KIRUOGIK 18 - BUKUIT NE TILIL

Kocheng’ei Danik borotet

¹ Kima komi laitoriat Israel betusiechoto: ak kicheng’jigei bororietab Danik ole menyei eng’ betusiechoto; amu kitom konyor borotenywa eng’ ortinwekab Israel, eng’ betusiechoto.

² Ak kiiyokto lagokab Dan bik mut eng’ orenywa, che kibunu koitenywa tugul, che nyigonen, che kibunu Sora, ak Estaol, koba kosegei emet komarar, ak kilenji, Oba, omarar emet: ak kiit emetab tulonok ne bo Epraim, agoi gotab Mika, ak kiruiyo yoto.

³ Kingomi ye negite gotab Mika, konai kutitab murenonoto Lawindet: ak kimasta koba yoto, kolenji, Kiimutun ng’o inyo yu? Ak iyae nee eng’ oli? Ak itinye nee eng’ yu?

⁴ Ak kilenji ichek, Kigoyaiywa Mika ko u ni ak ko u ni, ak kona tuguk, ak kiaegu tisiindennyi.

⁵ Ak kilenji inendet, Kisomin kele, teebwech ng’omnatet eng’ Kamuktaindet, si kobiit kenai ngo mi kaberuret eng’ bandanyo.

⁶ Ak kilenji tisiindonoto ichek, Oba eng’ kalyet: mitei taitab Jehovah oret ne obendi.

⁷ Kiba anyun bichoto mutu, ak kiit Lais, ak kigeer bik che kimi yoto, kole meng’isiei eng’ kalyet, ko u biteetab Sidonik, kosistos ak kotebyei eng’ kalyet; amu kima komi chi eng’ emet ne ki nenyi bounatet, ne kiimuchi koger kong’ eng’ kiy tugul, ak ki looen eng’ Sidonik, ak kima koting’egei kiy ak chi age tugul.

⁸ Ak kibwa ole mi tupchosiekwak eng’ Sora ak Estaol: ak kimwachi ichek tupchosiekwak kolenji, Otinye ng’al nee?

⁹ Ak kile, Ong’eetye kebe kebarge ak ichek: amu kogegeer emet, ak ogeero, kararan mising’: ak ta osistosi? Amochorirense, oba ak ochut emet ak onam.

¹⁰ Ye oit, onyoru bik che mi kalyet, ak o emet: amu kigonde Kamuktaindet eung’wong’ emonoto; emet ne ma rartaat kiy age tugul ne mi ng’ony.

¹¹ Ak kiba eng’ oloto bik bogolusiek lo, che ilaachi karik, che bo oretab Danik, eng’ Sora ak eng’ Estaol.

¹² Ak kitogosta ak koteech Kiriat-jearim, eng’ Juda: noto anyun kiguure ichek yoto Maanedan agoi ra: mi Kiriat-jearim batai.

¹³ Ak kibun yoto kot koit emetab tulonok ne bo Epraim, kot koit gotab Mika.

¹⁴ Yeityo kowol bichoto mutu che kiba kosegei emetab Lais, ak kolenji tupchosiekwak, Ongen okwek ole mitei gorju epod, ak terapik, ak kanamwet ne kigiwai, ak kanamwet ne kigitany? Obwat anyun nguno kit ne kanyol oyai.

¹⁵ Ak kiwa yoto, ak kiit gotab murenonoto Lawindet, noto gotab Mika, ak kiteebe inendet agobo chamennyi bo ge.

¹⁶ Ak kitononso eng’ ye negite ye kibunei eng’ ormarich, bichoto bogolusiek lo che ki bo lagokab Dan, kolaachi karik.

¹⁷ Ak kitogosta murenjoto mutu che kiga ba kosegei emet, ak kiit oloto, ak kiib kanamwonoto kigiwai, ak epod, ak terapik, ak kanamwonoto kigitany: ak kitonon tisiindet eng’ ye negite ye kibunei eng’ ormarich koboto bichoto bogolusiek lo kolaachi karik.

¹⁸ Ak kingo kagoba bichuto gotab Mika, ak koib kanamwet ne kigiwai, ak epod, ak terapik, ak kanamwet ne kigitany, komwachi tisiindet kolenji, Oyae nee?

¹⁹ Ak kilenji, Sis, kere kutit eung’ung’, ak inyo kebe tugul, ak iegu kwandanyo ak tisiindet: tos mie eng’ inye iegu tisiindetab gotab chito agenge, anan iegu tisiindetab bororiet ak oret eng’ Israel?

²⁰ Ak kibaibait muguleldab tisiindonoto, ak kiib epod, ak terapik, ak kanamwonoto kigiwai, ak kwo kwenutab bik.

²¹ Kiweek anyun ichek, ak kiinde lagok ak tuga ak tuguk kondo.

²² Kingo kagoba ole machei ko loo eng’ gotab Mika, koyumgei murenik che kimi gorik che negite gotab Mika, ak koon lagokab Dan.

²³ Ak kiwaage lagokab Dan. Ak kigusgong’, ak kolenji Mika, Kaamin nee, kot inyo koboto bichu te chu?

²⁴ Ak kile, Kaoreb kanamonikyuk che kiayai, ak tisiindet, ak kaobe, ak ta atinye nee anyun? Omwawa eng’ nee ole, Amin nee?

²⁵ Ak kilenji inendet lagokab Dan, Amengegas kuting’ung’ eng’ kwenunnyo, si mabarin bik che nerektos, ak ibeet sobondang’ung’, koboto sobonwekab bikab gong’ung’.

²⁶ Ak kiba lagokab Dan: ak kingogeer Mika kole kimen eng’ inendet, koweek kwo ga.

²⁷ Ak kiib tuguchoto kiyaei Mika, ak komut tisiindet ne kitinyei, ak kiba koit Lais, agoi ole mi bik che kisistos ak kotebyei eng’ kalyet, ak kibar eng’ rotwetab chok; ak kibeel nganaset.

²⁸ Ak kima biit sorunindet, amu ki loo eng’ Sidon, ak kima koting’egei kiy ak chi age tugul; ak kimi nganasanato atebwet ne negite Bet-reob. Ak kiteech nganaset, ak komeny.

²⁹ Ak kiguure nganasanato Dan, komwaitae Dan kwandanywa, ne kiga kisikyi Israel: ago ki kainetab nganasanato eng’ tai ko ki Lais.

³⁰ Ak kilumdochigei lagokab Dan kanamwet ne kigiwai kotonon: ak kiek tisiikab bororietab Danik, Jonatan weritab Gersom, weritab Musa, inendet ak werikyik agoi betut ne kigiluule emet.

³¹ Kilumda anyun kotonon kanamwet ne kigiwai ne bo Mika ne kiyaei inendet, eng’ betusiek tugul ye kimi gotab Kamuktaindet Silo.