KIRUOGIK 17 - BUKUIT NE TILIL

Mika ak kanamwennyi ne kigitanyi

¹ Ak kimi chito age ne bo emetab tulonokab Epraim, ne kigiguure kainennyi Mika.

² Ak kilenji kamennyi, Fedaisiechoto bogolusiek taman ak agenge che kigiibenen, ak kiichubisie agobo choto, ak kiimwa agase eng’ itikyuk, keero, atinye fedaisiechoto; kiaib. Ak kile kamennyi, Iberurot werinnyu eng’ Jehovah.

³ Ak kiweekyi kamennyi fedaisiechoto bogolusiek taman ak agenge, ak kile kamet, Katabanji iman Jehovah fedaisiechu eng’ eunnyu agobo werinnyu, si kobiit koyae kanamwet ne kiwaei ak kanamwet ne kitanyi: kaweegun anyun amu noto.

⁴ Ak ye kiweekyi kamennyi fedaisiechoto, konam kamet fedaisiek bogol aeng’, ak kogochi kitang’indet ne kiyai kanamwet ne kiwaei ak kanamwet ne kitanyi eng’ fedaisiechoto: ak kitebe tuguchoto gotab Mika.

⁵ Ak kitinyei chichoto kiguure Mika gotab kanamonik, ak kiyai epok, ak terapik, ak kiitaban age eng’ werikyik, ne kiek tisiindennyi.

⁶ Ak kima komi betusiechoto laitoriat eng’ Israel: kiyaei chi tugul ko u ye keerei eng’ konyekyik kole mie.

⁷ Ak kimi mureno age ne kibunu Bet-lehem-juda, ne bo oretab Juda, ne ki Lawindet, ak kimeny oloto koek toondet.

⁸ Ak kiwa chichoto eng’ nganasanato, eng’ Bet-lehem-juda, kwo kotebe ole kanyorji oldo koek toondet; ak kiit emetab tulonokab Epraim agoi gotab Mika, eng’ bandanyi.

⁹ Ak kilenji Mika, Ibunu ano? Kolenji, A Lawindet ne bo Bet-lehem-juda, ak awendi amenye eng’ ole kanyorji oldo, aegu toondet.

¹⁰ Ak kilenji Mika inendet, Ngemeny tuwai, si iegu kwanda eng’ ane ak ko tisiindet, ak agonin fedaisiek taman eng’ kenyit, ak ngoroik, ak amitwogiguk. Kwo go anyun Lawindet.

¹¹ Ak kicham Lawindet anyun komeny ak chichoto; ak kiigei murenonoto age eng’ werikyik.

¹² Ak kiitaban Mika Lawindonoto, ak kiek murenonoto tisiindennyi, ak kitebe gotab Mika.

¹³ Kole anyun Mika, Angen nguno ale yaiywa Jehovah ne mie, amu atinye Lawindet ne tisiindennyu.