KIRUOGIK 15 - BUKUIT NE TILIL

Kobarei Samson Pilistik

¹ Ago kingobata betusiek alak eng’ betusiekab kesisietab nganok, korutochi Samson osotiondennyi, kogetyin aruetab ng’oror; ak kole, Awendi go ole mi osotiondennyu. Ago ma chamji inendet kwo go kwandab osotiondonoto.

² Ak kile kwandab osotiondonoto, Kialen kiiwech inendet iman; noto anyun, kiagoite inendet kotun chorueng’ung’: tos ma kararan chepkamet ne ming’in kosiir inendet? Asomin ale imut noto ne kata imuti inendet.

³ Ak kilenji Samson ichek, Masiche lelut rani eng’ Pilistik ye ayachi yeitiet.

⁴ Ak kiwa Samson ak konam lelwek bogol somok, ak konam kegenganik, ak kichob lelwek kotuktochin batai, ak konde kegenget kwenutab katutaik aeng’ alak tugul.

⁵ Ak kingo kagonde mat kegenganichoto kounda koba ole mi bekab Pilistik che tomo koges, ak kobeel bek che kigiyum kotononso ak che tomo keges, koboto mbarenikab emitik agichek.

⁶ Koteeb anyun Pilistik, kole, Ng’o ne kayai kii? Ak kile, Samson, sandetab Timnaindet, amu kirebe osotiondennyi, kogochi choruennyi. Kitogosta anyun Pilistik, ak kobeel osotiondonoto ak kwandanyi eng’ mat.

⁷ Kolenji Samson ichek, Ngot ko koayai ko u ni, ayaaktochinige mugetut iman eng’ okwek, ak ye ibata, asis.

⁸ Ak kibar ichek komugus eng’ baret ne o: yeityo kochortagei kwo komeny ole kibetak eng’ ruandetab Etam.

⁹ Kitogosta anyun Pilistik ak koteech Juda, ak koyom komoswekab Lei.

¹⁰ Ak kile bikab Juda, Amu nee si otogosu obokyech? Ak kile, Kagitogosu kebwa kerat Samson, keyachi inendet ko u ye koyaiywech.

¹¹ Kichortagei anyun bik elfusiek somogu che bo Juda koba ole kibetak eng’ ruandetab Etam, ak kolenji Samson, Mengen ile boiywech Pilistik? Nee anyun kii koiyaiywech? Ak kilenji ichek, Ko u ye kiyaiywa ko kiayachi ichek ko u noto.

¹² Ak kilenji ichek, Kagichoruge kebwa keratin, si kobiit kigoiten iwe eutab Pilistik. Ak kilenji Samson, Oyosiewa, ole mobara okweget.

¹³ Ak kimwachi inendet kolenji, Achicha, kibwane keratin mising’, ak kigoiten iwe eunekwak: ago magibarin, iman. Kirate anyun rogoosiek aeng’ che leelach, ak komut kotogos eng’ ruandet.

¹⁴ Kingoit Lei, kowaach Pilistik ko katuiyo ak inendet: ak kinyonji inendet Tamirmirietab Jehovah eng’ kimnatet, ak kiigei rogoosiek che kimi eunekyik katanit ne kabeel mat, ak kiibutyo eng’ eunekyik tuguk che kiga kirate.

¹⁵ Kinyor anyun kowetab tagilgilietab sigiriet ne tom koyaam, ak kiinem, ak kobare bik elfut.

¹⁶ Ak kile Samson, Karurugutik eng’ karurugutik, eng’ kowetab tagilgilietab sigiriet, Kabare bik elfut kowetab tagilgilietab sigiriet.

¹⁷ Ak kingo kagoges ng’alalonoto, kowirta kowonoto bo tagilgiliet ne kami eunnyi; ak kigiguure yoto Ramat-lei.

¹⁸ Ak kiam melelda ne o, ak kiguur Jehovah, kolenji, Kaigonu sorunoni o eng’ eutab otwogindeng’ung’: ak nguno, amee eng’ melelda, si abutyi eutab che ma kimuratan.

¹⁹ Ago kibet Jehovah ole kimi keringet eng’ Lei ak kimong’une beek yoto; ak kingo kagoee koweek tamirmiriennyi kogeny, ak kisob: kigiguure kainetab yoto anyun En- hakore, ne mitei Lei agoi rani.

²⁰ Ak kiiruokyi Samson Israel kenyisiek tiptem eng’ betusiekab Pilistik.