KIRUOGIK 19 - BUKUIT NE TILIL

Neregek che kibiitune Gibea

¹ Ak eng’ betusiechoto, ye kima komi laitoriat Israel, kimi Lawindet age ne kiga meny komosin eng’ emetab tulonok ne bo Epraim, koek toondet, ne kiimutyigei chebaigeiyat eng’ Bet-lehem-juda.

² Ak kiyai kugoinatet chebaigeiyandennyi kosas inendet, ak kibagakta inendet kwo gotab kwandanyi eng’ Bet-lehem-juda, ak kitebe oloto arawek ang’wan.

³ Ak king’eet manong’otiondennyi kosub inendet, kwo kong’alalji inendet eng’ chamnyet, komut inendet kogeny, komi inendet ak otwogindennyi, ak sigirok aeng’: ak kiimut inendet kwo gotab kwandanyi: ak kingogeer kwandab kwonyoto chichoto, kobaibait amu katuiyo ak inendet.

⁴ Ak kimach kapyugoinnyi, ne kwandab kwonyoto, kota kobeni; ak kitebi koboto inendet egosiek somok: kiamis anyun ak koeeiso, ak koruiyo yoto.

⁵ Ak eng’ betutab ang’wan, kong’eetyo karon inne, ak king’eet kole kwo: ak kimwachi kwandab kwonyoto sandennyi, kolenji, Igaigai muguleldang’ung’ eng’ makatiat kitigin, yeityo obe.

⁶ Kitebi ng’ony ak kiamis ak koeeiso ichek tuwai: ak kilenji kwandab kwonyoto chichoto, Asomin ale, cham itebi kemout komugul, ak ingobaibait muguleldang’ung’.

⁷ Ak king’eet chichoto kole kwo; ago kiigaigai kapyugoinnyi, ak kiru yoto kogeny.

⁸ Ak king’eet karon mising’ eng’ betut ne bo mut kole kwo; ak kile kwandab kwonyoto, Asomin ale, igaigai muguleldang’ung’, ak otebi agoi koskoleny; ak kiamis ichek tuwai.

⁹ Ak kingong’eet chichoto kole kwo, inendet ak chebaigeiyandennyi, ak otwogindennyi, kolenji inendet kapyugoinnyi kwandab kwonyoto, Keero, amu machei koimen, asomin ale tebi kemout komugul: keero, machei kogesgei betut, ru yuto, si kobaibait muguleldang’ung’; si imuste karon mising’, iwe ga.

¹⁰ Ago ma cham chichoto kotebi kemounoto, ago king’eet ak kwo, agoi koit ole tokyingei Jebus (noto ko Jerusalem); ak kitinyei sigirok aeng’ che kiga kiito; kimi agine chebaigeiyandennyi koboto inendet.

¹¹ Kingomi ye negite Jebus, koimen; ak kilenji otwogindet kiptaiyandennyi, Asomin ale nyo kemaste kebe nganasetab Jebusik, ak keruiye yoto.

¹² Ak kilenji kiptaiyandennyi, Magimastoi kebendi nganasetab toondet, ne ma bo lagokab Israel; ago kisiirtoi kebendi Gibea.

¹³ Ak kilenji otwogindennyi, Nyo kerikyi yeto age eng’ chu; si keruiye Gibea anan ko Rama.

¹⁴ Kisiirto anyun koba bandanywa; kirorokta asista kota kobendi ko negit koit Gibea, ne bo Benjamin,

¹⁵ ak kimasta koba oloto, koba koruiyo Gibea: ak kiwa orit, ak kotebi ng’ony eng’ oretab nganaset: amu ma biit chi ne kiimut ichek koba gonnyi koruiyo.

¹⁶ Ak ogeero, kinyo boiyot age ne kibunu boisiennyi eng’ mbar koskoleny: ki bo chichoto emetab tulonokab Epraim, ak kimeny Gibea koek toondet; ago ki Benjaminik bikab oloto.

¹⁷ Ak kitobendo kogeer kiprutoiyot eng’ oretab nganaset; ak kile boiyondonoto, Iwendi ano? Ak ibunu ano?

¹⁸ Ak kilenji inendet, Kisiirtoi kibunu Bet-lehem-juda kibendi emetab tulonokab Epraim komosin; a bo oloto, ak kigawe Bet-lehem-juda; ak awendi nguno gotab Jehovah; ama mi chi ne imuta gonnyi.

¹⁹ Ago kitinye mobek ak amitwogik che kigigonor che bo sigirokyok; ak atinye makatiat ak divaik, ak che bo otwogindeng’ung’ ne chepto, ak che bo murenoni mi koboto otwogiguk: mami kiy age tugul ne rartaat.

²⁰ Ak kile boiyondonoto, Ingoteb kalyet koboten; ago ingobunja tuguk tugul che imache; koek kityo, mat iru oret.

²¹ Komut anyun kwo gonnyi, ak kogochi sigirok amitwogik: ak kiun kelyekwak, ak kiamis ak koeeiso.

²² Ak ye kiiboiboi mugulelwekwak, ogeero, kibwa murenikab nganasanato, werikab Belial, koyiem got, ak kobir kurget; ak king’alalji chitab kobo got, boiyondonoto, kolenji, Imoong’u chichi kanyo gong’ung’, si kobiit kesuub.

²³ Kimanda anyun chichoto, bounindetab got, kwo ole mi ichek, ak kolenji, Achicha, tupchosiekyuk, asomok ale, amoyai tengekto ne te ni; amu kanyo chichi gonnyu, amoyai sogornatani.

²⁴ Ogeero, mi yu cheptanyu ne bergeiya, ak chebaigeiyatab chichi; amutwok ichek kobwa sang’ nguno, si ong’em, ak oyachi ichek ko u ye ogeere ole mie: ago amat oyachi chichi sogornatani u ni.

²⁵ Ago ma cham bichoto kogasyi ng’alek: kinam anyun chichoto chebaigeiyandennyi ak komutyi ichek eng’ sang’; ak kisuub kwonyoto, ak kotewer inendet agoi koeech: ak kingomachei koeech, kobagakta kwo.

²⁶ Kinyo anyun kwonyoto ko kairir emet, ak kobutyi kurgetab gotab chichoto ole kimi kiptaiyandennyi, kot koeech.

²⁷ Ak king’eet kiptaiyandennyi karon, ak koyat kurgotikab got, ak komanda kolen kwo bandanyi: ak ogeero, kogobutyi kurgetab got chebaigeiyandennyi, komi eunekyik tugatuk.

²⁸ Ak kilenji inendet, Ng’eet kebe; ago ma wol chi kiy: koganapchi anyun sigiriet; ak king’eet chichoto kwo oldanyi.

²⁹ Ak kingo kakwa gonnyi orit, konem rotwet, ak konam chebaigeiyandennyi ak kopcheapchei koek kebeberwek taman ak aeng’, ak koyokto kebeberwechoto koba komoswek tugul che bo Israel.

³⁰ Ak kimwa tugul che kigeer, kole, Kitom kobiitu boisiet ne u ni koboch ngab komong’ lagokab Israel, eng’ emetab Misri agoi ra: obwat, oruoch, ak omwaite.