KIRUOGIK 2 - BUKUIT NE TILIL

Ng’alek che kindoune agobo kiruogik

¹ Ak kitogos malaikaiyatab Jehovah eng’ Gilgal konyo Bokim. Ak kile, Kiamutwak otogosu eng’ Misri, ak kiamutwak obwa emet ne kiayosiechi kwanisiekwok; ak kiamwa ale, Magoi abut kayomisennyu ne kigiarorjige ak okwek:

² amat oyai arorut ak bik che menyei emoni; obut kapkorsusiekwak: ago ma ogas it kutinnyu: amu nee anyun si oyai ko u nito?

³ Kiamwa anyun kogeny amu noto, ale, Maone ichek koba eng’ taing’wong’; ago kergeitu ak katok eng’ karasaikwok, ak egu kanamonikwak mestonok eng’ okwek.

⁴ Ak kingo kagomwachi malaikaiyatab Jehovah ng’alechu lagok tugul che bo Israel, kowaach, ak koririo.

⁵ Ak kiguure kainetab yoto Bokim: ak kieng’ji Jehovah eng’ yoto.

⁶ Ak kingo kagolenji Josua bik koba, kwo chi tugul eng’ lagokab Israel ole mi borotennyi konam emet.

⁷ Ak kiboisiechi bik Jehovah eng’ betusiek tugul che bo Josua, ak eng’ betusiek tugul che bo boisiek che kita komi ko kagome Josua, che kiga kogeer boisiet tugul ne o ne bo Jehovah, ne kiga koyai agobo Israel.

⁸ Ak kime Josua weritab Nun otwogindetab Jehovah, ko bo kenyisiek bogol ak taman.

⁹ Ak kitub ichek inendet eng’ kiwotetab emennyi eng’ Timnat-heres, eng’ emetab tulonok ne bo Epraim, eng’ murot ne bo katam ne bo tulwetab Gaas.

¹⁰ Ak kibek agichek tugul che bo ibinato ak kigiyumji oldab kwanisiekwak: ak kobiit ibinda age eng’ let ne kima kongen Jehovah, anan ko boisiet ne kiga koyai inendet agobo Israel.

¹¹ Ak kiyai lagokab Israel yaitiet eng’ taitab Jehovah, koot Baalik:

¹² ak kimeto Jehovah, Kamuktaindetab kwanisiekwak, ne kiimut ichek komong’ eng’ emetab Misri, ak kosub kanamonik, che bo kanamonikab bik che kimenyei komoswekwak tugul, ak kong’urukyi kanamonichoto: ak kitach Jehovah si konerech.

¹³ Ak kimeto Jehovah, ak koot Baal ak Astarot.

¹⁴ Ak kilalyo neregekab Jehovah agobo Israel, ak kiinde ichek eunekab bik che kiluul ichek, ak kialdochi ichek eunekab bunikwak che kimenyei komoswekwak, kot ko kima kota komuchi kotononso eng’ tait ab bunikwak.

¹⁵ Komosta age tugul ole kiba, ko kimi eutab Jehovah baragunywa si koyachi ne ya, ko u ye kiga mwa Jehovah, ak ko u ye kiga koyosiechi Jehovah ichek: ak kinyalilso mising’.

¹⁶ Ak kiing’eetyi Jehovah kiruogik, che kisor ichek eng’ eunekab bik che kiluul ichek.

¹⁷ Ago ma kas it kiruogikwak kora, amu kiisubot kanamonik koibotgei, ak kong’urukyi: kimasta kochakta kobagakta oret ne kibunei kwanisiekwak, kogas it ng’atutikab Jehovah; ago ma yai icheget ko u noto.

¹⁸ Ak kingong’eetyi Jehovah kiruogik, ko kimi Jehovah koboto kiruogindet, ak kosor ichek eng’ eunekab bunikwak eng’ betusiek tugul che bo kiruogindonoto: kirire Jehovah amu tigenenywa amu ichek che kiinyalili ichek ak koiimi.

¹⁹ Ago kingo kagome kiruogindet, koweeigei let, ak koyai tuguk che samisen kosiir kwanisiekwak, kosubi kanamonik kootei, ak kong’urukyi; ma sisyo eng’ boisionikwak, anan eng’ oretab ngelelnatenywa.

²⁰ Ak kilalyo neregekab Jehovah agobo Israel ak kimwa kole, Amu kigobistoe bororioni kayomisennyu ne kiang’at kwanisiekwak, ama kas it kutinnyu;

²¹ ko ma aone agane koboch nguno eng’ tainywa age tugul eng’ bororiosiek che kibagakta Josua ye kingo kagome:

²² si kobiit atieme Israel ageer ngo togot korib oretab Jehovah kobendate ko u ye kirib kwanisiekwak, anan maribei.

²³ Kibagakta anyun Jehovah bororiosiechoto, ma on kochakta; ama inde ichek eutab Josua.