KIRUOGIK 3 - BUKUIT NE TILIL

Kit ne kiigoch Jehovah korire bororiosiek alak

¹ Chu anyun ko bororiosiek che kibagakta Jehovah, si kobiit kotieme Israel, ichek tugul che kima nai lugosiekab Kanan;

² si kobiit konai ibinwekab lagokab Israel, konet ichek luget, mising’ ko che kitomo konai agobo luget, eng’ tai;

³ ichek ko kiptainik mut che bo Pilistik, ak Kananik tugul, ak Sidonik, koboto Hibik che kimenyei tulwetab Lebanon, koboch tulwetab Baal-hermon agoi ole kibunei kebendi Hamat.

⁴ Kigibagakta si kobiit ketieme Israel ichek, si kobiit konai ngo kase it ng’atutikab Jehovah, che king’at kwanisiekwak eng’ eutab Musa.

⁵ Ak kimeny lagokab Israel kwenutab Kananik; Hitik, Amorik, Perisik, Hibik, ak Jebusik;

⁶ ak kiimut tibikwak koek osotikwak, ak kiigochi tibikwak werikwak, ak kiot kanamonikwak.

Otniel

⁷ Ak kiyai ne ya lagokab Israel eng’ taitab Jehovah, ak koutie Jehovah Kamuktaindenywa, ak koot Baalik ak Aserot.

⁸ Noto anyun kilalyo neregekab Jehovah agobo Israel, ak kialda ichek koba eunekab Kusan-risataim laitoriatab Mesopotamia: ak kiot lagokab Israel Kusan-risataim kenyisiek sisiit.

⁹ Ak ye kingorirji lagokab Israel Jehovah, kong’eetyi Jehovah lagokab Israel yetindet, ne kisor ichek, inendet ko Otniel weritab Kenas, ng’etab kamet ne ming’in ne bo Kaleb.

¹⁰ Ak kinyonji inendet Tamirmirietab Jehovah, ak kiiruokyi Israel; ak kiwa luget, ak kiinde Jehovah eunnyi Kusan-risataim laitoriatab Mesopotamia: ak kiiterter Otniel Kusan-risataim.

¹¹ Ak kiimuuny emet kenyisiek artam. Ak kime Otniel weritab Kenas.

Ehud

¹² Ak kiyai ne ya lagokab Israel kogeny eng’ taitab Jehovah: ak kiigimit Jehovah Eglon laitoriatab Moab kobargei ak Israel, amu kiyai ne ya eng’ taitab Jehovah.

¹³ Ak kiiyum inendet lagokab Amon ak Amalek kobwa ole mi inendet; ak kiwa kobar Israel, ak kiluul nganasetab tironik.

¹⁴ Ak kiot lagokab Israel Eglon laitoriatab Moabik kenyisiek taman ak sisiit.

¹⁵ Ago ye kingorirji lagokab Israel Jehovah, kong’eetyi Jehovah ichek yetindet, Ehud weritab Gera, Benjaminindet, chito ne ki bo katam: ak kiiyoktae inendet lagokab Israel kagochinet koyokyi Eglon laitoriatab Moab.

¹⁶ Kiitang’jigei Ehud rotwetab chok ne ng’atiben komoswek tuwai, ne aechin ak kakwautiet agenge ne bo eut; ak kiratyi kubestanyi ne bo tai kotaban ngoriennyi orit.

¹⁷ Ak kiipchi kagochinonoto Eglon laitoriatab Moab: ak ki chito ne nerat mising’ Eglon,

¹⁸ ak ye kingo kagogoito kagochinonoto, kolenji bichoto che kiibu kagochinet koba.

¹⁹ Ago kiweek inendet eng’ ole kimi kanamonik eng’ ole negite Gilgal, ak komwa kole, Atinye ng’olyotab ung’ot ne kagiyogunena, ee laitoriat. Ak kile, Sis. Ak kimanda bik tugul che kimi ole negite inendet.

²⁰ Ak kinyo Ehud ole mi inendet; ak kitebyei inegei eng’ gonnyi ne kiuure. Ak kile Ehud, Atinye ng’alek che aibun che bunu Kamuktaindet. Kong’eet anyun eng’ ng’echerennyi.

²¹ Ak kiiyogoito eunnyi ne bo katam Ehud ak kiinem rotwetab chok eng’ kubestanyi ne bo tai, ak kotoor moennyi:

²² kiwa rotwet orit koboto kungit; ak kituch sundet rotwonoto, amu ma ng’us rotwet eng’ moennyi; ak kimandae batai.

²³ Kimanda anyun Ehud kwo serem, ak koger kurgotik, kogerji inendet go, ak kotemel.

²⁴ Ak ye kingomanda, kobwa otwogikyik; ak kigeer, ak ogeero, temelotin kurgotikab got; ak komwa kole, Eng’ iman, ko katuch kelyekyik eng’ gonnyi ne kiuure.

²⁵ Kiigenis kot kolilanso: ak ogeero, ma yat inendet kurgotikab got; kiinem anyun yateiywot, ak koyat: ak ogeero, kiga kobutyi ng’ony kiptaiyandenywa kome.

²⁶ Ak kichilil Ehud ye kita kogenisiei ichek, ak kwo kosiirtoe kanamonik, ak komwechi Seira.

²⁷ Ak kingoit, koguut igondit eng’ emetab tulonok ne bo Epraim, ak kichortagei lagokab Israel koboto inendet eng’ emetab tulonok, ak kiindoe ichek.

²⁸ Ak kilenji ichek, Osubwa: amu kagonde Jehovah eunekwok bunikwok Moabik. Ak kichortagei kosub inendet koba konam tabarwekab Jordan korebe Moabik, ama chamji chi kolanda.

²⁹ Ak kibar eng’ betunoto murenik olo bo elfusiek taman che bo Moab, chito age tugul ne ki kim, ak chito age tugul ne ki nyigan; ama chilil chi agot agenge.

³⁰ Kigiterter anyun eng’ betunoto Moab eng’ eutab Israel. Ak kiimuuny emet eng’ kenyisiek tamanwogik sisiit.

Samgar

³¹ Kingobata inendet kobiit Samgar weritab Anat, ne kibar murenik bogol lo che bo Pilistik eng’ kiblitwet: ak kisor agine Israel.