KIRUOGIK 16 - BUKUIT NE TILIL

Kolaei Samson kurgotikab Gasa

¹ Ak kiwa Samson Gasa, ak kogeer eng’ oloto chepkugoniot, ak kotuiyogei ak inendet.

² Ak kigimwachi Gasik kelenji, Kagonyo Samson oli. Ak kiyiem inendet, ak kiribisyo korib kemout komugul eng’ kurgetab nganaset, ak kisisyo kemout komugul kolen, Ingotebi agoi koeech, si kebar inendet.

³ Ak kiru Samson agoi kemoi kwen, ak king’eet kemoi kwen, ak kinam kurgotikab ormarichetab nganaset, koboto tugatugikyik aeng’, ak kotut, koboto temeleiywot, ak kotiiny kaat, ak koib kot koit tulwet barak ne tokyingei Hebron.

Samason, ak koberberisiei Delila

⁴ Ak kingobata noto kocham Samson kwondo age ne kimi atebwetab Sorek, ne kigiguure kainennyi Delila.

⁵ Ak kitogos kiptainikab Pilistik kobwa ole mi kwonyoto, ak kolenji inendet, Igaigai inendet, si inai ole mi kimnatoninyi o, ak ole kimuchi kiterterte inendet, si kobiit kerat inendet kinyalil: si kogonin age tugul eng’ achek fedaisiek bogolusiek taman ak agenge.

⁶ Kilenji anyun Delila Samson, Asomin ale mwawa ole mi kimnatoning’ung’ o, ak kimuchi keratenen nee si kinyalilin.

⁷ Ak kilenji Samson inendet, Ngot keratena inoik tisab che ta ko lelach, che tomo koyaamnyo, anyaluli anyun, ak aige chi tugul.

⁸ Kiipchi anyun kiptainikab Pilistik osotiondonoto inoik tisab che ta ko leelach, che tomo koyaamnyo, ak korate inendet inoichoto.

⁹ Ak kitinyei bik che kiribei che kimi got ne bo orit. Ak kilenji inendet, Kabwanjin Pilistik, Samson. Ak king’eti inendet inoichoto, ko u ye ng’etos katanisiek ye katiiny mat. Ko ma konaak anyun kimnatennyi.

¹⁰ Ak kilenji Delila Samson, Keero, kaichota, imwawa lembech: asomin anyun ale imwawa kimuchi keratenen nee.

¹¹ Ak kilenji inendet, Ngot keratena rogoosiek che leelachen che tom keyai kiy, anyaluli anyun, ak aige chi tugul.

¹² Konam anyun Delila rogoosiek che leelach, ak korate ak kolenji, Kabwanjin Pilistik, Samson. Ak kimi bik che kiribei eng’ got ne bo orit. Ak king’eti eng’ eunekyik ko u ye king’etiei inet.

¹³ Ak kilenji Delila Samson, Ichota kora ak imwawa lembech: mwawa anyun kimuchi keratenen nee. Ak kilenji inendet, Ngot ilet kaletutichu tisab bo sumeekyuk eng’ kit ne kiletisie.

¹⁴ Ak kiratyi sumeechoto tigongiot, ak kolenji, Kabwanjin Pilistik, Samson. Kisiir anyun eng’ ruondanyi, ak kiitut tigongiotab kimurtoiyot koboto kit ne kiletisie.

¹⁵ Ak kilenji kwonyoto inendet, Imuktoi ano imwa ile, Achamin, ama mi muguleldang’ung’ kobota? Koichota konyil chuto somok, ama imwawa ole mi kimnatoning’ung’ o.

¹⁶ Ak kingo kagoiim betusiek che chang’ eng’ ng’alekyik, ak kobirjin, kong’et anyun sobondanyi agoi kome mugulel.

¹⁷ Ak kimwachi tugul che kimi muguleldanyi, kolenji, Tomo kicher metinnyu ole ki koi; amu kiaegu Nasiritindetab Kamuktaindet koboch ami moetab kamennyu: ngot kicher metinnyu, kowendi anyun kimnatennyu eng’ ane, anyaluli, ak aige chi tugul

¹⁸ Ak kingogeer Delila kole kagomwachi inendet tugul che kimi muguleldanyi, koyokto keguur kiptainikab Pilistik, kolenji, Obwa otogosu anyun ra, amu kagomwawa tugul che mi muguleldanyi. Kitogos anyun kiptainikab Pilistik kobwanji kwonyoto, koibu fedaisiek.

¹⁹ Ak kimwachi kwonyoto inendet korue kutung’oikyik; ak kiguur chito age, konyo kocher kaletutichoto tisab bo sumeekyik; ak kitoi kwonyoto konyalil inendet, ak kiwa kimnatennyi eng’ inendet.

²⁰ Ak kile, Kabwanjin Pilistik, Samson. Ak kisiir eng’ ruondanyi, ak kole, Amandoi ko u ye cham ayae kotugul, awa aleileige. Ago kima nai kole kagometo Jehovah inendet.

²¹ Ak kinam Pilistik inendet; ak kobar konyekyik; ak kiimut inendet kwo Gasa, ak kirate inendet sirimwekab sugunonik; ak king’aiso eng’ korgoret.

²² Ago kibityo sumeekyik kogeny ye kingo kagicher.

Meetab Samson

²³ Ak kiiyumgei kiptainikab Pilistik si kogochi korosiot ne o, Dagon kanamwenywa, ak koboiboitu: amu kimwa kole, Kagonde kanamwennyo Samson bunyondennyo eunekyok.

²⁴ Ak kingogeer bik inendet, kolos kanamwenywa: amu kimwa kole, Kagonde kanamwennyo bunyondennyo eunekyok, ak ko ng’emindetab emennyo, ne kigobarenech bik che chang’.

²⁵ Ak kingogasgei mugulelwekwak, kole, Oguur Samson konyo kourerenwech. Ak kiguur Samson komong’ eng’ korgoret; ak kiureren eng’ tainywa: ak kiinde inendet kwenutab tolochik.

²⁶ Ak kilenji Samson lakwet ne kinamoti eut, Bagakta asabsab tolochik che tonone got, si atiiege.

²⁷ Ki nyiitat murenik ak gotab kor goyoto; ak kimi yoto kiptainik tugul che bo Pilistik; ak kimi got barak murenik ak gotab kor olo bo elfusiek somok che kigeerei Samson kourereni.

²⁸ Ak kiguur Samson Jehovah kolenji, Ee Kiptaiyat Jehovah, asain ale ibwata, ak asain ale igimita ra kityo, ee Kamuktaindet, si ayaaktochige mugetut eng’ Pilistik agobo konyekyuk tuwai.

²⁹ Kinam anyun Samson tolochik aeng’ che kitonone got, ak kotiiegei, kiname age eutab tai, koname age eutab katam.

³⁰ Ak kile Samson, Bagakta ame koboto Pilistik. Ak kiing’uruk eng’ kimnatennyi tugul; ak kilulji goyoto kiptainik, koboto bik tugul che kimitei orit. Bik che kibar eng’ betutab meennyi ko kisiirei che kibar kota kosobei.

³¹ Kingobata kochorgei anyun tupchosiekyik ak bik tugul che bo gotab kwandanyi, ak kiinem ak kola kotogos, ak kotupchi inendet kwenutab Sora ak Estaol eng’ ole kitupchin bik, ne bo Manoa kwandanyi. Ak kiiruokyi Israel kenyisiek tiptem.