KIRUOGIK 4 - BUKUIT NE TILIL

Debora ak Barak

¹ Kiyai anyun lagokab Israel yaitiet kogeny eng’ taitab Jehovah, ye kingo kagome Ehud.

² Ak kialda Jehovah ichek koba eunekab Jabin laitoriatab Kanan, ne kilaitorani eng’ Hasor; ne ki kiptaiyatab lugennyi Sisera, ne kimenyei Haroset ne bo Bororiosiek.

³ Ak kirirji lagokab Israel Jehovah: amu kitinyei karisiekab karik bogol sogol; ak kiinyalil lagokab Israel eng’ kimnatet eng’ kenyisiek tiptem.

⁴ Ak kiiruokyi Israel eng’ betusiechoto Debora maotiot, kwondab Lapidot.

⁵ Kitebe tiretab Debora kel eng’ kwenutab Rama ak Bet-el eng’ emetab tulonok ne bo Epraim: ak kitogosu lagokab Israel ole mi inendet kobwanei kiruoget.

⁶ Ak kiiyokto inendet kole keguur Barak weritab Abinoam eng’ Kedes-naptali, ak kinyo kolenji, Ma ng’at Jehovah Kamuktaindetab Israel kole, Ui irikyi tulwetab Tabor, ak imut murenik elfusiek taman che bo lagokab Naptali ak che bo lagokab Sebulun?

⁷ Si amutun Sisera konyo ainetab Kison, kiptaiyatab lugetab Jabin, koboto karisiekyik ak bikyik che chang’; ak andoi inendet euneguk.

⁸ Ak kilenji Barak inendet, Ngot kebendi tuwai, awendi: ago ngot ko magibendi tuwai, ko mawendi.

⁹ Ak kile, Kibendi tuwai iman: ago banda ne iwendi ko mabunjin teegistang’ung’; amu aldochin Jehovah Sisera eunekab kwondo. Ak king’eet Debora koba Kedes ak Barak.

¹⁰ Ak kiguur Barak Sebulun ak Naptali kotuiyechi Kedes; ak kitogosta murenik elfusiek tamanu kosub inendet: ak kitogosta Debora agine koboto inendet.

¹¹ Kiga kotabanegei Heber Kenindet Kenik, eng’ lagokab Hobab kabyugoitab Musa, kwo koteech emainnyi eng’ ole mi ketit eng’ Saananim, ne negite Kedes.

¹² Ak kigimwachi Sisera kelenji, kowa Barak weritab Abinoam kotogosta tulwetab Tabor.

¹³ Ak kiiyum Sisera karisiekyik tugul, karisiekab karik bogol sogol, ak bik tugul che kimi koboto inendet, koboch Haroset ne bo Bororiosiek, agoi ainetab Kison.

¹⁴ Ak kilenji Debora Barak, Ng’eet; nito betut ne indoi Jehovah Sisera eung’ung’: mawo Jehovah kondoenen? Kwo anyun Barak kochortagei eng’ tulwetab Tabor, koboto murenik elfusiek taman che kiisubi inendet.

¹⁵ Ak kiiseer Jehovah Sisera, koboto karisiekyik tugul, ak lugennyi tugul eng’ rotwetab chok eng’ taitab Barak; ak kichorgei Sisera eng’ karinnyi, ak komwei eng’ keldo.

¹⁶ Ago kion Barak karisiek, ak luget, kot koit Haroset ne bo Bororiosiek, ak kiibut luget komugul ne bo Sisera eng’ rotwetab chok; ma ng’et chi.

¹⁷ Ago kimwei Sisera kobun keldo agoi koit emaitab Jael osotiotab Heber Kenindet: amu kiting’egei kalyet Jabin laitoriatab Hasor ak gotab Heber Kenindet.

¹⁸ Ak kimanda Jael kotorokto Sisera, kwo kolenji, Nyo go, kiptaiyandennyu, nyo ole ami; ameiywei. Ak kiwa ole mi eng’ emait, ak kituge inendet ngoriet.

¹⁹ Yeityo kolenji, Asomin ale, inaga beek tutigin aee; amu ama melel. Ak kiyat sotet ne bo chego, ak konaga kolu, ak kotuch.

²⁰ Ak kilenji chichoto inendet, Tonon eng’ kurgetab emait, ak ye nyo chi age tugul ak koteebenen kole, Mi chi yu? Ilenji, Achicha.

²¹ Yeityo konem Jael osotiotab Heber tigongiotab emait, ak konem kiriswet, ak kwo kosapchi ak kobirji tigongiondonoto mwaitab konda, ak kitoor komanda kwo kotoor ng’onyut; amu kiruei mising’; ak kitanui kome.

²² Ak ogeero, ye kingota koonei Barak Sisera, komong’ Jael kotorok inendet, ak kolenji, Nyo aborun chito ne icheng’e. Ak kinyo ye mi inendet, ak ogeero, kiruei Sisera ko kagome, ak kimi tigongiot mwaitab kondanyi.

²³ Koterter anyun Kamuktaindet eng’ betunoto, Jabin laitoriatab Kanan eng’ taitab lagokab Israel.

²⁴ Ak kigimit eutab lagokab Israel koterter Jabin laitoriatab Kanan, kot kobar Jabin laitoriatab Kanan.