KIRUOGIK 21 - BUKUIT NE TILIL

Kecheng’jin Benjaminik che king’et, osotik

¹ Kiga koyosio bikab Israel eng’ Mispa, kole, Maigochin chi eng’ achek cheptanyi Benjamin kotun.

² Ak kibwa bik Bet-el, ak kobuur eng’ yoto eng’ taitab Kamuktaindet kot koit koskoleny, ak kowaach, ak koririo ne ng’wan.

³ Ak kole, Ee, Jehovah, Kamuktaindetab Israel, amu nee si kobiit kii eng’ Israel, kot ko ma komi rani oret age eng’ Israel?

⁴ Ak ki eng’ mutai kong’eetyo bik kota ko karon, ak koteech kaptisisiet eng’ yoto, ak kogoito kagochinoik che kibeelei ak kagochinoikab kalyet.

⁵ Ak kile lagokab Israel, Mi ng’o eng’ ortinwek tugul che bo Israel ne ma nyo kotogos tuiyet ole mi Jehovah? Amu kiga yai kayosiet ne o agobo inendet ne ma nyo kotogos ole mi Jehovah eng’ Mispa, kole, Kibarei inendet iman.

⁶ Ak kiarogenso lagokab Israel agobo Benjamin tupchenywa, ak kimwa kole, Mi oret agenge ne kagobet ra eng’ Israel.

⁷ Kiyae nee si konyor osotik ichek che kong’et, amu kigiyosie eng’ Jehovah kele magigochini ichek tibikyok kotun?

⁸ Ak kile ichek, Ng’o ne bo ortinwek eng’ Israel ne ma nyo kotogos ole mi Jehovah eng’ Mispa? Ak ogeero, Kima nyo chi agot agenge nganaset ne kibunu Jabes-gilead konyo tuiyet.

⁹ Amu ye kingo kagiit bik, ogeero, kima komi chi eng’ bik che kimenyei Jabes-gilead.

¹⁰ Ak kiiyokto tuiyet bik elfusiek taman ak aeng’ che bo che nyigonen eng’ tugul, ak kong’at ichek kolenji, Oba obar eng’ rotwetab chok bik che menyei Jabes-gilead, koboto kwonyik ak lagok.

¹¹ Ak kit ne obendi oyae ko ni; obare ogesu muren age tugul, ak kwony age tugul ne kigoruiyo ak muren.

¹² Ak kinyor eng’ bik che kimenyei Jabes-gilead bergeinik bogol ang’wan che neranik, che kitomo konai muren eng’ ruondo ne kiruiyo tuwai: ak kiimut ichek kobwa nganaset eng’ Silo, ne mi emetab Kanan.

¹³ Ak kiiyokto tuiyet komugul bik koba kong’alalji lagokab Benjamin che kimi ruandetab Rimon orit, ak komwachi ichek kalyet.

¹⁴ Ak kiweek Benmjamin eng’ betusiechoto; ak kiigochi ichek kwonyik che kisor kosopcho eng’ che bo kwonyikab Jabes-gilead: ago kima yam ichek.

¹⁵ Ak kiarogenso bik agobo Benjamin amu kigoyai Jehovah koyatak oldo age eng’ ortinwekab Israel.

¹⁶ Kile anyun boisiekab tuiyet, Kiyai nee si konyor osotik ichek che kong’et, amu kigibar gotab kor eng’ Benjamin?

¹⁷ Ak kile ichek, Ne matiny konyolu kobiit borotet eng’ ichek che kichililso che bo Benjamin, si mabet oret age eng’ Israel.

¹⁸ Ago magimuchi kigochi ichek osotik eng’ tibikyok: amu kiga koyosio lagokab Israel, kole, Chubot ne igochin osotiot Benjamin.

¹⁹ Ak kile, Ogeero, mitei igortab Jehovah eng’ kenyit age tugul eng’ Silo, ne mitei murot ne bo katam ne bo Bet-el, eng’ komostab kong’asis ne bo oret ne o ne togostoi eng’ Bet-el kowendi Sekem, ak eng’ murot ne bo tai ne bo Lebanon.

²⁰ Ak king’at lagokab Benjamin, kolenji, Oba, oribisye eng’ mbarenikab sabibuk;

²¹ ak ogeer, ak ogeero, ngot komong’ tibikab Silo kobwa kourerenso eng’ ureriosiek, omong’u anyun eng’ mbarenikab sabibuk, ak konam chi tugul osotiondennyi eng’ tibikab Silo, kobwa emetab Benjamin.

²² Ak ye bwa kwanisiekwak anan ko tupchosiekwak koboljech, kelenji anyun, Ogonech ichek eng’ mieindo: amu ma kimutu chi tugul eng’ achek osotiondennyi eng’ boriet: ama ogochi okwek ichek; amu nda kigoyai ko u noto, totinye tengekto.

²³ Ak kiyai ko u noto lagokab Benjamin, ak kiimutyigei osotik, che te koitenywa, eng’ che kiuerendos che kiimut: ak kiba koweektagei ole kimi borotenywa, ak kiteech nganasok, ak komeny.

²⁴ Ak kiba lagokab Israel eng’ betusiechoto, kwo chi tugul bororiennyi ak ole kimi orennyi, ak kimanda eng’ yoto chi tugul kwo ole mi borotennyi.

²⁵ Kima komi laitoriat Israel eng’ betusiechoto: kiyaei chi tugul ko u ye kigeerei kole mie.