukwekab beekyik.

¹⁸ Sebulun ko ki bik che kiinde sobonwekwak ng’oiyonditab meet, Ak Naptali eng’ oldinwek che tororen che bo emet.

¹⁹ Kibwa laitorinik ak koyai luget; Kibargei ak laitorinikab Kanan, Eng’ Taanak ole negite beekab Megido: Ma ib kelunetab fedaisiek.

²⁰ Kiyai luget kong’eete kipsengwet, Kibargei kecheik ak Sisera eng’ ortinwekwak.

²¹ Kiib ainetab Kison ichek, Ainonoto bo keny, ainetab Kison. Ee sobondanyun, ui tai eng’ kimnatet.

²² Yeityo kotiechatiech kelyekab mbartanyisiek Eng’ torombenet, torombenetab chechuak che kimen.

²³ Kile malaikaiyatab Jehovah, Ochub Meros, Ochub eng’ chubet ne ng’wan bik che menyei oloto; Amu ma bwa kotoret Jehovah, Kotoret Jehovah agobo che kimen.

²⁴ Egu Jael ne iberurot eng’ kwonyik, Osotiotab Heber Kenindet, Egu ne iberurot eng’ kwonyik eng’ emait.

²⁵ Kisom beek, ago kiinage chego; Kiipchi mwaitab chego eng’ tabet ne bo teegisto.

²⁶ Kiinem tigongiot, Ak kiname eunnyi ne bo tai kiriswetab musogindet; Ak kokwere Sisera kiriswonoto, kikwer komandae metinnyi, Ee, kitoor ak kokwer, komandae mwaitab kondanyi.

²⁷ Kiing’uruk eng’ kelyekyik, kiibut, kiru: Kiing’uruk eng’ kelyekyik, kiibut: Eng’ ye kiing’uruge, ko kiibut anyun kome.

²⁸ Kiitito eng’ tirisia, ak korir, Kirir kametab Sisera eng’ tirisietab segengeisiek, kole, Amu nee si kogagei karinnyi ko ma sib konyo? Amu nee si kogagei kelyekab karisiekyik?

²⁹ Kowolji kwonyikyik che ng’omen, kolenji, Ee, kiwoljigei inendet,

³⁰ Tomo konyo, tomo kopchei barunenik? Chepto, tibik aeng’ che bunjin chi age tugul; Che bunjin Sisera, barunenikab saleiywek che ter, Barunenikab saleiywek che ter che bo nabutikab lelesta, Che bo saleiywek che ter che bo nabutikab lelesta, eng’ komoswek tuwai, eng’ kaatwekab luulenik?

³¹ Ingobetyo anyun buniguk tugul, ee Jehovah: Ago ingoigei che chamei inendet asista, ye choru eng’ kimnatennyi. Ak kiimuuny emet eng’ kenyisiek artam.